Valamuli 2 - Bhibhiliya Nya Guage

Nungungulu a ngu kawuka va na Israyeli

¹ Ngilozi ya Pfhumu Nungungulu yi di gwela khu Ghiligali kala Bhokimi yi ya ganela, khiyo: “Nyi mi duside khu tigoni ga Egipito, nyi mi yisani ga litigo nyi mi tumbisidego khu gu sambanyela vababe vanu. Nyi di mi embede, kheni: Gima kha nyi na pfhungumula gidzumeledzwano nyi hungidego nanu kala gupindruga.

² Khu guralo, enu mu nga hungini gidzumeledzwano ni vavbanyi va tigoni momu, na mu si gu pfhungumuli siluvelo sawe; aholu kha mwa yingisa lito langu. Khu ginani mu giridego isoso?

³ Kholu nyi mi embede gambe, kheni: Kha nyi na va tutumisa mbeli gwanu; avo va na khala valala vanu, ni vanungungulu vawe va na mi dembela naphwi.”

⁴ Avbo Ngilozi ya Pfhumu Nungungulu yi nga ta ganela magana yaya ga vatshavbo va na Israyeli, vathu va di khusa malito va lila.

⁵ Khu guralo, va di rana wulanga wowu khavo Bhokimi, avbovbo va di girela dzimhamba Pfhumu Nungungulu.

Gufa ga Josuwa

⁶ Josuwa a di vbangana vathu, va na Israyeli va di hongola, muthu ni muthu a di hongola ga litigo a nga li hakhago kha nga thomba yaye.

⁷ Vathu va di khozela Pfhumu Nungungulu, gukhugela gikhatini gyatshavbo nya guvbanye ga Josuwa gumogo ni gikhati madhota ma vbanyidego hwane nya gufe ga Josuwa ni gu wona thumo nya wukhongolo owu Pfhumu Nungungulu, a giredego va na Israyeli.

⁸ Josuwa, mwamana wa Nuni, githumi gya Pfhumu Nungungulu, fude nari ni tanga nya lizana ni likhumi (110) myaga.

⁹ Va mu dzingide ga gipandre gi mu lumbago, tigoni gwa Timinati-Heresi, gigomoni gya Efrayimi, khu phuvbo ga Wuronga nya gigomo gya Gahasi.

¹⁰ Ni melana watshavbo wowu nuwo, wu diya dzi pata gumogo ni vababe vawe; aholu khu hwane gwawe wu di tumbuluga wumbe melana wu nga bani wu si muti Pfhumu Nungungulu, ambari ni thumo nya wadi a wu giredego va na Israyeli.

¹¹ Khavbo avbo, va na Israyeli va di gira guvivba mahoni ga Pfhumu Nungungulu, va khozela vanungungulu nya Vabhahali.

¹² Va di diga Pfhumu Nungungulu wa vababe vawe, Uye a nga va dusa khu tigoni ga Egipito, va landrela vambe vanungungulu va mayigo nya vaakelane, va khidzima mbeli gwawe; va ghohela Pfhumu Nungungulu.

¹³ Va digide Pfhumu Nungungulu, va khozela Bhahali ni sifananiso sa Asitaroti.

¹⁴ Khu guralo, Pfhumu Nungungulu a di gorogela va na Israyeli, a gu va ningela mandzani nya vaphangi, va va phanga, bwelo khavbo, a va ningela mandzani ga valala, va tandrega ni gu ema mbeli gwawe.

¹⁵ Ni evbini va nga bani va dugela avbo, gyandza gya Pfhumu Nungungulu gi di va dwanisa, kha nga idzo a nga bani a va embede khidzo ni gu va sambanyela; tshanisa yawe yi diri yikhongolo.

Thumo wa valamuli

¹⁶ Khavbo avbo, Pfhumu Nungungulu a di wusa valamuli gasi guya va lamulela mandzani ga vale va nga bani va va tshanisa.

¹⁷ Ambari khu isoso, kha va nga yingisa valamuli vawe, aholu va di dzi ningedzela gu gira wubhayi ni vambe vanungungulu va va khidzimela. Va di vbiredza gu ndreya ndzilani va nga bani va gimbila khiyo vababe vawe, va nga bani va yingisa sileletelo sa Pfhumu Nungungulu, va si giri kha nga avo.

¹⁸ Gikhati Pfhumu Nungungulu a nga bani a va wusela valamuli, Uye a di gu khala ga moyo ni moyo nya mulamuli, a vbulugisa vathu vaye mandzani ga valala vawe, gikhatini gyatshavbo nya guvbanye ga mulamuli yoyo; kholu Pfhumu Nungungulu a di gupwa gisiro khu avo, khu tshanisa va nga bani va giredwa khu vatshanisi vawe.

¹⁹ Aholu gikhati afago mulamuli wule, avo va di bwelela gambe vaya gira guvivba guvbindra vavelegi vawe, va landrisela vambe vanungungulu, va noga mbeli gwawe, va va khozela; kha va nga hambana ni mithumo yawe nyambasi yadi, ni dzindzila dzawe nya guwegele.

Gighelo nya gusimame gumanega va nya mayigo

²⁰ Khavbo avbo, Pfhumu Nungungulu a di gorogela vathu va na Israyeli, a va embela, khuye: “Olu mu fanyidego gidzumeledzwano nyi hungidego ni vababe vanu, ni gumba yingisa lito langu,

²¹ Eni neni, kha nyi na nga simama gu tutumisa ni moyo nya va nya mayigo va digidwego khu Josuwa gikhati a fudego.

²² Khu mandza yawe, nyi na linga va na Israyeli, gasi gu wona mwendro va na landrisa dzindzila dza Pfhumu Nungungulu, kha nga edzi va dzi landrisidego khidzo vababe vawe.”

²³ Khu guralo, Pfhumu Nungungulu a di va diga vathu vovo mayigoni gwawe, kha nga vbiredza gu va tutumisa, ambari gu va ningela mandzani ga Josuwa.