1 Pieri 3 - U TIENU MAAMA TILI 2013

Bi puoba leni bi ciaba

¹ Yinba bi puoba mo, yin yaa miindi yi yula yi ciaba kani, ke bi siiga tianba yàá tuo U Tienu maama, yi tagi n tie maama n teni ban tuo ki daani, ba ke yii maadi ba maamiba kuli.

² Lani mo baa ŋoadi yi tagi n ŋani ki go pia li fangili maame.

³ Yi ŋamu n da ŋua yin sibidi yi gbanandi maama, ki piani yi yudi, ki go bobi yaa jafantiadi n tie wula leni yaa tiayiekaadi n ŋani ki pendi ka.

⁴ Ama lan yaa tie yaa ŋamu n wuo yi pala nni ki kan yindi, lani n tie mi dingima leni mi yansoangima, U Tienu n nua yaama ke mi pia mayuli boncianla.

⁵ Yaa puoba n den ye hali yogu, ki bili bi dugidi U Tienu kani den maani ki sibidi biba yene, ki miindi bi yula bi ciaba kani,

⁶ nani Sala n den tiendi maama. O den tuodi ki ŋua Abalahama maama ki yi o o diedo. Yi tie Sala puoliŋuani moala, yi yaa tiendi yaala n ŋani, kaa tuo ke jawaandiba kuli cuo yi.

⁷ Yinba bi puodanba moko, yuakuli n yaa ye leni o pua leni mi yanfuoma, ki yaa faami ke bi puoba tadi ki cie bi jaba. Yin yaa jigindi ba, kelima bimoko taa leni yi ki baa U Tienu kani li ŋanbili leni li miali. Yin yaa tiendi yeni, ke liba kuli n da pigini yi jaandi.

Yaa tiendi mani yaala n ŋani

⁸ N tundijuodike n tie ne. Yikuli n yaa pia mani yantiayenli leni yiyaba, ki yaa gba yiyaba po mi ninñima, ki gbie leni mi buama yi kpiiba po, ki go yaa pia mi ninñingbadima leni li yumiinli yiyaba po.

⁹ Yin da guani oba kuli o biadima, ki da sugi ki guani oba. Ama yin gaali, kelima U Tienu den yini yi lani yaa po, ke yimo n baa o kani li seli.

¹⁰ Li diani: «Yua n bua ki yaa ye ki pia li pamanli, Ki go bua ki le yaa miali dana n ŋani, Wan kubi o lanbu leni mi biadima, Ki kubi o ñoacuuna mo leni i boandi maama.

¹¹ Wan foagidi leni yaala n bia ki yaa tiendi yaala n ŋani, Ki lingi mi yanduanma, ki yaa ŋua ma.

¹² O Diedo nuni nua bi niteginkaaba, O tuba mo cengi bi jaandi. Ama o Diedo fii ki se yaaba n tiendi mi biadima po.»

¹³ Yi yaa pia li yankuali ki tiendi yaala n ŋani, ŋme n baa waani yi fala?

¹⁴ Li pamanli ye leni yi, ba bi yaa waani yi fala yin tiendi yaala n ŋani yaa yogunu. Yin da jie mani bi nisaaliba ba waamu, ki da yagi yi yama.

¹⁵ Yin yaa jigindi mani Kilisiti yi pala nni, wani yua n tie o Diedo. Yin bogini mani ke yogunu kuli bi yaa buali yi yin pia yaa suginma, yin fidi ki doagidi ki waani ba.

¹⁶ Ama lan yaa tie leni mi dingima leni li fangili. Yaa pia mani yaa pali siedi n ŋani, lani, ba bi yaa sugidi yi ki kuli yi ke yi tie i tagili danba, yaaba n sugidi yin pia yaa tagiŋami Kilisiti nni yeni, n le i fe.

¹⁷ Li yaa tie ke U Tienu n bua yin le fala, kelima yi tiendi yaala n ŋani, li cie yin le o kelima yi tiendi yaala n bia.

¹⁸ Kilisiti moko den laa fala yenma ti tuonbiadi po, ke li dagidi u yogunu kuli po. Wani yua n tiegi den kpe yaaba n ki tiegi po, ke wan gobidi ki gedini yi U Tienu kani. O den kpe ti gbanandi po, ama o den guani ki baa li miali, kelima mi Fuoma po.

¹⁹ Li tie leni laa Fuoma yaa paalu po yo, ke o den gedi ki ban waani U Tienu maama yaa naani n ban ye li kpaadidieli nni.

²⁰ Hali yogu, bi den fiini mi yiema U Tienu po, ke o den juuni leni ba ke li waagi. Li den tie Nowe n den kpie ku ñinbiaciangu yaa yogunu. Niba waamu, lani n tie nibinii, yaaba n den kua ku ñinbiaciangu yeni niinni ki faabi leni mi ñima.

²¹ Mi ñima yeni den tie yaa batisima n faabi yi moala yaa nannanli. Laa tie ke mi batisima ŋuudi ki ñani ti gbanandi joagindi ka. Ama mi baa teni o nilo n pa o yuli U Tienu leni yaa pali n ki pia joagindi. Yi baa ki faabi kelima Jesu Kilisiti fiima bi tinkpiba siiga yaa po.

²² Jesu doni tanpoli ki ye U Tienu jienu, ki die malekinba, li bali danba leni tanpoli paaciami danba kuli.