Vagalatiya 1 - Bhibhiliya Nya Guage

Gulosa

¹ Eni Pawulo, nyi ranidwego gu khala mupostoli, khandri nyi di ranwa khu vathu, mwendro khu guruma nya muthu, aholu nyi di ranwa khu Jesu Kristo ni Nungungulu Babe, a nga wusago Jesu khu ga vafudego;

² eni gumogo ni vandruye vatshavbo va guromo avba, hi ngu losa mitshangano yatshavbo nya vakhodwa va tigoni ga Galatiya.

³ Wuhigo ni gurula gwa Nungungulu Babe wathu ni gwa Pfhumu yathu Jesu Kristo gu na khale ni enu.

⁴ Uye a dzi ningede a gu songwa khu kotani nya sighoho sathu, gasi a hi tshule ga litigo leli nya guvivbe hi vbanyago ga ilo, gu tadzisega kharati guhaladza gwa Nungungulu Babe wathu.

⁵ Wudhumo wu na vegwe gwaye kala gupindruga. Amen!

Yi mwalo yimbe Ivhangeli

⁶ Nyi ngu liwuga ngudzu khu gu wona gukheni kha mwa hwela gu diga oyu a nga mi ranago khu lihaladzo la Kristo, mu gu landrisa yimbe “Ivhangeli” nya guhambane.

⁷ Khandri gukhwatshi yomo yimbe Ivhangeli, aholu, vomo vathu nya gukari va girago pfilupfilu vbakari gwanu, va dwanela gu mi hambanisa, mu gu ghoha Ivhangeli ya Kristo.

⁸ Gani khu mani mumbe muthu a na tago ata mi tivisa yimbe Ivhangeli nya guhambane ni eyi hi mi tivisidego ethu, a na vadwe. Ambari nari eni mune, ambari nari ngilozi nya gute khu Ndzadzini!

⁹ Kha nga hi mi embedego, hi ngu engedza gambe gu mi embelani khethu: Muthu a na mi hevbudzago yimbe Ivhangeli nya guhambane ni yile mu yi hakhidego a na vadwe.

¹⁰ Ina nya gu gola ngudzu gu zundzwa khu vathu guvbindra gu zundzwa khu Nungungulu, gani? Mwa gu alakanya gukhenu nya gudwanela gu tsakisa vathu, gani? Nari gu khwatshi khiso nyi si dwanelago, na nyi siri githumi gya Kristo.

Khu Nungungulu a nga rana Pawulo

¹¹ Vandruye, dzitini gukhenu Ivhangeli nyi mi tivisidego kha yi dugeli ga vathu;

¹² kha nya yi hakha mwendro gu yi hevbula ga muthu, aholu, khu Jesu Kristo a nyi tuledego gu yiti.

¹³ Nyi ngu tumba gukheni mu pwide na va gu ganela khu edzi nyi nga bani nyi gu vbanya khidzo na nyi nga gu landrisa nayo wa Vajudha. Mu ngu dzitini gukhenu nyi di gu sanisa khu tshivba Libandla la Nungungulu, nyi zama gu li fuvisa.

¹⁴ Nyi di pala vangi nya tanga yangu va tigoni gwathu khu gu vegisa Nayo wa Vajudha, gambe nyi di gu khathalela ngudzu gu landrisa tumbunugo nya mavbanyelo ya vababe.

¹⁵ Aholu, Nungungulu, khu wuhigo waye, a nyi hathide na nyi ngari ndrani ga mayi wangu, a nyi ranela guta mu thumela. Gikhati a nga dzinago,

¹⁶ a di nyi tulela guti Mwanaye, gasi nyiya tivisa Mahungu yaye nya Yadi ga va nya mayigo. Gima kha nya hongola nyiya lomba wusingalagadzi ga muthu,

¹⁷ gambe kha nya bwelela Jerusalema nyiya manana ni vale va nga hegulago khavo gu khala vapostoli. Aholu nyi di hongola tigoni ga Arabhiya. Khu hwane nya matshigu nyi di wuya gambe dhoropani ga Dhamasiko.

¹⁸ Na yi vbede myaga miraru, nyi di hongola Jerusalema gasi guya manana ni Pedro; nyi khade naye likhumi na livbandre matshigu.

¹⁹ Kha nya wona mumbe mupostoli vbavbandze ga Jakobe, ndruye wa Pfhumu.

²⁰ Esi nyi mi lovelago lisine. Nungungulu i fakazi nya gukhuye khandri malipha nyi ganelago.

²¹ Khu hwane nya matshigu nyi di phara ndzila nyi hongola mayigoni ya Siriya ni Silisiya.

²² Vandruye nya mabandla ya tigoni ga Judheya va di si nyiti khovbe ni khovbe.

²³ Va dipwa basi khu ndruma gupwani: “Wule a nga bani a gu hi sanisa, olu a ngu tivisa mahungu nya gukhodwe, a nga vbweta gu ma fuvisa”

²⁴ Va di dhumisa Nungungulu khu eni.