Varoma 6 - Bhibhiliya Nya Guage

Gufa ga gighoho hifela guvbanya ni Kristo

¹ Hi na khethu ginani olu? Hi na simama guvbanya gighohoni gasi wu engedzelana wuhigo, gani?

² Khandridzo, gima kha hi na gira kharato! Ethu hi fudego khu kota nya gighoho, hi na dzi kodza gambe kharini gu simama hi vbanyela mugighohoni?

³ Ina kha mu dzitini nya gukhenu ethu hatshavbo hi bhapatisidwego ga Jesu Kristo, hi bhapatisidwe gambe naye gufani gwaye, gani?

⁴ Khu gu bhapatiswa hi dzingidwe gumogo ni Kristo, hi gu hengela naye gufani gwaye. Gasi hi dzi kodza nethu gu vbanya khu mavbanyelo nya maphya nya nga ya Kristo a wugidego khu ga vafudego khu tshivba ya Nungungulu Babe.

⁵ Kholu, nya nga olu hi tshanganisidwego ni Kristo khu gufa nya nga ogu gwaye, kharati gambe hi na hengela naye guwuga khu ga vafudego.

⁶ Hi ngu dziti gwadi gukhethu muthu wathu wa gale fude gumogo ni Kristo vbagihambanotunu, gasi gu pfhungumudwa guvivba gwatshavbo hi nga bani hiri nago, hifela gu tshulega wugumbini nya gighoho.

⁷ Kholu muthu a fudego tshulegide wugumbini nya gighoho.

⁸ Ha gu bani hi fude gumogo ni Kristo, hi ngu khodwa gukhethu hi na vbanya gambe naye.

⁹ Hi ngu dziti nya gukhethu Kristo a wugidego khu ga vafudego, gima kha na ngafa gambe. Gufa gu mwalo gambe tshivba avbo gwaye.

¹⁰ Na fude, Kristo fude gumogo basi a gu pala gighoho gasi khu guvbanya a gu nago olu, a gu vbanyela Nungungulu.

¹¹ Kharato nenu, dzi gireni kha nga vathu va fudego va gu hambana ni gighoho, aholu, va vbanyago gumogo ni Kristo, va gu vbanyela Nungungulu.

¹² Mu nga dzumedzisi gambe gighoho gi fuma givilini gwanu nya gufe, gi mi kutsedzela gu landrisa gudogorela gwaye.

¹³ Mu nga ningelini ga gighoho sivbango nya givili gyanu mu si girani silo nya guthumele guvivba. Aholu, dzi ningeleni ga Nungungulu nga vathu va tshatugidego gufa va gu mana guvbanya. Dzi ningedzeleni wurumba wanu gu thumela Nungungulu, mu dzi gira sivbango nya guthumele silo nya gululame.

¹⁴ Kha gu vbwetegi gighoho gi fume gambe gwanu, kholu enu kha mu vbanyi gambe vbavbatshi nya Nayo, aholu mwa gu vbanya wuhigoni gwa Nungungulu.

Dzikhumbi dza Nungungulu

¹⁵ Hi na khethu ginani olu? Hi na dzi ningedzela gighohoni khu gukhethu kha hi ngu gu rumwa gambe khu Nayo, ha gu rumwa khu wuhigo wa Nungungulu, gani? Khandridzo, gima kha hi na gira kharato.

¹⁶ Ina kha mu dzitini gukhenu mwa gu dzi gira dzikhumbi dza muthu, gu vbwetega mu landrisela milayo ya wule mu mu thumelago, gani? Khidzo gambe kharato: Mwa gu dzi ningela ga gighoho, mu na mana gufa; gasi mwa gu dzi ningela ga Nungungulu mu na mana guvbanya nya wuhengeli naye.

¹⁷ Khu guralo, a na bongwe Nungungulu! Kholu enu gale mu nga bani muri dzikhumbi nya gighoho, olu mu ngu landrisa khu myonyo yanu yatshavbo ndzila nya sihevbudzo mu hakhidego.

¹⁸ Mu tshudwe wugumbini nya gighoho, gasi mu khale sithumi nya ndzila nya gululame.

¹⁹ Nya gu ganela kharati khu maganelelo nya wuthu khu gu dziti gukheni si ngu mi garadzela gu si pima silo sesi. Gale mu di dzi ningela gu khala dzikhumbi nya wubhayi ni guvivba gwatshavbo mu fela guthuma mithumo nya guvivbe. Olu dzi ningeleni gambe khu monyo watshavbo gu thumela gululama, mu fela gu agiswa.

²⁰ Na mu ngari wugumbini nya gighoho, mu diri mwalo giguruvedzo nya guthumele gululama.

²¹ Aholu, giphaso muni mu gi manidego khu gu thumani silo, muhuno si mi thelago dzitshoni? Mahegiso nya mithumo yoyo khu gufa.

²² Gasi olu, na mu tshulegide wugumbini nya gighoho, mwa gu thumela Nungungulu. Giphaso mu gi manago khu gu agiswa, mu wonwa na mu lulamide mbeli gwa Nungungulu, mu hegisa khu gu hakha guvbanya nya gupindruge.

²³ Handro nya gighoho khu gufa, aholu, giningwa hi gi manago ga Nungungulu khu guvbanya nya gupindruge, gumogo ni Jesu Kristo, Pfhumu yathu.