Zakariya 9 - Bhibhiliya Nya Guage

GIPANDRE NYA WUVILI Gulamudwa ga mayigo nya vaakelane

¹ Gulamula ga Pfhumu Nungungulu mayelano khu litigo la Hadharaki ni Dhamasiko, a gu wulanga waye nya guhefemule avbo; kholu maho ya Pfhumu Nungungulu ma gu wona vathu vatshavbo kha nga idzo a kheviselago khidzo mahundzu ya Israyeli.

² Womo gambe vbatshani ga Hamati, gu guromo vbinganoni navo, Tiro ni Sidhoni, ambari va tadego khu guti nya guete.

³ Tiro a dzi vbahede makhokhola, a wuya a wungedzela parata kha nga mafu, ni ndralama kha nga maraga ya mudzindzilani.

⁴ Aholu, Pfhumu a na mu wandrela lidhoropa, a dzudzuga phwani thomba yaye, a yi tsagamisa khu nilo

⁵ Asikeloni a na si wona a tala khu hwanga ni Gaza nuye a na tedwa khu rerema gu fanana ni Ekoroni, kholu gutumba gwawe gu na bani gu vbede; Gaza a na luzegedwa khu mufumeli waye, ni Asikeloni gu na khala giwula nyambana muthu.

⁶ Aholu va nata vathu va nga velegedwa wubhayini va ta vbaha Asidhodhi, Eni nyi na pfhungumula matshandza ya Vafilistiya.

⁷ Nyi na va gambisa novba nya miphaso khu maganani gwawe va phaselago sithombe, nyi dusa gunyenyeza gwatshavbo khu magwahani gwawe; uye a na tshalago a na khala nga tshaledwa wa Nungungulu wathu; a na khala muthangeli wa tigoni ga Judha, gu na girwa Ekoroni kha nga iso si nga giregago ga Vajebhusi.

⁸ Eni mune furi, nyi na ta khala nyangwatunu nya nyumba yangu nyi ghadha, gasi yi si phangwi khu valala, gu si manegi ni muthu nya gu tsemakanye, ni muthu nya guwuye gasi gu si manegi gambe mutshanisi nya gutshanise vathu vangu; kholu eni mune furi nyi ngu si wona khu maho yangu.

Mufumo wu resago gurula

⁹ Nengela ngudzu uwe nyamahegyane wa Siyoni; womba kulungwane nya gutsake uwe nyamahegyane wa Jerusalema; wona, Mufumeli wago a nguta gwago, uye a lulamide gambe Muvbanyisi, gisiwana, a nguta na khilede buru, avbo nya giburwana, gyanana nya buru nya ngadzi.

¹⁰ Nyi na pfhungumula dzikareta nya nyimbi dza Efrayimi ni dzikavalu dza Jerusalema; wulaho nya nyimbi wu nata fanyeledzedwa. Uye a na huwelela gurula ga mayigo; mufumo waye wu na khugela yiphwa kala yimbe yiphwa; wu na khugela tsongoni wa Ewufrate kala mahegiso nya mafu.

Gutshulega ni gupala

¹¹ Gasi uwe, khu kotani nya novba nya gidzumeledzwano gyangu nago, nyi na tshudzisa sibotshwa sago khu namboni nyambana mati.

¹² Bwelelani likhokholani gwanu enu sibotshwa, mu tadego khu gutumba; muhuno nyi ngu tivisa gukheni nyi na mi bweledzela satshavbo khu nyondro mbili.

¹³ Kholu Eni nyi na ghwimba Judha kha nga wulaho, nyi khwandra Efrayimi kha nga giholoma; nyi na kutsedzela sanana sago uwe Siyoni, guya wugela sanana sago, uwe Gresiya! Uwe Siyoni u na fanana ni litshari la ndrena nya gukari.

¹⁴ Pfhumu Nungungulu a na dzi wonegisa ga vathu vaye, sighalala saye si na duga na si gu khedziga kha nga gulasa; Mune, Pfhumu Nungungulu a na womba pundru, a gimbila khu vbakari nya gipupwane nya gute khu Marandzi.

¹⁵ Pfhumu Nungungulu nya Tshivba Yatshavbo a na vhikela vathu vaye, a na mbembisa valala vaye, va gandredzela siwindri nya gundziwitedwe; va na sela novba wa valala vawe va gira ligwaha kha nga vathu va levidego khu vbinyu; kha nga novba nya sirengo wu tadzago dzimbiya nya miphaso, va mitegedzela kha nga mati dzikhonani nya giluvelo.

¹⁶ Khu litshigu lolo, Pfhumu Nungungulu wawe a na vbanyisa vathu vaye, kha nga tshambi waye; kholu va na khedziga tigoni gwawe kha nga siwindri nya lisima vbagihugutunu nya wufumu.

¹⁷ Kholu wudhumo wawe wu na bani wuri wukhongolo ngudzu! Ni gumbura gwawe gu na bani guri gukhongolo ngudzu! Tirigu ni wuuvha nya dosi si na dandrisa madzaha ni dzimbiri.