1 Korenti 9 - U TIENU MAAMA TILI 2013

O tondo bali leni o tuonli

¹ Mii die n yuli ka? Mii tie Jesu tondo ka yo? Mii den laa ti Diedo Jesu ka? Yii tie min den soani o Diedo po ki baa yaaba ka yo?

² Ba nitoaba yàá nua ke n tie o Diedo tondo, yinba wani nua ke n tie o, kelima yinba n tie yaa maalima n doagidi ke n tie o Diedo tondo.

³ Line n tie min baa yedi yaala ki gaa n yuli leni yaaba n kuliti nni:

⁴ Naani mii pia u sanu ki yaa di ki go ñu n tuonli po?

⁵ Naani mini wani ki pia u sanu ki taa yaa pua n daani Jesu, nani Jesu tondiba yaaba n sieni, o Diedo waamu leni Pieli n tieni maama?

⁶ Bi mini leni Barnabasi bebe n baa yaa tuuni li tuonli tiladi?

⁷ Ŋme n baa kua minteeli leni o yuceli piama? Ŋme n baa ŋuu i tilondi, ki nan kan ŋmani li bonluonkaala? Ŋme n baa yaa kpaa u yankulu ki nan kan ño mi naaŋanma?

⁸ Min maadi yaa maama yeni, naani n maadi nani bi nisaaliba n nua maama bebe yo? Naani li bali maama wani ki yedi yeni ka?

⁹ Li diani Musa bali maama nni, ki yedi: «Ŋan da yilini o nua ñoabu taakunkumi wan ŋmaadi ti disiandi yaa yogunu.» Naani U Tienu den yagini o yama i ne po yo?

¹⁰ Bi o maadi tinba bebe yaa po yo? Li diani yeni tinba yaa po saa. Li pundi ke yua n ko bu kpaabu leni yua n ŋmaadi ti siandi kuli, n yaa daani ke bi baa baa bi biinu lienni.

¹¹ Ti yaa den buli yi kani yaa bonbii n tie U Tienu Fuoma bonla, naani li baa yaa bia ti yaa yendi yi kani yi bonpiakaala?

¹² Nitoaba yaa pia u sanu ki baa gaa yi kani ŋanduna bonla, tinba kaa pia ki cie yo? Ama tii den gaa yi kani nani tin pia u sanu ki baa gaa maama. Ti den tuo ki gaa fala buolu kuli ki juuni li po, ke bonliba kuli n da pigini Kilisiti Laabaaliŋamo.

¹³ Yii bani ke yaaba n tuuni U Tienu diegu tuonli baa yaa baadi bi jiema U Tienu diegu nni ka? Yaaba n tuuni li padibinbinli kani baadi bi biinu ban padi yaala nne.

¹⁴ Likuli yenma, o Diedo bili ke yaaba n tuuni o Laabaaliŋamo tuonli n yaa baadi yaala n dagidi bi yema po o Laabaaliŋamo tuonli nni.

¹⁵ Ama mii tieni nani n bali n puni nni u sanu maama ba waamu. Min diani yi po yaa maama moala ne mo, laa tie ke min baa liba ka. N yaa kpe, lani n mani n po ki cie min tieni yeni. Niloba kan fie nni min kpiagidi n yuli yaala yaa po.

¹⁶ Min wangi o Laabaaliŋamo yeni, n kan kpiagi n yuli li po, kelima li tie n po tilade. Fala n baa n po n yàá wangi o Laabaaliŋamo.

¹⁷ N yaa bi wangi o Laabaaliŋamo n yama po, n bi baa gaa i panpaani, ama min wangi o Laabaaliŋamo tiladi, ke laa tie n yama po yeni, n tuuni U Tienu n puogi nni yaa tuonle.

¹⁸ Lanwani, n panpaani tie be? Li tie ke n wangi o Laabaaliŋamo, ki naa lingi panpaaniba kuli, ki naa go baa go Laabaaliŋamo tondo n pia u sanu ki yaa baadi yaala.

¹⁹ Ba ke n die n yuli kaa tie oba kuli naacemo, n puni n yuli ki tua bi niba kuli naacemo, ki baa dadi niba boncianla, ki cuani o Diedo kani.

²⁰ Lani yaa po, n yaa ye Jufinba siiga, n tie nani n tie Jufi yeni, ki baa dadi ba. N yaa ye bani li bali maama n die yaaba siiga, n tie nani li bali maama n die yua, ba ke maa die nni, ki baa dadi ki cuani li bali maama n die yaaba.

²¹ Li bali maama n kaa die yaaba mo yaa siiga, n tie nani maa die nni yeni, ba ke mi die nni, kelima Kilisiti bali maama die nni, ki baa dadi li bali maama n kaa die yaaba.

²² N yaa ye yaaba n tadi U Tienu sanŋoadima nni siiga, n tie nani yua n tadi yeni, ki baa gobidi ki cuani ba o Diedo kani. N moandi ki tiendi yeni li bonla kuli nni, ki baa faabi bi nitianba.

²³ N tiendi lani kuli o Laabaaliŋamo po, ki baa baa nmo yaa biinu o Laabaaliŋamo ŋalimano nni.

²⁴ Yi bani ke yaaba n boagini mi nuama po kuli yen sani. Ama, naani niyendo bebe ka yen baa i panpaani? Sani mani maama, ke yimo baa baa i panpaani.

²⁵ Yua n bua ki tua liiga yua jelibuolu kuli nni, yen kubi li kuali o gbanandi po li bonla boncianla nni. O tiendi yeni, kelima o bua ki baa yaa panpaani n baa pendi. Ama tinba wani tiendi yeni, ki bua ki baa yaa panpaani n kan pendi abada.

²⁶ Lani n teni ke n tiini mi nuama, ama mii tiini yaali ka, n go tie nani yua n tiendi yaa jeligu n tie ki kudi a nikula, mii kudi mi fawaama ka.

²⁷ N wangi n gbanandi fala, ki paadi ti cain, kelima mii bua ki waani nitoaba o Laabaaliŋamo, ki yuandi ki sua ke bi yedi ke mini n ba ki dagidi, ki ñani nni.