Vahebheru 10 - Bhibhiliya Nya Guage

Ditshedzo wu giridwego khu Kristo khwa gupindruga

¹ Kholu Nayo wa Mosi khandri giwonelo nya guvbelele ni gutiya nya silo nya lisine; mwedzi basi nya silo nya lisine si nga gutago. Khiyo miphaso ya yimweyo yi ningedwago khu mwaga ni mwaga. Khu guralo, kha gu kodzegi khu miphaso yoyo guagiswa vathu va vbelela, kala va vboha ga Nungungulu.

² Nari pwani ava va khozelago Nungungulu va agisidwe sighoho sawe, kha va nga hadza gu dzipwa gambe vari ni nandru nya sighoho. Khu kharato, miphaso yatshavbo yi di hadza gu vbela.

³ Khu lisine, miphaso yoyo, ya gu thuma gu dundrugisa vathu sighoho sawe khu mwaga ni mwaga.

⁴ Kholu novba nya dzikuzi ni dziphongo gima kha wu dzi kodzi gu handza sighoho nya muthu.

⁵ Khu guralo, gikhati a dzudego mafuni a di ganela, khuye: “Uwe khu vbweti dzimhamba ni miningelo nya sirengo, wulangani nya isoso, u nyi girede givili.

⁶ Kha dzi gu tsakisi dzimhamba nya sirengo nya guvbiswe vbagiluvelotunu, ambari miphaso nya guhandze sighoho.

⁷ Khavbo avbo, eni nyi di, kheni: Nyi womo avba, uwe Nungungulu, nyi dzude guta gira guhaladza gwag, (nga edzi gu lovidwego khidzo libhukuni nya Nayo khu mahungu yangu).”

⁸ Guhegula a di ganela, khuye: “Uwe khu vbweti dzimhamba ni miningelo nya sirengo, khu nengeli khu dzimhamba nya sirengo nya guvbiswe vbagiluvelotunu, ambari miphaso nya guhandze sighoho.” Ganede kharati ambari ulo dzimhamba dzatshavbo dzi ningedwago khu gu landra guruma nya Nayo.

⁹ Khavbo avbo, a di ganela gambe, khuye: “Nyi womo avba, Nungungulu, gasi gu gira guhaladza gwago.” Khu guralo, fuvisa dzimhamba dza gale. Wulanga nya idzo vega mhamba nya wuvili.

¹⁰ Kha nga Jesu Kristo a giridego guhaladza gogo, ethu hi agisidwe sighoho sathu satshavbo, kotani nya mhamba a yi giridego gumogo basi, khu gu ningela givili gyaye.

¹¹ Vaphasi vatshavbo nya mhamba va gu bela matshigu yatshavbo vaya gimbidzisa thumo nya wukhodwa wawe, va ningela dzinyondro nya dzingi miphaselo nya dzimhamba dzodzo dza dzimwedzo, aholu, kha dzi kodzi gu dusa sighoho.

¹² Aholu uye, ningede mhamba mweyo basi, mhamba yi thumago kala gupindruga, na giride esi, a di hongola aya khala nyamudye ga Nungungulu.

¹³ Khavbo a guromo olu ni matshigu matago a virela gukhuye Nungungulu a vege valala vaye, va khala gigandredzelo nya migondro yaye.

¹⁴ Khu magirelo yoyo, khu mhamba mweyo basi, Kristo agiside, va vbelela kala gupindruga, vale va nga handzwa sighoho.

¹⁵ Liphuvbo nya Guage nilo li ngu hi ninga wufakazi waye khu mahungu yaya, hwane nya gu na li ganede, khilo:

¹⁶ “Egi khu gidzumeledzwano nyi na girago navo; gya gu vboha gikhati gyogyo, a ngu ganela Pfhumu, nyi na vega milayo yangu myonyoni gwawe; nyi na yi lova mapimoni gwawe.”

¹⁷ A engedza gambe, khuye: “Gima kha nyi na nga dundruga gambe sighoho ni guvivba gwawe.”

¹⁸ Khu guralo, avbo gu guromo gutsetseledwa sighoho, kha gu vbwetegi gambe miphaso nya guduse sighoho soso.

Hi na hidzimele ga Nungungulu

¹⁹ Khu guralo, vandruye, khu novba wa Jesu hi tshudwe, gasi hi bela makhuvini nya Wulanga nya Guage Ngudzu.

²⁰ Khu makhuvi a gu givili gyaye, Jesu a hi tulede ndzila nya yiphya nya guvbanye.

²¹ Ethu hi na ni muphasi nya khongolo nya mhamba, a thangelago mithumo ya Nyumbani ga Nungungulu.

²² Hi na hidzimele ga Nungungulu khu monyo nya wadi ni gukhodwa nya gutiye, na hi agisidwe satshavbo si hi vivbisago monyo, sivili sathu na si handzidwe khu mati nya yadi.

²³ Hi na sayise gwadi gutumba nya gukhodwe hi nga sambanyago, kholu hi ngu tumba gukhethu Nungungulu a na tadzisa sisambanyo a giridego.

²⁴ Hongoleni hi tiyiselane khu gyathu, hi phasana gu gira mithumo nya wuhindzi ni mithumo yatshavbo nya yadi.

²⁵ Hi nga digi, kha nga edzi va nga girago vambe, giolovedzo nya gubele mitshanganoni nya Libandla lathu. Aholu, hongoleni hi tiyiselane khu gyathu, ngudzungudzu olu enu mu wonago gukhenu Litshigu la Pfhumu li ngu vboha.

²⁶ Kholu, ha gu simama hi ghoha nya gigwenye, olu hi li tidego lisine, gu mwalo gambe yimbe mhamba nya gu dzi kodze gu dusa sighoho sathu.

²⁷ Hi na wuyedwa basi khu hwanga nya esi si nga gutago, hwanga nya gulamudwe ni nilo nyamba tshimega, wu na gu vbisago valala.

²⁸ Muthu a gu ndraga Nayo wa Mosi, a ngu songwa nyamba pwedwa, khu kotani nya wufakazi nya vathu vavili mwendro vararu.

²⁹ A gu bani ari guralo, ginani gi na gu dugelelago ga vale va nyenyago Mwamana wa Nungungulu, va gira gilo nya nyalidede, Novba nya gidzumeledzwano gya Nungungulu va handzidwego khuwo? Ginani gi na gu dugelelago ga vale va valago Liphuvbo nya Guage a gu gifefe nya wuhigo?

³⁰ Kholu hi ngu muti gwadi oyu a nga khuye: “Guphodza ni gubweledzela sa gu lumba eni. Nyi na ninga tshatshazelo.” A engedza gambe, khuye: “Pfhumu yi na lamula vathu vaye.”

³¹ Gu ngu thisa ngudzu gu thegela mandzani ga Nungungulu a vbanyago.

³² Alakanyani esi si nga dugelela gale, matshigu yale mu nga hakhago wenengedzo wa Nungungulu; mu wonide tshanisa nya yikhongolo, aholu, gima kha mwa padwa litungani.

³³ Vambe va di vadwa, va saniswa vbakari nya vathu; vambe va di ema gumogo va hengela navo gusanisekani gwawe.

³⁴ Enu mu hengede gusanisekani ga vale va nga girwa sibotshwa. Na mu phangidwe silo sanu satshavbo, mu di timisela khu gutsaka, kholu, mu di gu dziti gukhenu mu na ni silo nya sadi ngudzu nya gupindruge.

³⁵ Mu nga vbelini tshivba, tshatshazelo mu dongisedwego wukhongolo.

³⁶ Timiselani gasi mu gira guhaladza ga Nungungulu, mu mane guya hakha esi a mi tumbisago.

³⁷ Kholu, “gu tshade gikhati gidugwana, a nata uye a vbwetago guta, uye kha na hwela.

³⁸ Muthu wangu a lulamidego a na vbanya khu gukhodwa; aholu, oyu a bwelelago hwane, eni kha nyi na tsakiswa khuye.”

³⁹ Khu guralo, ethu kha hiri vathu nya gubwelele hwane hi ya gumbembani. Aholu, hi vale va khodwago gasi gu vbanyisa mihefemulo yawe.