1 Pieri 2 - U TIENU MAAMA TILI 2013

Yaaba n daani n tie U Tienu buolu

¹ Lani yaa po, yin ŋaa mi biadima, i boandi buoli kuli, palalie yantiali, li nunponbiadili leni ti sugidi buoli kuli.

² Nani a canpanda n bua mi biima maama, yimo n yaa bua yaa naaŋanma n tie U Tienu maama yeni. Laa maama ŋani cain, ki baa teni yin kpedi mi tindima nni, kelima mi yaa po,

³ li yaa tie ke, «moala yi leni ki laa o Diedo n mani maama.»

⁴ Yaa kpendi mani o Diedo kani, wani, yaa tanli n fo kani. Bi nisaaliba n den yie ki luni yaali, U Tienu den gandi line, ke li pia mayuli boncianla.

⁵ Yinba yaaba mo n tie nani yaa tana n fo, teni mani ban maa yi yin tua U Tienu diegu, o Fuoma n ye naankani. Lani, yi baa tua yaa kopadicianba n gagidi U Tienu po, ki padi o po yaa pada n gagidi, ki go mani o po, kelima Jesu Kilisiti yaa po.

⁶ I Diani nni li yedi: «Diidi, n bili Siyon dogu nni li tanpuukaali, Min gandi yaali ke li tie tanmoanli. Yua n dugi li tanli yeni po kuli, kan fiagi.»

⁷ Laa tanli tie jigidi yinba yaaba n daani po. Ama yaaba n kaa daani po wani, li tie: «Bi tanmaaba n den yie yaa tanli, Lini n tua li tanpuukaali.»

⁸ Li go yedi: «Li tie li tantuudikaali, Leni li tingbali tancianli.» Bi tuudi kelima baa tuo ki daani U Tienu maama nani lan den bili bi po maama.

⁹ Ama yinba wani, yi tie ban den gandi yaa buolu, o Bado kopadicianba, yaa buolu n gagidi ki ŋani, wan baa yaa buolu o yuceli po. O yini yi ke yin ña li biigili nni, ki kua o yenma yaama n ŋani cain nni, ke yin yaa wangi o tuona yaa n ŋani boncianla.

¹⁰ Yii den kpa tie o buolu, ama moala yi tua o buolu. Yii den kpa baa ke o gbadi yi po ninñima, ama moala o gbadi yi po mi ninñima.

Li dandanli mi biigima nni 2.11—4.19 Yin yaa ye U Tienu naacenba yema

¹¹ N buakaaba, n mia ki go tundi yi, yinba yaaba n tie canba leni sancenba ŋanduna nni, ke yin yaa yiedi ki da tiendi yi gbanandi bonbuakaala, yaala n tiendi bu toabu leni yi yantiana.

¹² Yin yaa pia u tagiŋamu bi nilanba siiga. Lanwani, ba bi yaa kuli yi ke yi tiendi yaala n bia, ban le yi tuonŋama, ki kpiagi U Tienu, o cuama daali.

¹³ Lanwani, yin yaa miindi yi yula kelima o Diedo po, bi nisaaliba n dini yaa bali danba kuli kani, lan tie mi diema badiciamo yua n tugi li yuli,

¹⁴ bi guveneerinba kani, wan soani yaaba ban yaa pa i tagili danba bi biadima panpaani, ki yaa pagi yaaba n tiendi yaala n tiegi mo.

¹⁵ Lanwani, U Tienu bua ke yin yaa tiendi yaala n ŋani yeni, ki fidi ki mubini bi yanboandanba leni bi yanpiidanba ñoana.

¹⁶ Yi tie yaaba n faabi, yaa tie mani yaaba n faabi n baa yaa tie maama. Yin da teni yin die yi yula maama po n pa yi u sanu yin wuoni yi biadima. Ama yin yaa tie nani U Tienu naacenba n dagidi ki yaa tiendi maama.

¹⁷ Yin jigini bi nisaaliba kuli, ki bua yi kpiiba. Yaa fangi mani U Tienu, ki jigindi o badiciamo.

Kilisiti fala tie ti po bontogidikaala

¹⁸ Yinba bi naacenba, yin yaa fangi yi canbaanba, ki miindi yi yula bi kani, laa tie yaaba n ŋani ki go dingi bebe kani ka, ba yaaba yaa yama n pa moko yaa kani.

¹⁹ Bi yaa faligidi o nilo ke waa pia tagili, ke o tuo ki gaa kelima o fangi U Tienu, li tie yaa bonla n ŋani.

²⁰ Bi yaa faligidi yi kelima yi tieni ti tuonbiadi ke yi juuni, li baa cuani yi po be yaa pagidi? Ama yi yaa tieni yaala n ŋani ke bi faligi yi, ke yi juuni, li tie yaa bonla ŋani U Tienu nintuali.

²¹ U Tienu den yini yi lani yaa po, kelima Kilisiti wani o ba moko den laa fala yinba yaa po, ki ŋaa yi po li bontogidikaala, ke yin yaa ŋua o yaa fuuli.

²² Wani, waa den tieni tuonbiadiba kuli, Baa den gbadi boandiba kuli o ñoabu nni.

²³ Ban den sugidi o yaa yogunu, waa den guani liba. Ban den faligidi o yaa yogunu, waa den funi leni ba. Ama o den tendi o yuli, Yua n ja ti buudi leni mi teginma.

²⁴ Wani yua n den tugi ti tuonbiadi O gbanandi nni ku daagu po, Ke tinba yaaba n kpe ti tuonbiadi po yeni, N yaa ji ye ki fo, ki tiendi mi teginma. Li tie o poagilima yaa po yo, ke yi paagi.

²⁵ Yi den tie nani yaa pe n yaadi yeni, Ama moala, yi guani yi yankpaaŋamo kani, Wani yi guudika yaa kani.