1 Korenti 1 - U TIENU MAAMA TILI 2013

I fuondi leni Korenti Kilisiti Nitaanli yema 1—6 I fuondi

¹ Mini Poli, U Tienu n den yini yua, kelima o yanbuama po, ke min tua Jesu Kilisiti tondo, n taani leni ti kpiilo Sositeni

² ki diani li tili U Tienu Nitaanli, yaali n ye Korenti dogu nni po. O den gagidi ki ŋanbi yi Jesu Kilisiti nni, ke yin yaa tie o nigagidiŋanba. N fuondi yi leni yaaba n jaandi ki miadi ti Diedo Jesu Kilisiti i kaani kuli, wani yua n tie bi Diedo leni ti yaa Diedo.

³ Ti Baa U Tienu leni o Diedo Jesu Kilisiti n pa yi li ŋanbili leni mi yanduanma.

Tin baa yaa seli Kilisiti nni

⁴ Yogunu kuli n tuondi U Tienu yi po, kelima yin baa yaa ŋanbili o kani Jesu Kilisiti nni.

⁵ O yaa niinni, yi den baa li seli li bonla kuli nni, lan tie mi maama leni mi bancianma kuli po.

⁶ Lani n tie ke yin den gbadi yaa siedi Kilisiti po, den puu ki go se yi siiga ki pa.

⁷ Yeni U Tienu paabu kuli siiga, ba bonyenbu ki poadi yi po, yin guu ke U Tienu baa doagidi ti Diedo Jesu Kilisiti yaa yogunu.

⁸ Wani U Tienu n baa teni yin yaa se ki pa hali mi juodima yogunu, ke ban da fidi ki kuli yi leni liba kuli, ti Diedo Jesu Kilisiti cuama daali.

⁹ U Tienu tie tin fidi ki dugi yua yaa po, wani yua n den yini yi ke yin yaa pia yanyenma leni o Bijua Jesu Kilisiti ti Diedo.

Mi paadima Kilisiti Nitaanli siiga

¹⁰ N kpiiba, n mia yi ki go tundi yi, kelima ti Diedo Jesu Kilisiti yeli po, ke yikuli n yaa mani leni yiyaba, ke paadimiba kuli n da ye yi siiga. Lani n tie yin yaa taa yenma yi yantiana leni yi jaga kuli nni.

¹¹ N kpiiba, Kilowe diegu yaaba den waani nni ke mi niama ye yi siiga.

¹² Min bagi yaala tie ke yi siiga one tua: «Mini wani n ŋua Poli,» one: «Mini wani n ŋua Apolosi,» one: «Mini wani n ŋua Sefa,» one mo: «Mini wani n ŋua Kilisiti.»

¹³ Naani Kilisiti boagidi yo? Naani bi den kpaa Poli yo li dapoanpoanli po ki baa faabi yi? Bi, bi den batisi yi Poli yeli po yo?

¹⁴ N tuondi U Tienu ke mii den batisi yi siiga oba kuli, kali Kilisipusi leni Gayusi.

¹⁵ Lanwani, oba kuli kan yedi ke bi den batisi o mini yaa yeli po.

¹⁶ Moamoani, n den batisi Sitefana leni o deni yaaba moko, mii tiani n yaa go den batisi nitoa.

¹⁷ Kilisiti naa den soani nni ke min batisi bi niba ka. Ama o den soani nni ke min yaa wangi o Laabaaliŋamo, ke laa tie min yaa wangi o leni mi yanfuodanmaama ka, ke Kilisiti dapoanpoanli n da tua fanma.

Kilisiti tie U Tienu paalu leni o yanfuoma

¹⁸ Li dapoanpoanli yaa mawangima tie yanluoma yaaba n baa bodi po. Ama tinba yaaba n tindi po, li tie U Tienu paalu.

¹⁹ Li diani ki yedi: «N baa bolini bi yanfuodanba yanfuoma, Ki biani bi nunfandanba nunfanbu.»

²⁰ Lanwani, o yanfuodaano ye le? Li bali maama bando go ye le? U naa yogunu nianiado go ye le? Naani U Tienu ki doagidi ke ŋanduna yanfuoma kuli tie mi yanluoma ka?

²¹ Bi nisaaliba leni bi yaa yanfuoceli naa fidi ki bandi U Tienu leni wan doagidi o yanfuoma maama. Lanwani, U Tienu den jagi ke o baa faabi yaaba n daani leni o Laabaaliŋamo wangima, yaama n tie nani mi yanluomaama yeni.

²² Jufinba miadi mi bancianma, Girekinba mo lingi mi yanfuoma.

²³ Ama tinba wani wangi Kilisiti, ban den kpaa yua li dapoanpoanli po. Laa maama tie tingbali bonla Jufinba po, ki tie yanluoma mo bi nilanba po.

²⁴ Ama U Tienu n yini yaaba po, ban tie Jufinba bi ban tie Girekinba, Kilisiti tie U Tienu paalu leni U Tienu yanfuoma.

²⁵ U Tienu yanluoma fani ki cie bi niba yanfuoma, U Tienu tadingu mo pa ki cie bi nisaaliba yaa paalu.

²⁶ N kpiiba, kpaagi ki le yin tie yaaba. Yi siiga yaaba n tie yanfuodanba naa yabi, yaaba n tie paatieba leni bulicinba moko naa fuu.

²⁷ Ama U Tienu gandi bi nisaaliba n nua yaala ke li tie yanluobonla, ki baa waani bi yanfuodanba i fe. O gandi bi nisaaliba n nua yaala ke li tie tadinbonla, ki baa waani bi paatieba i fe.

²⁸ O gandi bi nisaaliba n nua yaala ke li tie bonfanla ki fali la ke laa tie puu, ki baa bolini ban nua yaala ke li tie bonmoanla.

²⁹ O tieni yeni ke nisaaloba kuli n da kpiagi o yuli wani U Tienu kani.

³⁰ Ama yinba, U Tienu teni ke yi ye Jesu Kilisiti nni. O go teni ke Jesu tie ti po mi yanfuoma, mi teginma, mi gagidiŋanma leni mi daafaabima.

³¹ Lanwani, nani lan diani maama: «Yua n bua ki jigini o yuli, Wan jigini o yuli o Diedo nni.»