Vagalatiya 5 - Bhibhiliya Nya Guage

Gutshulega nya lisine khu Kristo

¹ Kristo a hi tshude gasi hi mane gutshulega nya lisine. Khu kharato, tiyani mugutshulegani gwanu, mu nga bweleli hwane mu khala gambe dzikhumbi.

² Wonani, eni Pawulo nyi ngu mi embelani, gukheni: Mwa gu hana wugwera, Kristo mwalo giphaso gwanu.

³ Nyi engedza gambe gu embela vale va hanago wugwera, kheni: Avo va hungidwe khu giguruvedzo nya gulandrise Nayo.

⁴ Enu mu dwanelago gu gulandrisani Nayo mu ngu dzi hambanisa ni Kristo; gambe mu mwalo wuhigo wa Nungungulu.

⁵ Gasi ethu hi na ni gutumba gukhethu Kristo a na hi hakha; khiso hi tumbago khu tshivba nya Liphuvbo nya Guage hi yi manago khu gukhodwa.

⁶ Kholu, na hi tshanganisidwe ni Kristo, gu hana ni gumba hana wugwera kha si phasi gilo. Egi gi phasago khu gukhodwa gu dzi wonegisago khu mithumo ya lihaladzo.

⁷ Enu mu phede khu gu gimbila gwadi. Ginani gi nga mi tandregisa gu landrisa lisine?

⁸ Giguruvedzo gyogyo kha giti khu ga wule a mi ranidego.

⁹ Mela wudugwana wu ngu gugumugisa wuguvbi watshavbo.

¹⁰ Eni nyi ngu mi tumba khu ga Pfhumu. Nyi ngu tumba gukheni mu na wuya lisineni, gasi oyu a wusago pfilupfilu vbakari gwanu a na hakha tsayiso yaye.

¹¹ Vandruye, nari pwani eni nya gu hevbudza nayo nya wugwera, khu ginani nyi nga gu saniswago? Kholu nari pwani kharato, mahungu nyi tivisago ya Kristo a khokhothedwego vbagihambanotunu ma di si vbweti gu khala gikhunguvanyiso ga muthu.

¹² Gasi khu mahungu ya ava va mi garadzago, gukheni a diri tshukwana va dzegela gu dzi thena si vbela.

Gutshulega nya lisine khu lihaladzo

¹³ Gasi enu vandruye, mu ranedwe guvbanya na mu tshulegide. Aholu mu nga dzegi gutshulega gwanu mu gu gira ndzila nya gutsakise gunavela nya tumbunugo nya wuthu; thumelanani khu lihaladzo.

¹⁴ Kholu Nayo watshavbo wa gu tadzisega ga nayo moyo basi wu rumago, khuwo: “Haladza muthu kwanu nga edzi u dzi haladzago khidzo uwe mune.”

¹⁵ Aholu enu mwa gu vbanya nga sirengo, mu gu hodzana ni gu bayisana, dzi woneleni, mu nga hegisa khu gu vbedzana khu gyanu.

Tumbunugo nya wuthu ni Liphuvbo la Nungungulu

¹⁶ Esi nyi vbwetago gu mi embela khesi: Dzi ningedzeleni mu gimbidziswa khu Liphuvbo la Nungungulu, mu nga dzi digi mu gu ndrindrwa khu gudogorela nya tumbunugo nya wuthu.

¹⁷ Kholu, esi si godwago khu tumbunugo nya wuthu, si ngu dwana ni esi si godwago khu Liphuvbo la Nungungulu; ni esi Liphuvbo la Nungungulu li si golago, si ngu dwana ni esi si godwago khu tumbunugo nya wuthu. Silo sesi sa sivili si hambane. Khiso si girago mu si dzi kodzi gu thuma esi mu si suvago.

¹⁸ Gasi enu mwa gu gimbidziswa khu Liphuvbo la Nungungulu, kha mu nga gu fumedwa khu Nayo.

¹⁹ Kholu mithumo ya tumbunugo nya wuthu yi wonegisidwe hiyo dhunya; kheyi: Wubhayi, wuphuphulu, horo,

²⁰ gukhozela vanungungulu nya malipha, guphasela sithombe, sikwembu ni wutumbe, livengo, gudwanisana, wufu, likhulo, dzihanyi, guwandra, guwugelana khu mitsawa;

²¹ lidiwo, wughevenga, wubewudzi, limidzo, wubhemba ni silo nya nga esi; nyi ngu mi laya, kha nga nyi talago gu mi embela khu gale, kheni: Oyu a girago silo nya nga esi, gima kha na nga hodza thomba nya Mufumo wa Nungungulu.

²² Gasi mithumo ya Liphuvbo la Nungungulu, kheyi: Lihaladzo, litsako, gurula, gutimisela, gu dzi ningedzela, ndruda, wuwadi, gutumbega,

²³ gu dzi rudzisa, gu hunga monyo. Mwalo Nayo wu dzi kodzago gu wugela silo nya nga esi.

²⁴ Ava va gu va Kristo Jesu va khokhothede vbagihambanotunu tumbunugo nya wuthu wawe ni gudogorela gwawe gwatshavbo.

²⁵ Ha gu bani hi gu vbanya khu Liphuvbo, hongoleni gambe hi landre mithumo ya Liphuvbo.

²⁶ Hi nga khali vathu nya matshandza, hi wugelana ni gu girelana lidiwo.