Vahebheru 4 - Bhibhiliya Nya Guage

Gubela guhefemulani gwa Nungungulu

¹ Gitumbiso nya gubele guhefemulani hi ningwago khu Nungungulu gi nga tiyide kala na muhuno. Khu guralo, dzi woneleni, vandruye, gasi ni moyo wanu a si luzi gu mana wurendra wowo nya gubele guhefemulani momo.

² Kholu, ethu hi hakhide Mahungu nya Yadi nga edzi va nga ma hakhago khidzo avo. Avo va ma pwide Mahungu, aholu, kha ma va phasa gilo, kholu, va di mapwa va si ma hakhi khu gukhodwa.

³ Khu guralo, ethu hi khodwago, hi ngu bela guhefemulani gu thudwago khu Nungungulu, khuye: “Nyi di swihala ngudzu nyi kala nyi sambanya, kheni: Ava vathu gima kha va na nga bela tigoni nya guhefemule, avo gima kha va na nga bela guhefemulani gwangu nyi va dongisedego.” Nungungulu ganede esi ambari ulo guhefemula gwaye gu phedego litshigu a nga vbedzisa gu vanga litigo.

⁴ Umo nya Milowo nya Guage gu lovidwe kharati, khu mahungu nya litshigu nya livbandre na mavili, pwani: “Na vbedzide mithumo yaye yatshavbo, Nungungulu a di hefemula khu litshigu nya livbandre na mavili.”

⁵ A engedza gambe ga wulanga wowu, khuye: “Gima kha va na nga bela guhefemulani gwangu.”

⁶ Vale va nga hegula gu hakha Mahungu nya Yadi kha va bela guhefemulani gwa Nungungulu, kholu kha va khodwa. Aholu, vomo vambe va na gu belago va hefemula naye.

⁷ Nungungulu hathide limbe litshigu a li ninga lina nya gupwani “Muhuno.” Na gu vbindride myaga nya yingi ganede khilo khu likana la Dhavhidhe omu nya Ndzimo yi gu, khiyo: “Muhuno, mwa gupwa lito la Nungungulu, mu nga bangisi mihungo yanu.”

⁸ Nari gupwani Josuwa khu lisine a di vbohiside vathu va na Israyeli wulangani nya guhefemule, Nungungulu gima na sa hatha limbe litshigu, khu hwane nya gikhati.

⁹ Khu magirelo yoyo, gu yeyedza gupwani vathu va Nungungulu va si gu beli guhefemulani nya gukhongolo nya nga ogu Nungungulu a gu manego khu litshigu nya livbandre na mavili.

¹⁰ Kholu, oyu a belago guhefemulani gwa Nungungulu a na rula mithumo yaye yatshavbo a gu hefemula nga edzi a hefemudego khidzo Nungungulu.

¹¹ Khavbo avbo, hongoleni hi dzi garadze khu gu bela guhefemulani momu, gasi hi si landri giwonelo gya avo va ngamba yingela giwulani, va tandrega gu gu bela.

¹² Mahungu ya Nungungulu khya guvbanya, ma na ni tshivba, ma ngu vbira guvbindra litshari nya gulodzwe eno ni eno. Ma gu paya, ma bela kala matshanganoni nya womi nya muthu. Ma ngu hambanisa gutshangana nya mongo ni marambo; ma ngu tugula mahingigedzo ni mapimo ma sihadego monyoni nya muthu.

¹³ Gimwalo ni gimwegyo gi sihadego mahoni ga Nungungulu. Sivangwa satshavbo somo tendrelani mahoni ga Nungungulu. Ethu hatshavbo hi na ema mbeli gwaye, a hi lamula.

Jesu khuye Muphasi nya Khongolo nya mhamba

¹⁴ Khu guralo, hongoleni hi tiye gukhodwani gwathu. Kholu, hi na ni Muphasi nya khongolo nya mhamba a gu na ni tshivba, a vbeledego, a bedego gungangamelani nya wudhumo wa Nungungulu a gu Jesu Kristo, Mwamana wa Nungungulu.

¹⁵ Muphasi wathu nya khongolo nya mhamba a ngu dzi kodza gu hi pwela wusiwana nya sighoho sathu, kholu, uye nuye lingidwe kha nga ethu, aholu, gima kha ghoha.

¹⁶ Khavbo avbo, hongoleni hi tiye hi hidzimela vbagikhalotunu nya wufumu wa Nungungulu nya gutale khu wuhigo, avbo hi na ya manago guvbanya ni gu phasedzedwa hi gu vbwetago gikhati gyatshavbo.