Vahebheru 12 - Bhibhiliya Nya Guage

Gutimisela vbakari nya sigaradzo

¹ Khu guralo, ethu hi randredwe khu dzifakazi nya vathu nya vangi ngudzu. Hongoleni hi dige satshavbo esi si hi segelago ndzila, hi diga ni gighoho gi hi namarelago khu tshivba, hi tutuma nyamba vbela tshivba, hi landra pfhuka wu nga tshadego mbeli gwathu.

² Hi na simame gu khusa maho hi khedzisa Jesu, kholu, khuye guphela ni guhegisa nya gukhodwa gwathu. Uye gima kha vbela tshivba khu gu rwala gihambano. Aholu, khu gutsaka a nga tumbiswago, kha thela kota khu dzitshoni nya gufe vbagihambanotunu. Ni olu, khade khu nyamudye nya gikhalo nya wufumu wa Nungungulu.

³ Alakanyani gusaniseka gwaye, ni edzi a nga timiselago khidzo likhulo nya sighohi. Kharato, enu nenu mu nga vbeli tshivba, mu bwelelela hwane.

⁴ Kholu, enu nenu, umo nya litunga mu dwanago ni gighoho, mu si gu dwani kala gufa.

⁵ Ina olu mu divaledwe khu magana nya gu mi tiyisele mu embedwego khu Nungungulu gukhwatshi mu sanana saye, gani? Kholu, a mi embede, khuye: “Mwanangu, u nga kanyisi gulaya ga Pfhumu; u nga vbeli tshivba wa gu kawukwa khuye,

⁶ kholu, Pfhumu a gu kawuka uye a mu haladzago, a gu tsayisa oyu a mu hakhago nga gyanana gyaye.”

⁷ Timiselani gusaniseka, mu gu wona kha nga gitsayiso gya babe, kholu gusaniseka gwanu gwa gu yeyedza gupwani Nungungulu a ngu mi phara kha nga sanana saye. Ina gyomo gyanana nya gu gima gi si gu kawukwi khu babe waye, gani?

⁸ Enu mwa gumba kawukwa kha nga edzi gu girwago ga sanana satshavbo sa Nungungulu, gu yeyedza gupwani kha muri sanana saye nya lisine, mu sanana sa vbavbandze.

⁹ Vavelegi vathu nya giwuthu va di gu hi kawuka, ethu hi di va ninga githawo. Ina hi mwalo fanelo nya guyingele khu githawo ngudzu Babe wathu nya liphuvbo, gasi hi mane guvbanya, gani?

¹⁰ Vavelegi vathu nya giwuthu va di hi tsayisa gikhati nya gidugwanana, gupima khu ugo va nga gu wona nari gwadi, gasi Nungungulu, a gu hi tsayisa khu gufela gukhuye hi phasege, hi mana gu bela guagani gwaye.

¹¹ Khu lisine, olu gutsayiswa gwatshavbo kha gu wonegi na gu tsakisa, gwa gu wonega nga gusaniswa. Aholu, khu gikhati gyakone, gu ngu ninga handro nya gurule ni gululama ga vale va dandrisidwego khugo.

Sileletelo ni wusingalagadzi

¹² Khu guralo, khusedzani mandza ma garadego, mu gu tiyisa dzikhungumudzi dzi vbedego tshivba.

¹³ Tulani dzindzila nya gululame, gasi a si khuyugi oyu a hasidego, aholu, a hawuluga.

¹⁴ Vbanyani khu gurula ni vathu vatshavbo, mu dzi garadza khu gu vbanyela Pfhumuni, kholu nyamba gira kharalo, mwalo muthu a na gu wonago Pfhumu.

¹⁵ Dzi woneleni, gasi ni moyo wanu a si segedwi wuhigo wa Nungungulu. Dzi woneleni, gasi ni moyo wanu a si khali nga khamba nya guvave wu bayisa vathu nya vangi khu wuvasi waye.

¹⁶ Dzi woneleni, gasi ni moyo nya enu a si khali muthu nya gudange nayo ni gumbana githawo ga silo si agidego, kha nga Esawu a nga rengisa wukoma waye khu gufela mbiya nya guhodze.

¹⁷ Kha nga mu dzitigo nya gukhenu, khu hwane a di vbwetide gu hakha gikategiso gya babe waye, aholu a di bombedwa kholu, kha ga manega lipindru nya guvbindrugedze esi a nga bani na giride, ambari a nga lila khu gu vbweta gu si vbindrugedza.

¹⁸ Kholu kha mwa vboha kha nga va na Israyeli, vbafuvbi nya gigomo gi kuhwago khu mandza, gi dzurago khu nilo, gidema, ni gusivbala, ni gingulu,

¹⁹ ni gudzuma nya pundru, ni gupwala lito nya magana. Gikhati vathu va pwidego lito, va di lomba gukhavo li si ganeli gambe gimbe gilo.

²⁰ Kholu, avo va di si wu tiyeli nayo wu rumago, khuwo: “Ambari girengo gya gu kuha gigomo, gi na songwe khu siwindri.”

²¹ Esi va nga si wonago si di thisa ngudzu, a nga kala Mosi a ganela, khuye: “Nyi ngu ndrendremela khu hwanga.”

²² Aholu enu, mu vbohide gigomoni ga Siyoni, ni dhoropani ga Nungungulu a vbanyago, Jerusalema ga ndzadzini ni mazanazana nya dzingilozi dzaye.

²³ Enu mu vbohide tshanganoni nya wukhongolo ni libandla nya sanana nya matiwula sa Nungungulu, sile malina yawe ma lovidwego ndzadzini. Enu mu vbohide ga Nungungulu a gu mulamuli nya vathu vatshavbo, ni ga maphuvbo ya vale va lulamidego va vbelela.

²⁴ Ga Jesu a gu Mutshanganisi nya gidzumeledzwano nya giphya, uye a vbaladzidego Novba wu ganelago silo nya gu hi phase guvbindra novba wa Abheli.

²⁵ Dzi woneleni! Mu nga bangisi mihungo yanu mwa gupwa oyu a ganelago. Ava va nga bomba gupwa oyu a nga va resela Mahungu ya Nungungulu mafuni, gima kha va vbuluga gutsayiswa. Khu guralo, kha hi na dzi kodza guvbuluga ethu ha gu bomba gupwa oyu a ganelago khu ndzadzini.

²⁶ Wule khu Lito laye a nga kutsungago mafu, olu tumbiside, gukhuye: “Eni nyi na engedza gambe gu kutsunga, nasiri mafuni basi, aholu, ni ndzadzini gambe.”

²⁷ Magana yaya ma gukhayo: “Nyi na engedza gambe,” ma gu yeyedza gupwani silo si vangidwego, si na kutsungwa si mwalalega. Gasi esi nyamba tsekatseka, si na simama gu khala.

²⁸ Khu guralo, hongoleni hi bonge, kholu, hi hakhide Mufumo wa ndzadzini, owu wu si kodzigo gu kutsungwa. Hongoleni hi bonge, hi khozela Nungungulu khu magirelo nya gu mu tsakise ni githawo.

²⁹ Kholu, khu lisine, Nungungulu wathu, nilo nya gupfhungumule.