Valamuli 17 - Bhibhiliya Nya Guage

Mika ni gifananiso gya ndrangani gwaye

¹ A diromo mwama moyo nya gupwani khu Mika wa gigomoni gya Efrayimi,

² a di ganela ga mayi waye, khuye: “Gyuma nya likhumi na limwedo mazana (1.100) singerengere nya parata u nga bani u wandredwe u nga kala u ganela guvivba khu kotani nya igyo, kheni nyi gu nagyo.” Khavbo avbo, mayi waye a di mu embela, khuye: “Pfhumu Nungungulu a na gu kategise, mwanangu.”

³ Khu guralo, Mika a di bweledza singerengere sile nya likhumi na limwedo mazana (1.100) ga mayi waye; aholu mayi waye a di mu embela, khuye: “Khu mandzani gwangu, nyi ngu ningela gyuma gegi ga Pfhumu Nungungulu khu gipandre gya mwamana wangu, gasi gu gira gifananiso nya guvatwe, olu, nyi ngu gi bweledza gambe iyo gwago.”

⁴ Khu guralo, Mika a di bweledza singerengere sile nya parata ga mayi waye, gasi uye a dusa mazana mavili singerengere nya parata aya si ningela ga mupfhuli a gira khiso gifananiso nya guvatwe nigyo nya gupfhudwe, gi ya khala nyumbani ga Mika.

⁵ Mwama yoyu nya gupwani khu Mika, a diri ni nyumba nya vanungungulu, a di dzi girela efodhe ni dziterafine, a phasela moyo nya sanana saye, gasi a khala muphasi nya mhamba.

⁶ Khu gikhati gyogyo, gu diri mwalo mufumeli tigoni ga Israyeli, muthu ni muthu a di gira iso si nga bani si tsakisa maho yaye ni gu gola gu si gira.

⁷ Gu diromo lidzaha limwedo nya Mulevhi nya gudugele Bhetlehema ga Judha, nya lihundzu la Judha, uye a di luvede mule.

⁸ Mwama yoyu, a di rura khu dhoropani ga Bhetlehema wa Judha gasi gugimbila a luvela umo a nga gu golago. Vbakari nya lipfhumba laye, a di vboha gigomoni gya Efrayimi, ndrangani ga Mika.

⁹ Mika a di mu wudzisa, khuye: “Wa guta khu hayi?” Uye a di hakha, khuye: “Nyi Mulevhi nya gute khu Bhetlehema ga Judha, nya gu gimbila nyi vbweta wulanga nya guvbahe umo, avbo nyi na gu golago.”

¹⁰ Khavbo avbo, Mika a di mu embela, khuye: Khala ni eni, u na khala babe wangu ni muphasi wangu nya mhamba, khu mwaga ni mwaga nyi na gu ninga likhumi singerengere nya parata, guambala ni gu gu hodzisa. Mulevhi a di bela.

¹¹ Mulevhi a di nengela khu gu khala ni mwama yoyu, lidzaha leli li di khala nga gyanana gyaye.

¹² Mika a di emisa lidzaha leli gu khala muphasi nya mhamba, li khala ndrangani ga Mika.

¹³ Khavbo avbo, Mika a di khuye: “Olu nyi ngu dziti nya gukheni Pfhumu Nungungulu a na nyi girela silo nya sadi, kholu nyi gu ni muphasi nya mhamba nya Mulevhi.”