Zakariya 10 - Bhibhiliya Nya Guage

Situmbiso ga va na Israyeli

¹ Lombani ndzadzi ga Pfhumu Nungungulu gikhatini nya gilimo, kholu Uye khuye a girago mabara ni gulasa ni gu wisa dzindzadzi nya dzikhongolo, yi nonisa wulime, a ninga ga moyo ni moyo mihandro ya thembweni gwaye.

² Kholu sihuru nya mipaso ya ndrangani kha si ganeli gilo nya gupwale; va nya dzisolo va gu lola malipha; va nya miloro va gulora ni gutshamusela silo nyambaya khumo; va tangadzisa khu silo nyambana gighelo. Khu kharato, vathu va gu pengiswa kha nga tshambi nya dzinvuta, va tshaniseka khu gumbana muhavisi.

Gutshulega ni guwuya ga Israyeli

³ Likhulo langu la gu vbisela vahavisi, eni nyi na tsayisa vathangeli; aholu Pfhumu Nungungulu nya Tshivba Yatshavbo a nata sayisa tshambi waye, a gu vathu va Judha, a nga va gira kha nga kavalu yaye nya tshivba nyimbitunu.

⁴ Khavbo ga Judha gu na duga giwindri nya gutiye gi vegwa vbakhonatunu; khavbo gwaye gu na duga lidingo nya tshatsha; khavbo gwaye gu na duga wulaho nya nyimbi; khavbo gwaye gu na duga vafumeli vatshavbo khu gumogo.

⁵ Na va patane vatshavbo va na fanana ni dzindrena nyimbitunu dzi gandredzelago valala maragani ya dzindzilani; kholu Pfhumu Nungungulu womo vbakari gwawe, aholu a na thela dzitshoni vale va khiledego dzikavalu.

⁶ Nyi na ninga tshivba nyumba ya Judha, nyi wuya nyi vbanyisa nyumba ya Josefa, eni nyi na va wuyisa nyaluphye, kholu nyi ngu va pwela wusiwana. Va na gira gukhwatshi gima kha nya nga va diga, kholu eni kheni Pfhumu Nungungulu wawe, nyi na va ninga phindrulo.

⁷ Va na Efrayimi va na khala kha nga ndrena, myonyo yawe yi na nengela gukhwatshi va di sela vbinyu. Ina, sanana sawe si na wona satshavbo sesi, si nengela. Myonyo yawe yi na tsakela Pfhumu Nungungulu.

⁸ Nyi na womba ndrodzi nyi va tshanganisa nyaluphye, kholu nyi va dzegiside; va na wuya gambe va tala kha idzo va nga bani varomo khidzo guhegulani.

⁹ Nyi na va phalalegisa vbakari nya mahundzu, khu mayigoni ga hwindzo va na nyi dundruga, va na vbanya gumogo ni sanana sawe, khu hwane va na wuya.

¹⁰ Nyi na va gira va wuya khu tigoni ga Egipito, nyi na va tombanisa va duga tigoni ga Asiriya, nyi na va dzega nyi va yisa tigoni ga Gileyadhi ni Libhanoni, ga avo gu na bani guri mwalo wulanga nya guenele.

¹¹ Avo va na tsemakanya yiphwa nya sitshaniso, a na veta mavimbi nya yiphwa, milondrwa nya guete nya tsongo wa Nilo yi na banga. Khavbo avbo, ma na vbela matshandza yatshavbo ya Asiriya, yi duswa ni ndranga nya wufumu wa Egipito.

¹² Eni nyi na va tiyisa tshivbani ga Pfhumu Nungungulu, va na gimbila linani gwangu; a ngu ganela Pfhumu Nungungulu.