1 Pieri 4 - U TIENU MAAMA TILI 2013

Paadi mani leni ti tuonbiadi

¹ Lanwani, Kilisiti n den laa fala o gbanandi nni yeni, yimo n bogini ki sedi leni laa yantiali, kelima yua n laa fala o gbanandi nni paadi leni ti tuonbiadi.

² Lani yaa po, yaa dana n sieni yi po ki tinga ne niinni, yin da go ye ki ŋua ti gbanandi bonbuakaala ka, ama yin yaa ye ki tiendi U Tienu yanbuama.

³ Yin den tuuni yaa tuongunda yeni, moala li dagidi, kelima yi den tiendi bi nilanba yanbuama, ki puuni yi yula mi conconma, yi gbanandi bonbuaka-biadila leni li dañogaadili po. Yi den di ki go ñu ke li pendi, ki ŋua i cancaginbuli.

⁴ Yin kaa go yegi leni ba ki kuani yi yama laa cagindi nni yeni, li ludi ba, ke bi sugidi yi.

⁵ Ama bi baa togidi bi tuona kuli, wani yua n bogini ki baa jia yaaba n fo leni yaaba n kpe kuli buudi.

⁶ Li tie lani yaa po ke bi den waani yaaba n kpe o Laabaaliŋamo, ke ban fidi ki yaa pia U Tienu miali kelima mi Fuoma po, ba ke ti buudi den cuo ba nani bi nisaaliba kuli yeni.

⁷ Li bonla kuli juodima nagini. Yin faami ki yaa kubi yi yula, lani n tie yin fidi ki yaa jaandi.

⁸ Yaala n cie likuli tie ke yin yaa bua yiyaba leni yi pala kuli, kelima mi buama doagini ti tuonbiadi boncianla.

⁹ Yin yaa gaani yiyaba cangu, ki da yenbidi.

¹⁰ Yi siiga yuakuli n yaa todi o lieba leni wan den baa U Tienu kani yaa ŋanbili paabu buolu. Yeni, yi baa yaa tie U Tienu naacen-juoginkaaba leni wan puni yuakuli yaa paabu buolu po.

¹¹ O nilo yaa maadi, lan yaa tie ke o wangi U Tienu maama. Yua n tuuni U Tienu tuonli, wan yaa tuuni leni U Tienu n puuni o yaa fidu. Yin yaa tiendi yeni ke wani U Tienu n yaa baadi ti kpiagidi li bonla kuli nni, kelima Jesu Kilisiti po, wani yua n die ti kpiagidi leni u paalu kuli, hali yaa yogunu kuli. Amina!

Ki taani leni Kilisiti o fala nni

¹² N buakaaba, yi yaa ye fala biigima mu nni, lan da ludi yi, nani li tie yi po boncanla yeni.

¹³ Ama yin yaa mangidi yi pala, kelima yi taani leni Kilisiti o fala nni. O kpiagidi yaa doagidi yaa yogunu moko, yi baa yaa ye leni li pamankandikaali.

¹⁴ Bi yaa sugidi yi kelima Kilisiti yeli po, li pamanli ye leni yi kelima ti kpiagidi Fuoma, wani U Tienu Fuoma Yua yeni ye leni yi.

¹⁵ Ama yi siiga nni oba kuli n da le fala kelima o tie nikpalo, suudo, bi kelima o tieni biaditoama po. Lan didi da tie ke o kua yaa maama n kaa pundi o yaa niinni.

¹⁶ Ama o yaa laa fala kelima o tie Kilisiti yua, wan da jie i fe li po, wan kpiagi U Tienu leni ban yini o laa yeli yeni.

¹⁷ U yogunu pundi ke ti buudi baa cili leni U Tienu diegu. Lanwani, li yaa tie ke ti buudi cili leni tinba, yaaba n yie kaa tuo ki tiendi U Tienu Laabaaliŋamo n yedi yaala mo yaa juodima baa yaa tie lede?

¹⁸ Nani i Diani n yedi maama: «O niteginka yaa faabi leni fala, yua n yie U Tienu leni ti tuonbiadi daano mo te?»

¹⁹ Lanwani, li pundi ke yaaba n laadi fala kelima U Tienu yanbuama po n suagi ki yaa tiendi yaala n ŋani, ki teni bi yula wani o Tagido yua n tie o dugika.