Tito 3 - Bhibhiliya Nya Guage

Mavbanyelo nya wukristo

¹ Laya vatshavbo ava u va thangelago, va yingela mufumo ni vafumeli; va dzumele gu gira satshavbo esi nya sadi.

² Va laye va si ganeli guvivba khu muthu, aholu, va khale khu gurula ni wuwadi, vari ni mavbanyelo nya yadi ga vathu vatshavbo.

³ Kholu, gale ethu nethu hi diri mwalo mapimo, hi di si yingeli, hi diri sipumbu, hi diri dzikhumbi nya gunavele silo satshavbo nya guvivbe; hi diri vathu nya guvivbe ni wufu. Hi di gu vengwa khu vatshavbo, a nethu hi di gu vengana.

⁴ Aholu, olu Nungungulu, Muvbanyisi wathu, yeyedzide wuwadi ni lihaladzo laye ga vatshavbo.

⁵ Uye a hi vbanyiside khu kotani nya lihaladzo laye basi, nasiri khu kotani nya mithumo yathu nya yadi. Nungungulu a hi agiside khu tshivba nya Liphuvbo nya Guage; a hi velegide nyaluphye a gu hi ninga guvbanya nya guphya.

⁶ Nungungulu giride wuhindzi a hi ninga Liphuvbo laye nya Guage khu ga Jesu Kristo Muvbanyisi wathu.

⁷ Giride kharato, gasi khu wuhigo waye hi fela gu hakhwa khu Nungungulu, hi mane guvbanya nya gupindruge hi gu lindredego.

Milayo ga Tito

⁸ Gihevbudzo gegi gi tiyide. Nya gu vbweta uwe u simame ni mahungu yaya, gasi vale va khodwago ga Nungungulu, va dzi garadze khu gu gira esi nya sadi. Esi silo khyadi, gambe si ngu phasa vatshavbo.

⁹ Aholu, nyenya guganedzisana khu silo nyamba phasa gilo, khu longoloko nya malina ya vakokwe, ni gu dwanisana khu mahungu nya nayo; silo soso satshavbo kha si phasi gilo, si mwalo lisima.

¹⁰ Oyu a wusago guhambana vbakari gwanu mu kawuke gumogo, ambari guvili; hwane nya ugo u nga mu theli gambe kota.

¹¹ Kholu u ngu dziti gwadi nya gukhuwe muthu nya guralo mwalo gambe rendre. Sighoho saye sa gu yeyedza gupwani ndreyide.

Sileletelo nya Guhegise

¹² Nya gu rumela iyo gwago Aritema mwendro Tikiku, gira tshivba nya gute uta manana ni eni dhoropani ga Nikopoli, kholu nyi dzi vegisede guya khala iyo nango yatshavbo nya girame.

¹³ Phasa Zena, mutshamuseli nya nayo ni Apolo khu satshavbo esi si vbwetegago gu dongisela liendro lawe.

¹⁴ Vandriyathu gu vbwetega va hevbula gu gira esi nya sadi ni gu phasa ava va hamugago, gasi guvbanya gwawe gu ninga giphaso.

¹⁵ Vatshavbo nyi gu navo eno va ngu gu losedzela ngudzu. Losedzela dzipari dzathu khu gukhodwa. Wuhigo wa Nungungulu wu na khale ga enu mwatshavbo.