1 Jan 4 - U TIENU MAAMA TILI 2013

Ki bandi yaala n ñani U Tienu kani

¹ N buakaaba, yin da dugi mani yaaba n yedi ke bi pia U Tienu Fuoma Yua kuli po. Ama yin biigi ba ki bandi bi yaa pia U Tienu n puuni yaa Fuoma, kelima bi saawalipua-faadanba boncianla yadi yadi ŋanduna nni.

² Line n baa teni yin bandi yua n pia U Tienu Fuoma Yua: Yua n tuo ke Jesu Kilisiti den cua ki tie nisaalo kuli pia U Tienu Fuoma Yua.

³ Yua n nia ke Jesu ki den tie nisaalo kuli, waa pia U Tienu Fuoma Yua. Ama o pia Kilisiti yieka yaa yantiali. Yi den gbadi ke Kilisiti yieka baa cua, baa moala o ye ŋanduna nni.

⁴ N bibuadimu, yi tie U Tienu yaaba. Yi paadi bi saawalipua-faadanba, kelima yua n ye yi niinni pia u paalu ki cie yua n ye ŋanduna nni.

⁵ Bani, bi tie ŋanduna yaaba, lani n teni bi maama tie ŋanduna yaama, ŋanduna yaaba mo cengi ba.

⁶ Ama tinba wani tie U Tienu yaaba. Yua n bani U Tienu kuli cengi ti maama. Yua n kaa tie U Tienu yua kuli, waa cengi ti maama. Lani n teni ke ti bani i moamoani Fuoma leni mi tuofaama gagidima.

Mi buama leni li dandanli koanli 4.7—5.21 U Tienu tie buama

⁷ N buakaaba, tin yaa bua mani tiyaba, kelima mi buama ña U Tienu kane. Yua n pia mi buama kuli, U Tienu mali o, omo bani U Tienu.

⁸ Yua n ki pia buama daa bani U Tienu, kelima U Tienu tie buama.

⁹ U Tienu n den doagidi o buama ti po maama n tie line: U Tienu den soani o Bijayenyenga ŋanduna nni ke tin yaa pia li miali kelima o po.

¹⁰ Mi buama yeni naa tie ke tinba ka den bua U Tienu, ama mi tie ke wani n den bua ti, ki soani o Bijua ke o tua i candanbaani padili ti yaa tuonbiadi po.

¹¹ N buakaaba, U Tienu yaa bua ti yeni, li pundi timo n yaa bua tiyaba.

¹² Oba kuli daa laa U Tienu, ama ti yaa bua tiyaba, U Tienu ye ti niinni, o buama moko ye ti niinni ki dagidi cain.

¹³ Line n teni ke ti bani ke ti ye o niinni ke omo ye ti niinni: Lani n tie ke o puni ti o Fuoma.

¹⁴ Tinba n den laa ki tiendi siedi ke Baa soani o Bijua, ke o tie ŋanduna Candaano.

¹⁵ Yua n tuo ke Jesu tie U Tienu Bijua kuli, U Tienu ye o niinni, omoko ye U Tienu yaa niinni.

¹⁶ Tinba, ti bani U Tienu n pia ti po yaa buama, ki dugi mi po. U Tienu tie buama. Yua n ye mi buama nni ye U Tienu niinni, U Tienu mo ye o niinni.

¹⁷ Diidi mi buama n ŋanbi cain ti niinni maama, ke ti baa fidi ki yaa pia li papaali li bujiali daali. Nani wani Kilisiti n tie maama, timoko tie yeni ŋanduna nni.

¹⁸ Mi buama naa pia ti jawaandi. Yaa buama n ŋani cain deli ki ñani ti jawaandi, kelima ti jawaandi ye kelima u cuonu n ye. Ti jawaandi n pia yua daa pia mi buama ke li dagidi.

¹⁹ Tinba, ti bua o kelima wani n den kpa bua tinba.

²⁰ O nilo yaa tua ke o bua U Tienu, ki nan nani o kpiilo, o tie tuofaadaano, kelima yua n naa bua o kpiilo wan nua yua, o baa gaa lede ki bua U Tienu wan ki nua yua.

²¹ Tin baa Kilisiti kani yaa bali maama tie mine: Li pundi ke yua n bua U Tienu n yaa bua o kpiilo moko.