Valamuli 8 - Bhibhiliya Nya Guage

Gupadwa ga Zebha ni Zalimuna

¹ Khavbo avbo, va na Efrayimi va di wudzisa Gidhiyoni, khavo: “Ginani esi u hi giredego, u ngamba hi rana gikhati u hongodego u ya dwana ni Vamedhiyani?” Va di mu ninga nandru khu tshivba ni tshivba.

² Khu guralo, uye a di va hakha, khuye: “Ginani eni nyi giridego nya guvbindre enu? Ina dziuvha dza Efrayimi khandri dzadi guvbindra vbwero watshavbo wa Abhiyezeri, gani?

³ Nungungulu ningede vathangeli Orebhi ni Zehebhi mandzani gwanu; ginani eni nyi yedego gu gira guvbindra enu?” Khavbo avbo, likhulo lawe li di bosa gikhati a ganedego maganayaya.

⁴ Gidhiyoni gumogo ni masotshwa yaye nya mazana mararu va di tsemakanya tsongo wa Joridhani na va garade, aholu na nga va va lundra.

⁵ A di embela vama va Sukoti, khuye: “Nyi ngu mi lomba sipandryana nya gukari nya gibaba gasi gu ninga masotshwa yangu kholu ma garade, eni nyi nga gu simama gulundra vafumeli Vamedhiyani, Zebha ni Zalimuna.”

⁶ Khu guralo vathangeli va Sukoti va di ganela, khavo: “Zebha ni Zalimuna va ngari mwalo mandzani gwago, khu ginani hi na gu ningago guhogza masotshwa yago?”

⁷ Khavbo avbo, Gidhiyoni a di ganela, khuye: “Khidzo kharato?” Gikhati Pfhumu Nungungulu a na ningelago Zebha ni Zalimuna mandzani gwangu, nyi na pferulela nyama yanu khu miba ni sirangalambwa sa giwulani.

⁸ Khu vbale a di gwela Penuweli aya gira gilombo gya gimwegyo; aholu vama va Penuweli, va di phindrula kha nga idzo va nga ganela vama va Sukoti.

⁹ Uye a di embela vama va Penuweli, khuye: “Gikhati nyi na wuyago na nyi pade, nyi nata khungumula likhokhola leli.”

¹⁰ Zebha ni Zalimuna va diromo tigoni gwa Karikori, na vari ni gipimo nya likhumi na livbandre magumi mazana (15.000) masotshwa. Vatshavbo vava va diri mitshaledwa nya masotshwa nya vathu va nga bani va gu dugela Khugadambo; kholu lizana ni magumavili magumi mazana (120.000) vama va kodzago gu thumisa matshari va di songidwe.

¹¹ Gidhiyoni a di gwela khu ndzila ya avo va nga bani va vbanyela mitshatshani, a thonona Khugadambo ga Nobha ni Jogibheya; a di dhumela masotshwa na ma pfhade.

¹² Zebha ni Zalimuna vafumeli Vamedhiyani va di thava; khu guralo uye a di va lundra, a va mola gumogo, a phalalegisa masotshwa yatshavbo.

¹³ Khu hwane, Gidhiyoni, mwamana wa Jowasi, a di wuya khu nyimbitunu a gwela khu ndzila ya Heresi

¹⁴ Gidhiyoni a di mola lidzaha limwedo la Sukoti a li wudzisa; lidzaha li di mu lovela malina nya livbandre na mavili magumi ni livbandre na vavili (77) vathangeli ni madhota ya dhoropani.

¹⁵ Khavbo avbo, Gidhiyoni a di hongola Sukoti aya embela vathu va iyoyo, khuye: “Avba womo Zebha ni Zalimuna, avo mu nga nyi hega khu avo, mu ganela, khenu: Zebha ni Zalimuna va ngari mwalo mandzani gwago, khu ginani hi na gu ningela guhodza masotshwa yago ma garadego?”

¹⁶ Gidhiyoni a di mola vathangeli va dhoropani ga Sukoti a va tshanisa khu miba ni sirangalambwa sa giwulani.

¹⁷ Khu hwane a di khungumula likhokhola la Penuweli, a songetela vama va dhoropani mule.

¹⁸ Khavbo avbo, a di wudzisa Zebha ni Zalimuna, khuye: “Va di khade kharini vama vale mu va songidego tigoni ga Tabhori?” Va di hakha, khavo: “Va diri kha nga uwe, moyo ni moyo a di gu fanana ni gyanana gya mufumeli.”

¹⁹ Gidhiyoni a di engedza a ganela, khuye: “Vama vale va diri vandriyangu, sanana sa mayi wangu kamwe. Nyi ngu sambanya khu lina la Pfhumu Nungungulu gukheni, naripwani mu di va digide va vbanya, eni na nyi si mu songi.”

²⁰ Gidhiyoni a di embela Jeteri, mwanaye nya matiwula, khuye: “Khuga u va songa!” Khu guralo, Jeteri a dipwa hwanga kha nga homola litshari laye, kholu a di ngari lidzaha nya lidugwane.

²¹ Aholu Zebha ni Zalimuna va di ganela, khavo: “Delu u ta hi songa uwe kamwe. Kholu tshivba ya muthu ya gu gimbilelana ni giningwa gyaye.” Khavbo avbo, Gidhiyoni a di khuga aya va songa, a dzega simburiselo nya masindra sa dzithamoni nya dzingameriya dzawe.

Gifenengelo nya Wuphasi nya mhamba gya Gidhiyoni

²² Va na Israyeli va di embela Gidhiyoni, khavo: “Hi fumele uwe, mwanago ni tugulu wago, kholu uwe u hi tshude mandzani ga Vamedhiyani.”

²³ Gidhiyoni a di va hakha, khuye: Kha nyi na mu fumela, ambari gyanana gyangu; Pfhumu Nungungulu khuye a na gu mu fumelago.

²⁴ Gidhiyoni a di engedza gambe, khuye: “Gimwegyo basi nyi mu lombago; moyo ni moyo nya enu a na nyi ninge phera mweyo ya ndzeveni eyi a yi phangidego.” (Kholu va na Ismayeli va diri valongo va Vamedhiyani, va di gu olovela gu ambala dziphera nya ndralama.)

²⁵ Avo va di hakha, khavo: Khu gu gola gwathu hi na gu ninga. Va di ladza keka, moyo ni moyo a di vega vbale phera nya phango waye.

²⁶ Gulemela nya dziphera gu diri pimo nya magumavili mipimo nya ndralama, nyamba saya ni minganga, makhetshe ni guambala nya giwunguwungu, si nga bani si gu thumiswa khu Vamedhiyani, gumogo ni mikarara yi nga bani yi romo dzithamoni nya dzingameriya dzawe.

²⁷ Gidhiyoni a di thumisa ndralama gasi gu gira keka nya wuphasi nya mhamba, a nga wu vega dhoropani gwaye, tigoni ga Ofira; va na Israyeli vatshavbo va di gira vbale wuphuphulu hwane gwaye, khu gu khozela keka nya ndralama; iso si nga girago naphwi ga Gidhiyoni ni ndranga yaye.

Gufa ga Gidhiyoni

²⁸ Khu guralo, Vamedhiyani va di vetwa mbeli ga va na Israyeli, gima kha va nga khusa gambe hungo wawe; litigo li di khala gurulani gipimo nya magumana myaga gikhatini ga Gidhiyoni.

²⁹ Jerubhahali, mwamana wa Jowasi a di khuga a hongola gaya aya khala.

³⁰ A diri ni livbandre na mavili magumi sanana, satshavbo nya gu velegwe khuye; kholu a diri ni vagadzi nya vangi.

³¹ Gibhayi gyaye gi nga bani gi vbanyela Sikemi, gi di mu velegela nigyo gyanana; igyo a nga gi riya lina la Abhimeleki.

³² Gidhiyoni, mwamana wa Jowasi fude na gumbide ngudzu, aya dzingwa thowoni ga babe waye Jowasi tigoni ga Ofira lidhoropa la Vabhiyeziri.

³³ Me ni gufa Gidhiyoni, va na Israyeli va di engedza gu gira wuphuphulu ni Vabhahali, va va khozela. Va di emisa Bhahali-Bheriti a khala nungungulu wawe.

³⁴ Va na Israyeli kha va alakanya Pfhumu Nungungulu wawe, a va vbulugisidego mandzani ga valala vawe vatshavbo va nga bani va va randrede.

³⁵ Gambe kha va tsetsa ndranga ya Jerubhahali, ambari gu khathala khu wuwadi watshavbo Gidhiyoni a giredego Israyeli.