Obhadhiya 1 - Bhibhiliya Nya Guage

Sighoho ni tsayiso wa Edhomi

¹ Giwoniso gya Obhadhiya. Pfhumu Nungungulu a ngu ganela kharati khu kotani ya Edhomi, khuye: “Hi pwide magana ya Pfhumu Nungungulu ni moyo nya girumwa a rumedwego ga mayigo ya vbavbandze, a ganela, khuye: Khugani mu eme! Hongoleni hi wugela Edhomi hi ya mu sasela.

² Wona nya gukhuwe nyi gu giride nuri moyo nya dugwana vbakari nya mayigo; va gu hembulude ngudzu.

³ U sengidwe khu matshandza ya monyoni gwago, kha nga uye a vbanyago dziphagoni nya siwindri, u vbahidego vbatshani yoyo nya sigomo, na wu gu ganela khu monyoni gwago, khuwe: Khu mani a na nyi redago nyi thega vbavbatshi.

⁴ Ambari wa gu vbuvba nga lighama, u ya vbaha gihaga gyago vbakari nya dzinyeledzi, eni nyi naya gu pfhungumula, a ngu ganela Pfhumu Nungungulu.

⁵ Naripwani dzimbafa ni vaphangi va gu gu tela vbakari nya wutshigu, kha nga olu u mbembisidwego, ina kamwe kha va nga hadza gu gu phanga khedzi va dzi kodzago khidzo, gani? Ahati va vbweri nya dziuvha, va gu gu vbohela, dzi mwalo va na gu dzi tshiyago khu gumba dzi wona, gani?

⁶ Dzi phangidwe kharini dzithomba dza Esawu! Va tugude kharini malanga a sihago umo silo saye!

⁷ Mayigo yatshavbo u pwananago navo, ma gu pengiside ma gu yisa vbavbandze nya litigo lago; ni avo va londrolago gurula gwago va gu pfhadzide va gu pala; ni avo va hodzago guhodza gwago, va gu dembede naphwi migondroni gwago; tigoni gwa Edhomi, wu mwalo pwanano.

I. MILOMBELO KHU JUDHA NI NINIVHA

⁸ Pfhumu Nungungulu a ngu ganela, khuye: Khu litshigu lolo, nyi na songa vagengeli va Edhomi, vathu va hevbudego ngudzu va gigomoni gya Esawu.

⁹ Uwe Temani, dzindrena dzago dzi na thedwa hwanga, dzi mbembiswa dzatshavbo gigomoni gya Esawu khu gu songwa.

Givangelo nya tsayiso

¹⁰ Khu kotani nya olu u nga wugelago ndriyago Jakobe, u na fenengedzwa khu dzitshoni, u mbembisedwa muphelo.

¹¹ Litshigu uwe u nga bani nuri mbeli gwaye, litshigu lile valombo va nga bani va gu phanga thomba yaye, va nya mayigo va nga bani na va gu bela khu dzinyangwani gwaye va gira nyatumbatumbane khu Jerusalema, uwe nuwe u diri moyo nya avo.

¹² Gambe uwe u diri mwalo fanelo nya gutsake khu gu khevisela litshigu la ndriyago, litshigu ndriyago a thegedwego khu libango; ambari gu tsakiswa khu gu wona gumbembiswa ga va na Judha, ambari gu ganela khu matshandza avbo u nga mu wona na gu tshaniseka;

¹³ u diri mwalo fanelo nya gubele khu mwanya wa vathu vangu, litshigu vathu vangu va nga thegedwago khu libango; ambari gu tsaka khu gu va wona na va gu tshaniseka, litshigu va nga thegedwa khu libango, ambari gu thawuludza mandza yago u phanga thomba yawe litshigu va nga thegedwa khu libango.

¹⁴ U diri mwalo fanelo nya gueme khu mahandzakanyani nya dzindzila, gasi gu mbembisa avo va nga vbulugago va tutuma, ambari gu ningela avo va nga tshalago litshiguni nya gusasedwe.

Litshigu la Pfhumu, gupala ga Israyeli

¹⁵ Kholu litshigu la Pfhumu lomo vbafuvbi, ga mayigo yatshavbo, a nata gu gira kha nga idzo u nga girago khidzo vakwanu; wuvivbi wago wu na thegela hungoni gwago.

¹⁶ Kholu, gikombe mu nga sela khigyo gigomoni gwangu nya gukatege, kharato nugo ma na sela khigyo mayigo yatshavbo; va na sela ni giminya gukhwatshi gu diri mwalo gilo.

¹⁷ Aholu gigomoni gya Siyoni va na manega avo va nga vbulugago; va na bani va kategide; lihundzu la Jakobe, li na fuma dzithomba dzawe.

¹⁸ Lihundzu la Jakobe, li na khala nilo; lihundzu la Josefe li na khala malavbelavbe; lihundzu la Esawu li na bani liri mavivi, va na rothana khu gyawe va dagarela; mwalo a na tshalago gambe wa nyumbani ga Esawu, kholu Pfhumu Nungungulu a ganede.

¹⁹ Avo va Negebhi va na fumela gigomo gya Esawu; avo va mapanini, va na khozisa litigo nya Vafilisitiya, va na phanga gambe marembwe ya Efrayimi ni ya Samariya, Bhejami a na fuma litigo la Gileyadhi.

²⁰ Vadwani nya nyimbi va Israyeli va vbanyago kha nga sibotshwa vbakari ga Vakhanani va na fumela mayigo ya Vakhanani kala Serapita sibotshwa sa Jerusalema si guromo Sefaradhe, si na fumela madhoropa ya Marandzi.

²¹ Avo va nga palago va na gwela gigomoni gya Siyoni, gasi guya lamula gigomo gya Esawu, mufumo wakone wu na bani wuri wa Pfhumu Nungungulu.