Valamuli 11 - Bhibhiliya Nya Guage

Jefiti a ngu vbulugisa va na Israyeli

¹ Jefiti, Mugileyadhi, a diri ndrena nya gudwane nyimbi, mayi waye a diri liphuphulu; babe waye a di gu ranwa pwani khuye Gileyadhi.

² Mwangadzi wa Gileyadhi a di mu velegela nuye sanana, iso gikhati si dandridego si di tutumisa Jefiti, si ganela, khiso: “Uwe khu na hakha ni mweyo thomba ya ndrangani gwathu, kholu, u gyanana gya mumbe mayi.”

³ Khavbo avbo, Jefiti a di thava mbeli ga vandriyaye aya vbaha dhoropani gwa Tobhi; vama nyamba phasa gilo va di ya dzi pata gwaye va gimbilagimbila gumogo naye.

⁴ Na gu vbindride matshigu nya gukari, va na Amoni va di ya dwana ni va na Israyeli.

⁵ Va na Amoni kha nga va nga bani va gu dwana ni Israyeli, vathangeli va Gileyadhi va di hongola vaya dzega Jefiti tigoni ga Tobhi.

⁶ Va di mu embela, khavo: “Delu, khala uwe muthangeli wathu nya nyimbi, gasi hi kodza guya dwana ni va na Amoni.”

⁷ Jefiti a di va embela, khuye: “Enu khandrenu mu nga bani mu gu nyi zondra, mu nyi tutumisa ndrangani ga babe wangu, gani? Khu ginani olu mu guromo sigaradzoni mu nyi vbwetago?”

⁸ Vathangeli va Gileyadhi va di embela Jefiti, khavo: “Kotani nya isoso, hi ngu bwelela gwago, gasi guta gu embela khethu, delu eno gwathu, gasi hi ta dwana ni va na Amoni, uwe u na khala muthangeli wa vatshavbo va vbanyago Gileyadhi.”

⁹ Jefiti a di va hakha, khuye: “Olu mwa gu nyi dzegani nyi bwelela gasi guya dwana ni va na Amoni, Pfhumu Nungungulu a gu va ningela mandzani gwangu, nyi na khala muthangeli wanu, gani?”

¹⁰ Vathangeli va Gileyadhi va di phindrula, khavo: “Pfhumu Nungungulu a na khala fakazi vbakari gwathu; hi na gira satshavbo u na ganelago.”

¹¹ Khu guralo, Jefiti a di hongola gumogo ni vathangeli va Gileyadhi, vathu va di mu gira muthangeli ni mugimbidzisi wawe nya nyimbi. Jefiti a di engedza gu ganela magana yaye yatshavbo a nga bani a ma ganede mbeli ga Pfhumu Nungungulu tigoni ga Misipa.

¹² Jefiti a di rumela myango ga mufumeli wa va na Amoni a mu wudzisa, khuye: “Ginani gi guromo ga eni ni uwe, gu kala u ta dhumela litigo lathu?”

¹³ Mufumeli wa va na Amoni a di phindrula myango ya Jefiti, khuye: “Gikhati va na Israyeli va dzudego khu Egipito, va di ta wandra mayigo yangu, gukhugela Arinoni kala Jabhoki, va vboha gambe ni Joridhani. Olu nyi bweledzeleni mayigo yoyo khu gurula.”

¹⁴ Jefiti a di engedza gu rumela gambe myango ga mufumeli wa va na Amoni,

¹⁵ yi ya mu embela, khiyo: Jefiti a ngu ganela kharati, khuye: Va na Israyeli kha va wandra litigo la va na Mowabhi, ambari litigo la va na Amoni;

¹⁶ kholu, gu dugani ga va na Israyeli khu Egipito, va di gwela khu giwulani va vboha ga Yiphwa nya Gufuvile, khu vbale va vboha kala Kadesi.

¹⁷ Khu Kadesi, va na Israyeli va di rumela myango ga mufumeli wa va na Edhomi, vaya, khavo: Hi ngu gu lomba gukhethu hi dige hi tsemakanya khu tigoni gwago. Aholu, mufumeli wa va na Edhomi, kha nga va yingisa. Va na Israyeli va di rumela gambe myango ga mufumeli wa va na Mowabhi, uye nuye kha va yingisa; khu guralo, va di simama gu khala Kadesi.

¹⁸ Khu gulandrela, va na Israyeli, va di gimbila khu giwula va dzundruluga litigo la Edhomi ni la Mowabhi; va vbindra khu phuvbo ga Khugadambo vaya zumba khu bambe ga tsongo wa Arinoni; khu guralo, kha va nga bela tigoni ga Mowabhi, kholu Arinoni a diri vbingano wa Mowabhi.

¹⁹ Aholu va na Israyeli va di rumela myango ga Seyoni, mufumeli wa va Amori ni mufumeli wa Hesibhoni; va mu lomba, khavo: Hi dige hi tsemakanya khu tigoni gwago, gasi hi hongola ga wulanga wu hi lumbago.

²⁰ Khu guralo, Seyoni kha nga dzumedzisa va na Israyeli gu tsemakanya khu mivbinganoni gwaye; a di tombanisa vathu vaye vatshavbo vaya zumba Jaza, a di dwana ni va na Israyeli.

²¹ Khu guralo, Pfhumu Nungungulu wa Israyeli, a di ningela Seyoni gumogo ni vathu vaye vatshavbo mandzani ga va na Israyeli, va va songetela; va na Israyeli va di wandra mayigo yatshavbo ya va Amori va nga bani va vbanya umo, ma khala thomba yawe.

²² Va di wandra malanga yatshavbo ya Vaamori, gukhugela Arinoni kala tsongoni wa Jabhoki; gukhugela giwulani kala tsongoni wa Joridhani.

²³ Olu Pfhumu Nungungulu wa Israyeli, a tutumisidego Vaamori mbeli gwa vathu vaye, va na Israyeli, wa guvbweta gu li dzega uwe, gani?

²⁴ Ina u nga bomba gu dzega iso nungungulu wago Khemosi a gu ningago, gani? Ethu nethu hi na sayisa iso Pfhumu Nungungulu a dzegedego vambe a hi ninga.

²⁵ Ina uwe u ni tshivba nya gu vbindre Bhalaki, mwamana wa Zipori, mufumeli wa Mowabhi, gani? Ni litshigu limwedo a di nga dwana ni va na Israyeli, gani?

²⁶ Va na Israyeli va vbanyide gipimo nya mazana mararu (300) myaga Hesibhoni ni mitalalani gwaye, Aroweri ni mitalalani gwaye ni madhoropani gwatshavbo ma guromo Arinoni, khu ginani u ngamba ma wuyisa ga gikhati gyogyo?

²⁷ “Eni kha nya gu ghohela ni vbadugwana, aholu uwe u ngu gira gighoho khu gu nyi dwanisa; Pfhumu Nungungulu a gu mulamuli, a na lamule muhuno vbakari ga va na Israyeli ni va na Amoni.”

²⁸ Khu guralo, mufumeli wa va na Amoni, kha nga yingisa magana ya Jefiti a nga ma rumelago.

²⁹ Khavbo avbo, Liphuvbo la Pfhumu Nungungulu li dita ga Jefiti, a di tsemakanya khu Gileyadhi ni Manasi; kholu a di tsemakanya khu Misipa wa Gileyadhi a hongola kala ga va na Amoni.

³⁰ Jefiti a di gira gisambanyo ga Pfhumu Nungungulu, khuye: “Wa gu ningela mandzani gwangu va na Amoni,

³¹ wule a na phelago khuye gu duga khu ndrangani gwangu, gasi gu nyi khinga na nyi wuya khu nyimbitunu na nyi pade va na Amoni, a na bani ari wago Pfhumu Nungungulu nyi na mu ningela kha nga phaso nya guvbiswe.”

³² Khu guralo, Jefiti a di ya dwana ni va na Amoni, Pfhumu Nungungulu a di va ningela mandzani gwaye.

³³ A di va sasela, gukhugela Aroweri kala gu vboha Miniti, magumavili madhoropa, a vbindra kala Abheli-Keramimi; khu guralo, va na Amoni va di khoziswa khu va na Israyeli.

³⁴ Gikhati Jefiti a vbohidego ndrangani gwaye Misipa, gu di duga nyamahegyane waye a mu khinga nari ni singomana, na gu hana, nyamahegyane yoyu a diri gyanana gyaye gya gimwegyo avbo ga Jefiti, uye a diri mwalo gimbe gyanana nya gikhwathana mwendro nya gyagadzyana.

³⁵ Gikhati a mu wonego, a di pferula dzingandzu dzaye a ganela, khuye: “Yo! Mwanangu, nyi ngupwa wuvi nya wukhongolo khu kotani gwago, kholu nyi giride gisambanyo ga Pfhumu Nungungulu nyi si yeligo gumba gi landrisa.”

³⁶ Nyamahegyane a di mu embela, khuye: “Baba wangu, u tude likana lago ga Pfhumu Nungungulu; gira ga eni kha nga iso si dugidego khu kanani gwago, kholu Pfhumu Nungungulu a gu phodzede ga valala vago va na Amoni”

³⁷ A di engedza gambe ga babe waye, khuye: “Nyi girele esi: Nyi dige gipimo nya migima mivili nyi legalega sigomoni nyi lila wukendzi wangu ni dzipari dzangu, kholu gima kha nyi na dzegwa gambe.”

³⁸ Uye a di ganela, khuye: “Gimbila.” A di mu diga a hongola aya vbedza migima mivili. Khavbo avbo, uye a di hongola sigomoni gumogo ni dzipari dzaye, va di lila, kholu uye gima kha na dzegwa a velega gyanana.

³⁹ Na gu vbindride migima mivili, a di wuya ga babe waye, a di ta mu gira kha nga idzo a nga sambanyago khidzo. Uye gima kha nga diga wukendzi waye. Khu vbale giolovedzo gi di phela tigoni ga Israyeli,

⁴⁰ nya guduge dzimbiri gipimo nya matshigu mana, myaga yatshavbo, gasi gu gira gialakanyo gya nyamahegyane wa Jefiti, Mugiileyadhi.