1 Korenti 8 - U TIENU MAAMA TILI 2013

Ti padinandi maama

¹ Moala, yaala n tie ti padinandi po, moamoani, «tikuli pia mi bandima.» Ama mi bandima kpendinni ti japaadi, mi buama mo kpedi li dandanli.

² O nilo yaa tama ke o bani li bonla, o daa bandi nani lan pundi wan bandi maama.

³ Ama yua n bua U Tienu kuli, U Tienu mo bani wane.

⁴ Moala n baa maadi ti padinandi maama. Ti bani ke bulo naa ye ŋanduna nni, ke tiento mo ki ye, se Tienyendu bebe.

⁵ Ba ke ban yi yaala i tieni yabi lan tie tanpoli bi ki tinga nni, li tie moamoani ke i tieni yabi ke bi diediba moko yabi.

⁶ Ama tinba yaa po wani, Tienyendu bebe n ye, yua n tie Baa. Wani n den tagi li bonla kuli, timo ye o yaa po yo. Diediyendo bebe n ye, wani n tie Jesu Kilisiti. Li bonla kuli den tagi kelima o po, timo ye kelima wani yaa po.

⁷ Ama bi niba kuli daa pia laa bandima. Bi nitianba n den maani i buli ŋoadima maama teni ke ba moala, bi yaa ŋmani laa nandi, bi ji nua ti ke ti tie padinandi o bulo po. Lanwani, bi pala siedi ya n tadi yeni yen joagini lienni.

⁸ Laa tie mi jiema ka baa teni tin nagini U Tienu. Ti yàá dini, li kan wadi ti po liba, ti yaa dini mo, li kan pugini ti liba.

⁹ Fangi mani yi yula, ke yin pia u sanu ki tieni yaala n da tua tantuudikaali yaaba n tadi po.

¹⁰ O nilo yaa laa ke fini yua n pia mi bandima kaa li budieli nni ki ŋmani ti padinandi, wani yua yaa pali siedi n tadi, li kan teni wan baa li papaali ki ŋmani ti padinandi te?

¹¹ Lanwani, a kpiilo yua n tadi, Kilisiti n den kpe wani yua yaa po, baa bodi kelima a bandima po.

¹² Yi yaa tudi yi kpiiba po yeni, ki lengidi bi pala siedi yaali n tadi, yi tudi Kilisiti po.

¹³ Lanwani, jiemiba yaa baa guli n kpiilo, n kan go je laa jiema abada, ke min da guli n kpiilo.