Rute 2 - Bhibhiliya Nya Guage

Rute a ngu ya roledzela sivbila

¹ Nowemi a diri ni nongo wa mwama waye, uye a diri mwama nya guthavisege ni wutetema, nya linyangwa la Elimeleki. Lina laye a diri uye Bhowazi.

² Rute, nya lifumbu la Mowabhi, a di embela Nowemi, khuye: “Nyi dige nyi hongola thembweni nyi ya roledzela mitshaledwa nya sivbila ga uye a na gu nyi girelago wuhigo.” Nowemi a di mu embela, khuye: “Indra, mwanangu.”

³ A di hongola aya bela thembweni gasi gu roledzela sivbila khu hwane ga vavbweri, aholu gu di ya kotsana gu lithembwe lolo li diri la Bhowazi, nongo wa Elimeleki.

⁴ Khu guralo, Bhowazi a di vboha na guta khu Bhetlehema, a ta embela vavbweri, khuye: “Pfhumu Nungungulu a na khale ni enu!” A navo va mu phindrula, khavo: “Pfhumu Nungungulu a na gu kategise!”

⁵ Khu hwane, Bhowazi a di wudzisa lidzaha laye, a nga li emisa gu khala muthangeli nya vavbweri, khuye: “Nyamahegyane wa mani oyu?”

⁶ Muthangeli nya vavbweri a di mu phindrula, khuye: “Oyu nyamahegyane nya lifumbu la Mowabhi a nga wuyago ni Nowemi khu tigoni ga Mowabhi.”

⁷ A di ta nyi lomba, khuye: “Nyi dige nyi landrisela khu hwane ga vavbweri nyi roledzela sivbila sesi, si tshaledzelago. Khu guralo, dzude gukhugela ni dzimindru kala olu, gi mwalo ni gikhatinyana a nga belago nyumbani a hefemula.”

Bhowazi a ngu ganela khu githawo ni Rute

⁸ Khavbo avbo, Bhowazi a di ganela ni Rute, khuye: “Yingisa, mwanangu! U nga dugi thembweni momu, u ya roledzela ga mambe marembwe; khala ni sithumi sangu nya vanyamahegyane.

⁹ U na khedzisela lithembwe va na hongolago va ya vbwera, u va landra khu hwane. Nyi layide madzaha yangu gasi ma si gu khuhi; wa gupwa lidora gimbila mikanvuni u ya sela mati ayo ma regidwego khu madzaha yangu.”

¹⁰ Khu guralo, uye a di khidzima a tsitsa khovbe vbavbatshi, a ganela, khuye: “Khu ginani u nyi girela wuhindzi, na wu gu wona gukhuwe eni nyi wa mayigo?”

¹¹ Bhowazi a di phindrula, a mu embela, khuye: “Nyi bikedwe satshavbo esi u giredego nasale wago gukhugela nya gufe mwama wago; gupwani u digide babe wago ni mayi wago ni litigo lago nya mavelego, u ta ga litigo leli u si litigo.

¹² Pfhumu Nungungulu a na gu bweledzele mithumo yago, u hakha tshatshazelo nya yikhongolo khu ga Pfhumu Nungungulu wa Israyeli, Uye u dzudego vbavbatshi nya dzimbapi dzaye gasi guta mana wuthavelo.”

¹³ Rute a di hakha, khuye: “Mune wangu, nyi na mane wuhigo mbeli gwago, kholu u nyi tangadziside, u ganede monyoni ga githumi gyago ambari nyi si gu moyo nya githumi gyago nya nyamayi.”

¹⁴ Na gi vbohide gikhati nya guhodze, Bhowazi a di mu embela, khuye: “Hidzimela avba u ta hodza gibaba, naganisa gipandre gyago khu vbenyu.” Uye a di khala khu bambe ga vavbweri, va mu ninga dzitshota nya tirigu nya gugadzingwe a hodza, a khura, bwelo khavbo dzi tshala.

¹⁵ Rute na khugide guya guvbweratunu, Bhowazi a di leletela sithumi saye, khuye: “Ambari vbafuvbi ni dzinyandra mu digeni a roledzela; mu nga mu himbedzeli.

¹⁶ Gambe digani dzi thega dzinyandra nya gukari na dziri ni sitsatsa nya tirigu, gasi uye a roledzela, mu nga mu himbedzelini.”

¹⁷ Rute a di roledzela thembweni mule, kala vbasilambotunu; a vbula iso a nga rolago, gukiyela vbadugwana gu tadza efa nya tirigu.

¹⁸ A di dzega tirigu yoyo a wuya nayo dhoropani; nasale waye a di wona esi a nga ya si manago; a di dusa gambe esi a nga si tshiyago gikhati a nga hodza.

¹⁹ Khavbo avbo, nasale waye a di mu wudzisa, khuye: “U roledzede hayi muhuno? U di ya thuma hayi? A na kategiswe muthu yoyo a gu hakhidego!” Uye a di embela nasale waye, khuye: “Muthu nyi thumidego thembweni gwaye muhuno, lina laye khu Bhowazi.”

²⁰ Khavbo avbo, Nowemi a di embela ngadzamwane waye, khuye: “A na kategiswe khu Pfhumu Nungungulu, kholu girede wuhindzi ga avo va vbanyago ni vafudego.” Nowemi a engedza gambe, khuye: “Mwama yoyo, nongo wathu. Moyo nya valongo vathu nya lisine.”

²¹ Rute nya lifumbu la Mowabhi, a di engedza, khuye: “A nyi embede gambe, khuye: U nga hambani ni sithumi sangu kala si vbedza gu vbwera dzimbewu dzangu.”

²² Nowemi a di embela ngadzamwane waye Rute, khuye: “Mwanangu, gu diri gwadi gu u gimbila ni sithumi saye nya vanyamayi, gasi va si gu mani ga mambe marembwe.”

²³ Khu kharati, uye a di longoloka gumogo ni sithumi nya vanyamayi sa Bhowazi, umo nya guvbwere, kala va vbedza guvbwera sivbila ni tirigu. Aholu, uye a di khala ni mayinasale waye.