1 Korenti 3 - U TIENU MAAMA TILI 2013

U Tienu naacenba

¹ N kpiiba, mii den fidi ki maadi leni yi nani yi tie U Tienu Fuoma Yua n die yaaba, ama n den maadi leni yi nani yi da ŋua li nisaali-yantiali, nani a canpanda yeni Kilisiti nni.

² N den ñundi yi mi naaŋanma yeni, ki naa tendi yi yaa jiema n juagi, kelima yi kan den fidi ki gaa ma. Baa moala yi daa fidi ki gaa ma, kelima yi da ŋua li nisaali-yantiali.

³ Nani li nunponli leni li koanli n da ye yi siiga yeni, laa doagidi ke yi ŋua li nisaali-yantiali, ki tiendi nani bi nisaaliba n tiendi maama ka?

⁴ Yaa yogu ke yi siiga one tua: «Mini wani n ŋua Poli,» ke one mo tua: «Mini wani n ŋua Apolosi,»

⁵ yii ŋua li nisaali-yantiali ka? Apolosi tie ŋme? Poli tie ŋme? Ti tie o Diedo naacenba bebe, yaaba n den cuani yi po o Laabaaliŋamo, ke yi daani nani o Diedo n puogi yuakuli maama.

⁶ Mini n den buli ke Apolosi mo den kpidi. Ama U Tienu n teni ke li kpedi.

⁷ Lanwani, yua n buu ki tie puu, yua n kpidi mo ki tie puu, kali U Tienu yua n tendi ke li kpedi, wani n tie likuli.

⁸ Yua n buli leni yua n kpidi kuli de yenma, yuakuli baa baa o panpaani nani o tuonli n tie maama.

⁹ Kelima ti taa ki tuuni leni U Tienu. Yinba n tie U Tienu kuanu. Yi go tie U Tienu diegu.

¹⁰ Nani U Tienu n puni nni yaa ŋanbili po, n den puu li tanpuuli nani o diemaa-yanfuodaano yeni, ke nitoa mo ŋuandi lipo. Die yuakuli n fangi o yuli leni wan ŋuandi lipo maama.

¹¹ Kelima oba kuli kan go puu tanpuutoali, ke laa tie yaali n mali ki puu, lani n tie Jesu Kilisiti.

¹² O nilo yaa ŋuani laa tanpuuli po wula, yaa ka ŋanjilifa, yaa ka yaa tana yaa dunga pa, yaa ka ti daadi, yaa ka ti muadi, yaa ka a kankaga, yuakuli tuonli n tie yaali baa doagidi,

¹³ kelima ti buudi daali baa waani la. U mu baa doagidi yuakuli n soani yaala. U baa biigi yuakuli tuonli ki waani lani n tie yaala.

¹⁴ Yuakuli n ŋuani yaala li tanpuuli yuli po yaa fidi ki ñani u mu biigima nni kaa buodi, o baa baa i panpaani.

¹⁵ Ama yua yaa tuonli n buodi, o baa luo i panpaani. O baa faabi, die nani yua n sani ki ñani u mu nni ki cia yeni.

¹⁶ Yii bani ke yi tie U Tienu diegu ke o Fuoma ye yi niinni yo?

¹⁷ Yua n bolini U Tienu diegu kuli, U Tienu baa bolini o. U Tienu dieli gagidi ki ŋani, yinba n tie laa dieli.

¹⁸ Oba kuli n da boandi o yuli. Yi siiga oba yaa tama ke o tie o yanfuodaano nani ŋanduna n nua maama, wan tua yanluodaano ke wan baa ki tua o yanfuodaano.

¹⁹ Kelima ŋanduna na yaa yanfuoma tie yanluoma U Tienu po. Li diani yeni ki yedi: «O co bi yanfuodanba bi nunfanbu nni.»

²⁰ Li go diani ki yedi: «O Diedo bani bi yanfuodanba yanmaalima. O bani ke mi tie fanma fanma.»

²¹ Lanwani, oba kuli n da jigini o yuli bi nisaaliba po. Li bonla kuli tie yi yaa yaala.

²² Li yaa tie Poli, li yaa tie Apolosi, li yaa tie Sefa, li yaa tie ŋanduna, li yaa tie li miali, li yaa tie mi kuuma, li yaa tie yaa yogunu n tie ne, li yaa tie yaa yogunu n baa ti cua, likuli tie yi yaa yaala.

²³ Yimo tie Kilisiti yaaba. Kilisiti mo tie U Tienu yaa yua.