Rute 1 - Bhibhiliya Nya Guage

Nowemi ni Rute

¹ Ga gikhati valamuli va nga bani va gu fuma, gu di manega ndzala tigoni ga Israyeli. Mwama nya gukari wa Bhetlehema tigoni ga Judha, a di hongola ni mwangadzi waye gumogo ni sanana saye sa sivili aya luvela tigoni ga Mowabhi.

² Mwama yoyu a di gu ranwa gupwani khu Elimeleki, lina la mwangadzi waye khu Nowemi, malina ya sanana saye khu Maloni ni Khiliyoni. Va diri sivelegwa sa Ewufrate, wa Bhetlehema, tigoni ga Judha. Va vbohide tigoni ga Mowabhi, va ya vbaha iyoyo.

³ Elimeleki mwama wa Nowemi a difa; a tshala mwangadzi waye ni sanana saye sa sivili.

⁴ Iso si di dzega vagadzi nya lifumbu la Mowabhi, moyo a ranwago gupwani Orifa, mumbe pwani khu Rute. Va khade tigoni mule gipimo nya likhumi myaga.

⁵ Maloni ni Khiliyoni va difa navo khu wuvili wawe, nyamayi yoyu a di tshala enga khu gu fedwa khu mwama waye ni sanana saye sa sivili.

⁶ Khavbo avbo, a di khuga gumogo ni vagadzamwane vaye va vavili khu tigoni ga Mowabhi, kholu va di pwide nya gupwani Pfhumu Nungungulu kategiside vathu vaye, khu gu va ninga guhodza nya gungi.

⁷ Avbo a khugidego khu tigoni a nga bani nari umo, gumogo ni vagadzamwane vaye va vavili. Na vari ndzilani nya gubwelele tigoni ga Judha,

⁸ Nowemi a di embela vagadzamwane vaye, khuye: “Bwelelani! Muthu ni muthu a na hongole nyumbani ga mamayi waye; Pfhumu Nungungulu a na mi kategise, kha nga idzo mu thumidego khidzo avbo gwangu ni ga valifutu.

⁹ Pfhumu Nungungulu a na mi ninge gurula, ga moyo ni moyo nya enu, mudzindrangani ga vama vanu.” A di va bhejari a vbanganana navo. Aholu avo va di lila khu lito nya gukhugege.

¹⁰ Va mu embela, khavo: “Ahihi! Ethu hi na bwelela nago tigoni gwanu.”

¹¹ Nowemi a di va phindrula, khuye: “Gimbilani vanavangu, mu na hongolela ginani ni eni? Ina kamwe mahembeni gwangu gu ngari gambe ni sanana, nya guyele gu mi dzegani gambe, gani?

¹² Bwelelani, vanavangu, indrani kholu eni nyi gumbide ngudzu kha nyi yeli gudzegwa gambe khu mwama, ambari nari gupwani nyi di mi embelani gukheni: Nyi nga gu lindrela isoso, mwendro wutshigu wowu nyi na tshangana ni mwama, nyi velega sanana nya sikhwathana.

¹³ Ina enu mu di hadza gu lindrela kala si dandra nyamba dzegwani, gani? Ahihi, vanavangu! Isoso si ngu nyi pwisa ngudzu wuvi guvbindra enu; kholu gyandza gya Pfhumu Nungungulu gi nyi bweledzede hwane.”

¹⁴ Avo va di lila nyaluphye. Orifa a di khuga a bhejari nasale waye, a hongola; khu guralo, Rute a di simama gu mu bangaladza.

¹⁵ Nowemi a di mu embela, khuye: “Wona gukhuwe dzegwa kwanu, bwelede tigoni gwawe ni ga vanungungulu vawe. Khu guralo, uwe nuwe bwelela kha nga dzegwa kwanu.”

¹⁶ Aholu Rute a di hakha, khuye: “U nga nyi gurumedzi gu gu diga, nyi hambana nago, kholu umo u na hongolago, nyi na hongola neni, ni avbo u na gu lalago vbawutshigutunu, nyi na lala neni avbo; litigo lago, litigo langu neni, Nungungulu wago, Nungungulu wangu neni.

¹⁷ Avbo u na felago avbo, a neni nya gu vbweta gufela avbo, nyi dzingwa avbovbo neni. Pfhumu Nungungulu a na nyi tsayise ngudzu, gambe a engedzela nya gukala nyi dzumela silo nya nga esi, gu nyi hambanisa nago vbavbandze nya lufu.

¹⁸ Nowemi, na wonide gukhuye ngadzamwane waye, a dzi emisede guhongola naye, a di degula a si regeri gambe khiso.

¹⁹ Khu guralo, va di hongola vatshavbo kala va nga vbohago Bhetlehema. Na va gu bela Bhetlehema, lidhoropa latshavbo li di samala khu mahungu yawe, va ganela, khavo: “Khandruye oyu Nowemi, gani?”

²⁰ Aholu uye a di va embela, khuye: “Mu nga nyi rani gambe Nowemi; aholu nyi raneni khenu Mara, kholu mune nya Tshivba Yatshavbo a nyi woniside mihimbo.

²¹ Nyi khugide nyi na tade, aholu Pfhumu Nungungulu a nyi wuyiside na nyiri liphanga; khu ginani mu nga gu nyi ranago gambe Nowemi? Kholu Pfhumu Nungungulu a nyi dzudzugide, ni mune nya Dzitshivba a nyi thede wuvi nya wukhongolo.

²² Khu guralo, Nowemi a di wuya ni ngadzamwane waye Rute, nya lifumbu la Mowabhi, na va gukhugela khu tigoni ga Mowabhi; va di vboha Bhetlehema guphelani nya fanyele sivbila.