Valamuli 21 - Bhibhiliya Nya Guage

Gumbembiswa ga Jabhesi-Gileyadhi

¹ Va na Israyeli na va ngari Misipa, va di sambanyide, khavo: “Mwalo ni moyo wa na gyathu a yelago gu lowodzisa gyanana gyaye ga va na Bhejami.”

² Khavbo avbo, va na Israyeli, va dita Bheteli, va ta khala vbale kala vbasilambotunu, va di khusa malito va wombedzela dzihuwa va lila ga Nungungulu khu wuvi nya wukhongolo.

³ Va ganela, khavo: “Uwe Pfhumu Nungungulu wa Israyeli, khu ginani si giregidego esi tigoni momu ga Israyeli, muhuno gu kenelago lihundzu limwedo?”

⁴ Khu litshigu li landrelago, vathu va di wuga na gu ngari dzimindru, va emisa vbale giluvelo, va ningela miningelo nya guvbiswe ni miningelo nya gurule.

⁵ Va na Israyeli va di wudzisa, khavo: “Khu mani wa vbakari nya mahundzu ya Israyeli a ngamba manega tshanganoni wa Pfhumu Nungungulu?” Kholu va di sambanyide vbakari nya tshangano, khavo: “Uye a na gumba gwela a ta Misipa tshanganoni wa Pfhumu Nungungulu, a na songwa.”

⁶ Va na Israyeli va di lila khu kotani ya vandriyawe va na Bhejami, va ganela, khavo: Muhuno li fuvisidwe lihundzu limwedo la va na Israyeli.

⁷ Olu hi na gira kharini khu madzaha ya na Bhejami ma vbulugidego, gasi ma kodze gu mana vagadzi, kholu ethu hi sambanyide ga Pfhumu Nungungulu khethu, kha hi na lowodzisa sanana sathu ga va na Bhejami?

⁸ Khavbo avbo, va di wudzisa, khavo: “Khu levbini lihundzu vbakari ga na Israyeli li ngamba ya tshanganotunu wa Pfhumu Nungungulu dhoropani ga Misipa, na?”

⁹ Va di sayela vathu, gu wonega nya gu, ni moyo nya vavbanyi va Jabhesi-Gileyadhi a diri mwalo vbale.

¹⁰ Khavbo avbo, tshangano wu di rumela likhumi na mavili magumi mazana (12.000) vama nya dzindrena, nya tshivba, va va leletela, khavo: “Indrani mu ya sasela khu matshari vatshavbo vavbanyi va Jabhesi-Gileyadhi, vanyamayi ni sanana.

¹¹ Mu na gira esi: Mu na mbembisa vatshavbo vama ni vanyamayi avo va kodzago gu landra sitshatha.”

¹² Vbakari nya vavbanyi va Jabhesi-Gileyadhi, gu di manega mazana mana (400) vanyamahegyane nya makendzi, nya gu gima va si gu tivani ni mwama, va dzegwa va va resa vbalizumbotunu la Silo, li nga bani li manega tigoni ga Khanani.

Vanyamayi va Jabhesi-Gileyadhi va ngu ningedwa va na Bhejami

¹³ Khavbo avbo, tshangano watshavbo wu di rumela myango ga va na Bhejami va nga bani va romo vbagiwindritunu gya Rimoni, guya phaselana maruladzi.

¹⁴ Khavbo avbo, va na Bhejami va di wuya, va ta kavedzedwa vanyamayi va nga vbulugago dhoropani ga Jabhesi-Gileyadhi, gasi va khala vagadzi vawe, aholu, kha va nga enela.

¹⁵ Khavbo avbo, va na Israyeli va di pwela gisiro va na Bhejami, kholu Pfhumu Nungungulu a di giride lihambano vbakari ga va na Israyeli.

¹⁶ Vathangeli nya tshangano va di engedza va ganela, khavo: “Hi na gira kharini khu avo va tshadego nyambana vanyamayi, olu vanyamayi va na Bhejami va vbedego khu gu songwa?”

¹⁷ Va engedza, khavo: “Gu fanede gu avo va tshadego va na Bhejami va mane thomba, gasi lihundzu lile li si fuvi vbakari ga va na Israyeli.

¹⁸ Aholu ethu kha hi yeli gu lowodzisa sanana sathu avbo gwawe si khala vagadzi vawe, kholu va na Israyeli va sambanyide, khavo: A na vadwe wule a lowodzisago nyamahegyane waye ga va na Bhejami.”

¹⁹ Va di ganela, khavo: “Dhoropani ga Silo, womo buzo wu giredwago Pfhumu Nungungulu khu mwaga ni mwaga.” Lidhoropa li manegelago Wuronga ga Bheteli, khu phuvbo ga Khugadambo, ndzilani nya guye Bheteli ni Sikemi, khu Marandzi ga Libona.

²⁰ Va di rumela iyoyo va na Bhejami va va embela, khavo: “Indrani, mu ya va varamela khu marembweni nya vhinya,

²¹ mu virela vambe va Silo, va na tago guta hana, muthu ni muthu wa na gyanu a na duge khu thembweni a ta dzi molela nyamayi vbakari ga vanyamahegyane va Silo; khavbo avbo, mu na bwelela tigoni gwanu ga Bhejami.

²² Vababe mwendro vandriyawe va guta avbo gwathu va ta dilela, ethu hi na va embela khethu: Hi gireleni wuhindzi, mu hi ninga, kholu kha ha va dzega gikhatini nya nyimbi, enu nenu mu mwalo nandru, kholu kha mwa va lowodzisani ga va na Bhejami.”

²³ Va na Bhejami va di gira kharato, va dzega vagadzi gupima khu tengo wawe vbakari nya avo va nga bani va hana, va bwelela thombani gwawe va ta vbaha lidhoropa va khala umo.

²⁴ Khu gikhati gyogyo gya gimwegyo, va na Israyeli va di khuga khu vbale, muthu ni muthu a bwelela lihundzuni gwaye nya mavelego avbo gu gu thombani gwaye.

²⁵ Khu matshigu yoyo, tigoni ga Israyeli gu diri mwalo mufumeli, khu guralo, muthu ni muthu a di gira iso a nga bani a si wona na si lulamide mahoni gwaye.