Varoma 3 - Bhibhiliya Nya Guage

Khu gevbini giphaso nya gukhale Mujudha?

¹ Gasi khu gevbini giphaso nya gukhale Mujudha? Khu gevbini giphaso nya guhane wugwera?

² Gyomo giphaso ngudzu khu silo nya singi. Gilo nya guphele, Nungungulu tshiyedzide Vajudha magana yaye.

³ Aholu, nandru muni wu guromo khu gu vambe na va bombide gukhodwa? Ina gumba khodwa gwawe gu yeyedza gupwani Nungungulu nuye kha tumbega, gani?

⁴ Khandridzo. Kholu Nungungulu tumbegide gikhati gyatshavbo ambari ulo vathu va si tumbegigo. Kha nga yi ganelago Milowo, khiyo: “Gasi u manwa nu lulamide muguregerani gwago, ufela gu dugelela litshigu nya gulamudwe gwago.”

⁵ Aholu, guvivba gwathu gwa gu bani gu thumela gu yeyedza gululama gwa Nungungulu, hi na khethu ginani gambe? Hi na khethu Nungungulu kha lulama kholu a hi tsayisago? (Nya gu ganela kha nga edzi va ganelago khidzo vathu).

⁶ Khandridzo. Kholu nari gupwani Nungungulu kha lulama, a di hadza gu dzi kodza kharini gu lamula litigo?

⁷ Aholu, guvivba gwangu gwa gu bani gu thumela gu wonegisa lisine la Nungungulu ni wudhumo waye, khu ginani nyi ningwago nandru nya wughohi?

⁸ Khu ginani hi si ganeligo khethu: “Hongoleni hi gira guvivba gasi guta nya sadi.” Kha nga va hi singedzago khavo khiso hi hevbudzago. Vathu vovo va na tsayiswa khu edzi gu vbwetegago khidzo.

Ethu hatshavbo hi sighohi

⁹ Hi na khethu ginani olu? Ina ethu hi vathu nya wutshukwana guvbindra vambe, gani? Ahihi. Kha nga nyi ngari gu mi yeyedzago, Vajudha gumogo ni avo va si gu Vajudha, vatshavbo va fumedwe khu gighoho.

¹⁰ Kha nga gu lovidwego gupwani: “Mwalo muthu a lulamidego. Mwalo ni moyo basi.

¹¹ Mwalo muthu a gu ni mapimo nya yadi. Mwalo a vbwetago Nungungulu.

¹² Vatshavbo va digide ndzila nya lisine, vatshavbo va dzimede. Mwalo a girago nya sadi. Mwalo ni moyo basi.

¹³ Ngolo wawe, lithowo li tudwego, Lidimi lawe va gu li thumisa gupemba vathu. Magana yawe ma gu gamba wuhungu nya dzinyoga.

¹⁴ Maganani gwawe gu tade khu wulala ni guvala.

¹⁵ Migondro yawe ya gu tutumela guya vbaladza novba.

¹⁶ Umo va vbindrago khumo va gu sasela, va tshiya marumbi ni wusiwana.

¹⁷ Kha va yiti ndzila yi vbahago gurula,

¹⁸ mahoni gwawe gu mwalo githawo ni Nungungulu.”

¹⁹ Ethu hi ngu dziti nya gukhethu satshavbo esi si rumwago khu Nayo sa gu lumba basi avo va fumedwago khu nayo yoyo, gasi gu degudza magana yatshavbo, ni gu litigo latshavbo li dzipwe liri ni nandru mbeli gwa Nungungulu.

²⁰ Khu guralo, muthu lulamide mbeli gwa Nungungulu khu kotani nya gulandrise mithumo yi rumwago khu Nayo; kholu Nayo wa gu tulela muthu gu dziti gukhuye gighohi.

Gukhodwa linani ga Kristo khugo gu vbanyisago muthu

²¹ Gasi olu, Nungungulu a hi yeyedzide gululama gwaye, nyamba thumisa Nayo, kha nga li fakazago Libhuku nya Nayo ni eli la vaprofeti,

²² gululama gutago khu ga Nungungulu khu gukhodwa ga Jesu Kristo, A gu tshanganisa naye watshavbo a khodwago, kholu gu mwalo guhambana vbakari nya vathu.

²³ Kholu vathu vatshavbo va ghohide, va hamugisa guralo wudhumo wa Nungungulu.

²⁴ Gambe, va sayedwe gululama khu wuhigo wa Nungungulu, khu gu ningwa khu Jesu Kristo, a va tshudego wugumbini nya gighoho.

²⁵ Nungungulu giride gukhuye khu gufa gwa Kristo, vathu vatshavbo va khodwago gwaye va mane gu tsetseledwa sighoho sawe. A gu yeyedza kharati wuwadi waye, kha nga matshigu ya gale a nga hunisela, a si tsayisi vathu khu kotani nya sighoho sawe.

²⁶ Olu, Nungungulu giride esi gasi gu yeyedza gukhuye lulamide khu gikhati gegi, gasi Uye a manega na lulamide, ni gu ninga gululama vale va khodwago ga Jesu.

²⁷ Khu kharato, khu gevbini gilo nya gu dzi gugumugise khigyo muthu? Gimwalo ni gimwegyo. Khu ginani gi gu mwalo? Khu kotani nya mithumo ya Nayo, gani? Ahihi! Aholu khu kotani nya gukhodwe basi.

²⁸ Khu guralo, hi ngu tivisa gukhethu muthu a gu sayedwa gululama khu gukhodwa, nasiri khu mithumo ya Nayo.

²⁹ Gasi uye Nungungulu wa Vajudha basi, gani? Khandri Nungungulu wa va nya mayigo gambe, gani? Khu lisine khuye gambe Nungungulu wa va nya mayigo,

³⁰ kholu womo Nungungulu moyo basi, a nga tshanganisago naye va nya gu hana wugwera khu gukhodwa, a tshanganisa gambe va nya mayigo khu gukhodwa.

³¹ Khavbo avbo, ina sa gu wonega gupwani hi ngu tshipisa Nayo khu gukhodwa, gani? Ahihi. Aholu ha gu tiyisa Nayo.