1 Korenti 5 - U TIENU MAAMA TILI 2013

Ti cagindi Kilisiti Nitaanli siiga

¹ I kaani kuli bi niba tua ke ti cagindi ye yi siiga, yaa cagindi buolu n kaa ye ba bi nilanba siiga. Lani n tie ke yi siiga, yendo ye leni o baa pua.

² Ama ba yeni, yi gbengidi yi yula, kaa biidi yi pala ki mua i kumoe, ki ñani yi siiga yua n tieni laa cagindi.

³ Mini yaa po, ba ke n foagi leni yi n gbanandi nni, n ye leni yi n yantiali nni. N mali ki jia yua n tieni laa bonla yeni buudi, nani n ye leni yi yeni.

⁴ O Diedo yeli po leni o paalu po, yikuli yaa taani, nmoko ye leni yi n yantiali nni.

⁵ Yin teni laa nilo Sutaani, ke wan bolini o gbanandi ke o naano n tindi o Diedo Jesu n baa cua yaa daali.

⁶ Yin gbengidi yi yula maama yeni, laa ŋani. Yii bani ke li dabinli waamu bebe baa teni ti yonbudi kuli n pili yo?

⁷ Yin ñani mani yi siiga li dabinkpeli, ki tua nani ti yonbupandi yaadi n ki pia dabinli yeni. Moamoani yi tie laa yonbudi, kelima bi padi Kilisiti yua n tie ti Pendima jaanma pebiga no.

⁸ Lanwani, tin jaani laa jaanma ke laa tie leni li dabinkpeli, mi biadima dabinli bi leni ti cagindi dabinli. Ama tin jaani ma leni yaa dupen n ki pia dabinli, lani n tie li papienli leni i moamoani.

⁹ N den diani yi po li tili, ki waani yi ke yin da pia ŋantaadoba leni mi conconma danba.

¹⁰ Mii bagi ke yin da pia ŋantaadoba kuli leni ŋanduna yaaba ka. Bani, bi tie conconma danba, ŋaliŋabuaba, i janbi danba leni yaaba n ŋua i buli. Yi yàá bua ki yaa pia ŋantaado leni ba, se yin ña ŋanduna nni.

¹¹ Min den diani ki bua ki waani yi yaala tie line: yin da pia ŋantaado leni yua n yedi ke o tie yi kpiilo ki nan conbi, ki tie ŋaliŋabualo, ki ŋua i buli, ki sugidi bi niba, ki tie dañogaado yaa ka janbi daano. Yin da tuo ba ki taani ki je leni laa nibuolu.

¹² Naani niinpo yaaba buudi jiama tie n yaa tuonli yo? Yi ŋmiali nni buudi, yinba ka baa yaa ja ti?

¹³ Ama niinpo yaaba, U Tienu baa jia bi buudi. Deli mani ki ñani o nibiado yi siiga.