1 Pieri 1 - U TIENU MAAMA TILI 2013

U Tienu faabi ti Jesu Kilisiti nni 1.1—2.10 I fuondi

¹ Mini Pieli, Jesu Kilisiti tondo, n diani li tili yinba U Tienu n gandi yaaba ke yi yadi yadi ki ye ku cangu Ponti, Galati, Kapadosi, Asi leni Bitini diema nni kuli.

² U Tienu yua n tie Baa den gandi yi, nani wan den tuodi ki bani ki jagi maama, ki teni ke o Fuoma gagidi ki ŋanbi yi, ke yin yaa tuodi ki tiendi Jesu Kilisiti n yedi yaala, o soama mo n mii ki ŋanbi yi. Li ŋanbili leni mi yanduanma n yaa pugidi yi po boncianla.

Yaa suginma n fo

³ U Tienu ti Diedo Jesu Kilisiti yaa Baa n baa ti pagidi! O ninñingbadicianma po teni ke ti pia li miapanli leni yaa suginma n fo kelima Jesu Kilisiti fiima bi tinkpiba siiga yaa po.

⁴ Ti guu U Tienu n bili ti po yaa ŋalimano tanpoli po, yua n kan bodi, ki kan joagini, ke o ŋamu mo kan yindi.

⁵ O bili la yinba yaa po, wani U Tienu paalu n kubi yaaba kelima li dandanli po, yaa tindima n baa yuandi ki doagidi mi juodima yogunu.

⁶ Lanwani, mangi mani yi pala boncianla, ba li yaa tie tiladi, ke biigima buoli boncianla teni ke yi ye leni li pabiidili u yogunu waamu po moala.

⁷ Laa bonla cua ki baa doagidi yi dandanli n moani maama. Wula, ba ke o tie bonmoanla, baa fidi ki biidi. Ama bi yen biigi o leni u mu. Li tie yenma leni yi dandanli, yaala n tie bonmoanla ki cie wula, ban baa biigi yaali ki bandi lin moani maama. Lani n tie yin baa ti pagidi, ti kpiagidi leni ti jigidi Jesu Kilisiti n baa doagidi yaa yogunu.

⁸ Ba ke yi daa laa o, yi bua o. Ba ke moala yii nua o, yi daani o, ki pia yaa pamancianli n pia ti kpiagidi, ki pendi bu ñoabu yedima,

⁹ kelima yi baa yi dandanli panpaani, lani n tie yi tindima.

¹⁰ Bi saawalipuaba yaaba n den pua saawali, U Tienu n bili yi po yaa ŋanbili po, den lingi ki buali, ki bua ki bandi laa tindima maama fuuli.

¹¹ Kilisiti Fuoma yaama n den ye bi niinni den tuodi ki waani ba Kilisiti n baa le yaa fala leni wan baa yuandi ki baa yaa kpiagidi. Bi den moandi ki bua ki bandi lani kuli n baa tieni yaa yogunu leni li yogunu n baa yaa tie maama.

¹² U Tienu den doagidi ki waani ba ke ban soagindi yaa maama yeni, naa tie bani bi ba po ka, ama yinba yaa po. Moala yi gbadi laa bonla maama yaaba n wangi yi o Laabaaliŋamo kani. Bi den baa o U Tienu Fuoma Yua paalu, U Tienu n soani yua ke o ñani tanpoli po ki cua ŋanduna nni, ki wangi yi la. Ba malekinba bua hali boncianla ki diegi ki bandi laa bonla n tie yaala.

Tin yaa gagidi ti yula U Tienu po

¹³ Lani yaa po yin bogini, yi yantiana mo n yaa se kaanyendu, ki bili yi suginma yin baa baa yaa ŋanbili nni, Jesu Kilisiti n baa doagidi yaa yogunu.

¹⁴ Yin yaa tie yaa bila n tuodi ki tiendi U Tienu n yedi yaala, ki da go ŋua yin den kpa pia yaa bonbuaka-biadila, yi yama n den pii yaa yogunu.

¹⁵ Ama, nani yua n yini yi n gagidi ki ŋani maama, yimo n gagidi ki yaa ŋani yeni, yi tagi kuli nni.

¹⁶ Li diani ki yedi: «Yin gagidi ki yaa ŋani, kelima mini, n gagidi ki ŋani.»

¹⁷ Yi yaa miadi U Tienu ki go yini o yi Baa, wani, waa tiendi gagidima bi niba siiga, ki ja yuakuli buudi nani o tuona n tie maama. Lani yaa po, yin yaa ye leni li fangili o nintuali yin ye ŋanduna nni ki tie canba yaa yogunu bianu kuli.

¹⁸ Yi bani ke U Tienu ki den taa yaa bonla n baa bodi nani ŋanjilifa leni wula yeni ka, ki daa ki faabi yi leni yaa yema n tie fanma fanma, yin den baa yaama yi yaajanba kani.

¹⁹ Ama, o den daa ki faabi yi leni Kilisiti yaa soama, yaama n pia mayuli hali boncianla, ki tie nani ban padi yaa pebiga n ki pia poadoba kuli yaama maama yeni.

²⁰ U Tienu den tuodi ki gandi wani Kilisiti lani kuli po, hali ke ŋanduna daa tagi, ki doagidi o ŋanduna juodima yogunu yinba yaa po.

²¹ Li tie wani Kilisiti yaa po ke yi daani U Tienu wani yua n den fiini o bi tinkpiba siiga, ki puni o ti kpiagidi, ke yin yaa pia li dandanli leni ti dugidi wani U Tienu po.

²² Moala yi ŋanbi yi yula leni yin ŋua i moamoani, ke yin fidi ki yaa pia yaa buama n ki pia tuonanma yi kpiiba po. Lanwani, yin yaa bua yiyaba hali boncianla leni yi pala kuli.

²³ Lani yaa po, yi pia li miapanli. Yii pia li ke li ŋua leni yaa bonbuoli n baa bedi ka. Ama li tie leni yaali n kan bede. Lani n tie U Tienu maama yaama n fo, ki baa yaa ye hali yaa yogunu kuli po.

²⁴ Li diani: «Bi nisaaliba kuli tie nani ti muadi yeni, Bi kpiagidi kuli mo tie nani ti muadi puuma yeni. Ti muadi kuodi ke ti puuma mo suodi,

²⁵ Ama o Diedo maama baa yaa ye hali yaa yogunu kuli.» Laa maama tie ban den wangi yi yaa Laabaaliŋamo.