1 Korenti 6 - U TIENU MAAMA TILI 2013

Yaa dandantieba n yi bi lieba ti buudi

¹ Yi yaa pia maama yi siiga, be yaa po ke yi yen taa ma ki gedini yaaba n ki daani bujiali kani, ki kan gedini ma bi nigagidiŋanba kani?

² Yii bani ke bi nigagidiŋanba n baa jia ŋanduna buudi? Lanwani, li yaa tie ke yi baa jia ŋanduna buudi, yi baa gbali ki jia ti buwaadi bi?

³ Yii bani ke ti baa jia malekinba buudi? Lanwani, laa pia kuli tama, ke ti baa fidi ki jia ti buudi yaa jamaano n tie ne yaa maama po.

⁴ Lanwani, yi yaa pia o naa jamaano yaa maama leni yiyaba, yi yen taa Kilisiti Nitaanli n ki pia leni yaaba ŋantaado yene, ban tua yi bujiaba.

⁵ N yedi yeni ki bua i fe n cuo yi. Naani yii pia yi siiga ba niyendo yua n pia mi yanfuoma, ki baa fidi ki jia ti buudi o kpiiba siiga?

⁶ Naani yi siiga yua n pia mi maama leni o kpiilo baa gedini o ti buudi po, yaaba n kaa daani kani yo?

⁷ Ba yin pia ti buudi leni yiyaba yeni, li doagidi yi gbalime. Laa bi baa yaa ŋani ki cie yin juuni leni yi kpiiba n tieni yi yaa bonbiadila ka? Laa bi baa yaa ŋani ki cie yin tuo ban je yi ka?

⁸ Ama yinba n tiendi laa bonbiadila, ki di nitoaba, bani yaaba n tie yi kpiiba yeni.

⁹ Yii bani ke yaaba n ki tiegi kan ba biinu U Tienu diema nni yo? Yin da boandi yi yula. Yaaba n tiendi ti cagindi, i buli danba, mi conconma danba, yaaba n biidi bi yula, yaa jaba n taagi leni biyaba,

¹⁰ a suuda, bi ŋaliŋabuaba, a dañogaada, yaaba n sugidi bi niba leni i janbi danba kuli kan baa biinu U Tienu diema nni.

¹¹ Yi siiga bi nitianba den tie laa nibuolu, ama U Tienu ŋuudi yi, ki gagidi yi, ki teni ke yi tua niteginkaaba o Diedo Jesu Kilisiti yeli leni ti Tienu Fuoma po.

A gbanandi n yaa ye o Diedo kpiagidi po

¹² Bi tianba yi siiga tua: «Mii go kua liba,» ama li bonla kuli ka ŋani. N baa fidi ki yedi: «Mii go kua liba kuli,» ama n kan tuo liba kuli n diedi nni.

¹³ Yi go tua: «Mi jiema ye ku tugu po, ku tugu mo ye mi jiema po.» U Tienu baa ti bolini likuli yenma. Ama ti gbanandi naa ye mi conconma po ka, ti ye o Diedo po, o Diedo mo ye ti gbanandi yaa po.

¹⁴ U Tienu, yua n den fiini o Diedo bi tinkpiba siiga, o go baa fiini timo, kelima o paalu yaa po.

¹⁵ Yii bani ke yi gbanandi tie Kilisiti gbananbuoli ka yo? Naani n baa taa Kilisiti gbananbuoli ki teni yin tua li puokpagili gbananbuoli? Kalam!

¹⁶ Yii bani ke yua n taani leni li puokpagili, tua gbananyendi leni o ka? Li diani: Bani nibilie baa tua gbananyendi.

¹⁷ Yua n taabi o Diedo tua yendo leni o.

¹⁸ Yin sani ki foagidi mani leni mi conconma. Tuonbiatoadi kuli ye ti gbanandi niinpo, ama yua n puni o yuli mi conconma po, tudi o gbanandi po yo.

¹⁹ Yii bani ke yi gbanandi tie U Tienu Fuoma Yua yua n ye yi niinni dieli, U Tienu n puni yi yua, ke yii go die yi yula?

²⁰ Moamoani o daa yi leni yaa dunga n pa. Lanwani, yin yaa kpiagidi U Tienu yi gbanandi nni.