1 Jan 2 - U TIENU MAAMA TILI 2013

Kilisiti ti Candanbaalo

¹ N bibuadimu, n diani yi po yaala n tie ne ke yin da tieni tuonbiadi. Yi siiga nilo yaa tieni tuonbiadi, ti pia o candanbaalo ti Baa U Tienu kani. Lani n tie Jesu Kilisiti o niteginka.

² Wani n tie i candanbaani padili ti tuonbiadi po. Laa tie ti yaa tuonbiadi bebe po ka, ama ŋanduna yaaba kuli yaa tuonbiadi po.

³ Yaala n baa doagidi ke ti bani U Tienu n tie line: Ti yaa kubi o bali maama.

⁴ Yua n tua: «N bani o,» ki naa kubi o bali maama, o tie tuofaadaano, i moamoani naa ye o niinni.

⁵ Ama yua n kubi o maama, U Tienu buama ye o pali nni moamoani, ki dagidi cain. Yeni, ti bani ke ti ye o niinni.

⁶ Li ŋani ke yua n yedi ke o ye o niinni n yaa cuoni nani wani o Diedo n den cuoni maama.

U Tienu bali mapanma

⁷ N buakaaba, mii diani yi po li bali mapanma ka, mi tie li bali makpelima, yin pia yaama hali mi cilima. Li bali makpelima yeni tie yin den gbadi yaa maama.

⁸ Ba yeni, n diani yi po li bali mapanma, yaama n doagidi Kilisiti niinni leni yi yaa niinni, kelima li biigili pendi, ke mi yenmoanma mo yendi.

⁹ Yua n tua ke o ye mi yenma nni, ki nan nani o kpiilo, o da ye li biigili nne.

¹⁰ Yua n bua o kpiilo, o ye mi yenma nni, tingbali bonla ki ye o niinni.

¹¹ Ama yua n nani o kpiilo ye li biigili nni. O cuoni li biigili nni, kaa bani wan caa naankani, kelima li biigili teni ke o joa.

¹² N bibuadimu, n diani yi po kelima yi baa yi tuonbiadi sugili, kelima Jesu yeli po.

¹³ Yinba bibaanba, n diani yi po kelima yi bani yua n ye hali mi cilima. Yinba bi nipanba, n diani yi po kelima yi paadi o Biado.

¹⁴ Yinba a biwaala, n den diani yi po kelima yi bani Baa. Bibaanba, n den diani yi po kelima yi bani wani yua n ye hali mi cilima. Bi nipanba, n den diani yi po kelima yi pia u fidu, U Tienu maama mo ye yi niinni, yi go paadi o Biado.

¹⁵ Yin da bua mani ŋanduna leni yaala n ye lienni. Yua n bua ŋanduna, waa pia buama Baa po, o pali nni.

¹⁶ Yaala n ye ŋanduna nni kuli, ti gbanandi bonbuakaala, i nuni bonbuakaala leni mi yema japaadi, laa ñani Baa U Tienu kani, die li ñani ŋanduna nne.

¹⁷ Ŋanduna pendi, o bonbuakaala moko pendi, ama yua n tiendi U Tienu yanbuama baa yaa ye hali yaa yogunu kuli.

Kilisiti yiekaaba ye yi siiga

¹⁸ Yinba n bila, mi juodima yogunu nagini. Yi gbadi ke Kilisiti yieka baa cua. Ba moala Kilisiti yiekaaba ye boncianla. Lani yaa po, ti bani ke mi juodima yogunu nagini.

¹⁹ Kilisiti yiekaaba yeni ñani ti siiga, ama baa tie ti siiga yaaba, kelima bi yaa bi tie ti siiga yaaba, bi bi baa yaa ye leni ti. Ama ban ñani ti siiga yeni, doagidi ke bikuli naa tie ti yaaba.

²⁰ Ama yinba wani, yi baa U Tienu Fuoma Yua, yua n teni ke yikuli bani i moamoani.

²¹ Min den diani yi po yeni, laa tie ke yii bani i moamoani ka, ama yi bani i moamoani, ki go bani ke faamiba kuli ki ñani i moamoani kani.

²² Ŋme n tie o tuofaadaano, kali yua n nia ke Jesu ki tie U Tienu n Gandi Yua? Wani n tie Kilisiti yieka, wani yua n nia Baa leni Bijua.

²³ Yua n nia Bijua kuli, nia Baa moko, yua n daani Bijua kuli, o pia Baa moko.

²⁴ Yinba yaa po, li ŋani yin den gbadi yaala hali mi cilima n yaa ye yi niinni. Li yaa tie ke yin den gbadi yaala hali mi cilima ye yi niinni, yimoko baa yaa ye Bijua leni Baa niinni.

²⁵ Wan niani ti yaala tie yaa miali n kan gbeni.

²⁶ N den diani yi po mi naa maama, kelima yaaba n bua ki yaani yi po.

²⁷ Ama yinba wani, yin den baa o kani yaa Fuoma Yua yeni, ye yi niinni, laa go tie tiladi ban bangi yi. Mi Fuoma yaama n bangi yi li bonla kuli, tie moamoandaano, kaa tie faadaano. Lani yaa po, yin yaa ye o niinni nani wan bangi yi maama.

²⁸ Lanwani, n bibuadimu, yin yaa ye o niinni, ke wan baa doagidi yaa yogunu, tin yaa pia li papaali, ke o guacuama daali, n da tua ti po fe.

²⁹ Yi yaa bani ke o tiegi, yin bandi ke yua n tiendi yaala n tiegi kuli, tie wan mali yua.