1 Korenti 4 - U TIENU MAAMA TILI 2013

Jesu tondiba n tie yaala

¹ Lanwani, li pundi ban yaa nua ti ke ti tie Kilisiti naacenba, U Tienu n puogi yaaba ban yaa wangi o bondoaginkaala.

² Bi yaa puogi o nilo li tuonli, ban lingi yaala o kani tie wan yaa tie nidugika.

³ Mini yaa po, yi yaa jia n buudi, laa tie n po liba. Li bali danba mo yaa jia n buudi, laa tie n po liba. Mini n ba mo ki ja n yuli buudi. N pali siedi mo ki bu leni nni liba kuli po.

⁴ Ama lani ka doagidi ke n pia moamoani, yua n ja n buudi tie o Diedo.

⁵ Lani yaa po, yin da ja ti buudi liba kuli po, hali ke li yogunu daa pundi. Yaa guu mani o Diedo cuama, wani yua n baa yendi yaala n wuo li biigili nni, ki go doagidi yaala n den wuo a pala nni. Lanyogunu, nilo kuli baa baa U Tienu kani lan pundi wan baa yaa pagidi.

⁶ N kpiiba, n maadi mini leni Apolosi maama na, nani mi kpanjama yeni, ke yin togidi tin tie maama, ki da tua japaadanba. Min maadi yaala tie ke yin da kpiagi niyendo ki fali o lielo.

⁷ Ŋme teni ke a cie a lieba? A pia be ke U Tienu ka puni a? Li yaa tie yeni, be n teni ke a kpiagi a yuli nani U Tienu ka puni a la yeni?

⁸ Moala, yi baa yin bua yaala kuli! Moala, yi tua piada! Yi cili ki dini li bali ke ti yaama ki taa lienni! N bi sugini yin je li bali moamoani, ke timoko n baa ki taani leni yi ki yaa die!

⁹ Ama li tie n po nani U Tienu n bili ke tinba o tondiba n yaa tie puoli yaaba, nani ban jia yaaba yaa buudi ke bi baa kpa yeni. Bi sieni ti asala nni, malekinba leni bi nisaaliba kuli nintuali.

¹⁰ Tinba, ti tie yanluodanba kelima wani Kilisiti po. Ama yinba wani tie yanfuodanba Kilisiti nni. Ti tadi, ama yinba wani pa. Bi kpiagi yinba, ama bi yuandi tinba.

¹¹ Hali moala ti ye leni mi koma, u ñuñuunu, ti cadi leni ti puadi, ki go tie lianliama.

¹² Ti tuuni leni ti nii hali ki coagi. Bi niba yaa sugidi ti, ti gaaliti ba. Bi yaa wangi ti fala, ti juuni.

¹³ Bi yaa kuli ti, ti guani ba mi madingima. Ti tie nani ŋanduna baadi yeni, ki tie nani bi niba kuli n lu yaala hali moala.

¹⁴ Mii diani yi po ki bua ki fiagi yi ka, ama n tuodi ki tundi yi, kelima yi tie n bibuadimu.

¹⁵ Lanwani, ba yi yaa pia gobidikaaba tuda piiga (10 000) Kilisiti nni, yii pia baanba wani boncianla. Mini n den mali yi Jesu Kilisiti nni, min den cuani yi po o Laabaaliŋamo yaa yogunu.

¹⁶ Lanwani, n mia yi, ki tundi yi, yin yaa ŋua n yaa fuuli.

¹⁷ Lani yaa po yo, ke n soani Timote, yua n tie n bibuadiga ki tie nidugika o Diedo nni, yi kani. O baa tiadi yi min ŋua Kilisiti maama, nani min bangi Kilisiti Nitaana ya n ye i kaani kuli maama.

¹⁸ Yi siiga bi nitianba fiini ti japaadi, ki tama ke n kan go cua yi kani.

¹⁹ Ama, o Diedo yaa bua, n baa cua yi kani ke li kan waagi. Lanwani, n kan bandi bi japaadanba yeni n maadi yaa maama bebe ka, n baa bandi ban pia yaa paalu n tie yu.

²⁰ U Tienu diema naa doagidi mi maama nni bebe ka, ama u paalu nni.

²¹ Yi bua be? Min cua yi kani leni u fibu bi? Bi min cua leni mi buama leni li padingile?