1 Jan 5 - U TIENU MAAMA TILI 2013

Tin paadi ŋanduna maama

¹ Yua n daani ke Jesu tie U Tienu n Gandi Yua, tie U Tienu biga. Yua n bua ki biga baa kuli baa bua o biga mo.

² Yaala n baa teni tin yaa bani ke ti bua U Tienu bila tie line: Ti yaa bua U Tienu ki go tiendi o bali maama n yedi yaala.

³ Mi buama U Tienu po tie line: Tin yaa kubi o bali maama. O bali maama yeni naa tie tugikpiagili,

⁴ kelima U Tienu n mali yua kuli paani ŋanduna. Yaala n teni ke ti paani ŋanduna tie ti dandanli.

⁵ Ŋme paani ŋanduna? Li tie yua n daani ke Jesu tie U Tienu Bijua.

Yaa siedi n tieni Jesu Kilisiti po

⁶ Jesu Kilisiti tie yua n den cua leni mi ñima leni mi soama. Waa den cua leni mi ñima bebe ka, o den cua leni mi ñima leni mi soama. Mi Fuoma n tiendi siedi lipo kelima mani mi Fuoma yeni n tie i moamoani.

⁷ Bi tie bi taa yaaba n tiendi siedi:

⁸ Lani n tie U Tienu Fuoma Yua, mi ñima leni mi soama, ke bani bonbitaa yeni kuli siedo tie yenma.

⁹ Ti yaa saa i moamoani bi nisaaliba n tieni yaa siedi po, U Tienu n tieni yaa siedo cie, kelima li tie wan tieni yaa siedo o Bijua po.

¹⁰ Yua n daani U Tienu Bijua pia laa siedi o niinni. Ama yua n naa daani U Tienu, o yedi ke U Tienu pua faama, kelima waa daani U Tienu n tieni yaa siedi o Bijua po.

¹¹ Laa siedi n tie ne: U Tienu puni ti yaa miali n kan gbeni, laa miali ye o Bijua niinni.

¹² Yua n pia U Tienu Bijua pia li miali, yua n ki pia U Tienu Bijua, waa pia miali.

Yaa miali n kan gbeni

¹³ N diani yi po lani ke yinba yaaba n daani U Tienu Bijua yeli nni n yaa bani ke yi pia yaa miali n kan gbeni.

¹⁴ Tin pia yaa dugidi U Tienu kani tie tine: Tin mia yaala ke li tie o yanbuama bonla kuli, o cengi ti.

¹⁵ Ti yaa bani ke o cengi timo, ti go bani ke ti pia tin mia o yaala.

¹⁶ O nilo yaa laa ke o kpiilo tiendi yaa tuonbiadi n kan juodi mi kuuma, wan jaandi o po, U Tienu baa pa o li miali. Li tie yaaba n tieni yaa tuonbiadi n kan juodi mi kuuma yaa maama. Li pia yaa tuonbiadi n baa juodi mi kuuma. Laa tie laa tuonbiadi yaa po ke n yedi ban jaandi.

¹⁷ Yaala n ki tiegi kuli tie tuonbiadi. Ama ti tuonbiadi buolu ye, yaadi n kan juodi mi kuuma.

¹⁸ Ti bani ke U Tienu n mali yua, waa tiendi tuonbiadi, kelima U Tienu Bijua kubi o ke o Biado kan sii o.

¹⁹ Ti bani ke ti tie U Tienu yaaba, ki go bani ke o Biado diedi ŋanduna kuli.

²⁰ Ti go bani ke U Tienu Bijua cua ki puni ti mi yanfuoma ke tin bandi yua n tie o Moamoandaano. Ti ye o Moamoandaano niinni ki go ye o Bijua Jesu Kilisiti yaa niinni. Wani n tie U Tienu i moamoani leni yaa miali n kan gbeni.

²¹ N bibuadimu, fangi mani yi yula leni i buli.