Nehemiya 9 - Bhibhiliya Nya Guage

Gu dzi laya ni gu dawulela sighoho

¹ Khu litshigu nya magumavili na mana nya ngima yoyo, va na Israyeli va di tshangana va hala na va ambade dzisaku na va phorode hungoni khu kudzudzwane.

² Va na Israyeli va di dzi hambanisa ni mambe mayigo, va ema va dzi laya khu kotani nya sighoho sawe ni sa vababe vawe.

³ Na va emide malangani gwawe, va hevbuledwa Libhuku nya Nayo wa Pfhumu Nungungulu wawe, gipandre nya wu na khu litshigu; gimbe gipandre nya wu na, va di dawulela sighoho sawe ni gu khozela Pfhumu Nungungulu wawe.

⁴ Jesuwa, Bhani, Kadimiyeli, Sebhaniya, Bhuni, Serebhiya, Bhani ni Kenani va di emide vbawutalatunu nya mapulango ya na Levhi, va di huwata khu lito nya likhongolo ga Pfhumu Nungungulu wawe.

⁵ Aholu va na Levhi Jesuwa, Kadimiyeli, Bhani, Hasabhineya, Serebhiya, Bhani, Hodhiya, Sebhaniya ni Petaya va di ganela, khavo: “Khugani hi rungudza Pfhumu Nungungulu wathu, khu gupindruga kala gupindruga. Avo va di ganela, khavo: Li na bongwe lina lago li zundzegago, li kategidego ni guvbindra gudhumiswa gwatshavbo.”

Nombelo wa na Levhi

⁶ Uwe Pfhumu khuwe basi, u giride gupindruga gwa ndzadzini gu khusegidego ngudzu, ni mabutho yatshavbo nya sivangwa saye, mafu ni satshavbo si guromo umo, yiphwa ni satshavbo si manegago umo; khuwe u vbanyisago sivangwa satshavbo, ni sivangwa sa ndzadzini si ngu gu khozela.

⁷ Khuwe, Pfhumu Nungungulu, U hathidego Abrama, U mu dusidego khu tigoni ga Uri, ga Vakalidhiya, U mu ninga lina la Abrahama.

⁸ U mu wone nari ni monyo wu tumbegidego, U gira naye gidzumeledzwano, U mu tumbisa gu mu ninga livelego nya gutale tigoni ga Vakhanani, ga Vaperezi, ga Vajebhuzi ni ga Vagirigasi, U tiyiside magana yago, kholu uwe u lulamide.

⁹ U wonide gusaniseka ga vababe vathu tigoni ga Egipito, U pwide huwa yawe vbafuvbi ni yiphwa nya Gufuvile.

¹⁰ U giride siwonegiso ni sisamadziso ga Faro, ni ga sithumi saye satshavbo ni ga vathu va tigoni gwaye gwatshavbo, kholu U di gu dziti gukhuwe va di tshanisa khu dzihanyi vababe vathu, U dandrisa lina lago hi li wonago kala na muhuno.

¹¹ U kabaniside yiphwa khu vbakari mbeli gwawe, va vbindra khu vbakari na gu bangide; aholu u di mbembisa valala vawe kha nga giwindri gi rikisidwego nondrwani.

¹² Vbamihanitunu, uwe U di va thangela, khu mwedzi nya lipfhi, vbawutshigutunu U va thangela khu mwenge nya nilo, gasi gu wenengedza ndzila va yelago gugimbila khiyo.

¹³ U tshigide vbatshani nya gigomo gya Sinayi, nuri khu ndzadzini U ganede navo, U va yeyedza esi nya gululame, milayo nya lisine, sileletelo ni sirumo nya sadi.

¹⁴ U va giride vati litshigu lago nya guage Sabhadho, khu lito la githumi gyago Mosi, U va tivisa sirumo, sileletelo ni nayo.

¹⁵ U va ningide guhodza gwa ndzadzini, gikhati va ngapwa ndzala, gikhati va ngapwa lidora, U di va sedza mati nya guduge khu giwindrini gasi gu tshima lidora. U va leletede gubela ga litigo U sambanyidego gu va ninga.

¹⁶ Aholu avo gumogo ni vababe vathu, va di gu yeyisa va gira matshandza ni gu bangisa dzithamo dzawe va si gu thumeli, va si yingisi milayo yago.

¹⁷ Va di bomba gu gu yingisa, va si alakanyi gambe siliwugiso U giridego vbakari gwawe, va di bangisa mihungo yawe, khu guyeyisa gwawe, va di dzi hathela muthu gasi a va thangela gu bwelela wugumbitunu, aholu uwe, U Nungungulu U dzi emisedego gu tsetselela, na wuri ni wuhigo, nu tade khu wuhindzi, U hwelago gu goroga na wu tade khu wuhindzi, khu guralo, Uwe khwa va pfhuralela.

¹⁸ Ambari gikhati va nga dzi wumbela gimombyana nya gupfhudwe khu simbi, va ganela, khavo: Khuye oyu Nungungulu wanu a mi dusidego khu tigoni ga Egipito; va gira guvivba gu nyenyezidego ngudzu.

¹⁹ Ambari khu guralo, Uwe khu kota nya wuhindzi nya wungi ngudzu, khwa va diga giwulani. Lipfhi li di va thangela gasi gu va gimbidzisa mihani yatshavbo ndzilani gwawe, vbawutshigutunu va di thangedwa khu mwenge gasi gu wenengedza ndzila va yelago gu gimbila khiyo.

²⁰ U va ningide liphuvbo lago nya ladi gasi li va hevbudza, gima khwa va himbedzela gu hodza manaha yago, ni gu va ninga mati nya gutshime lidora.

²¹ Khu magirelo yoyo, U di va hodzisa giwulani gipimo nya magumana myaga, gima kha va nga hamuga gilo ni dzingandzu dzawe gima kha dza nga hagala, ni mawundru yawe kha ma nga simba.

²² Bwelo khavbo U va ningide mifumo ni mayigo yawe, U ma kabanisela khu sipandre, khu guralo, va di fumela litigo la Seyoni, litigo la mufumeli wa Hesibhoni ni litigo la Ogi, mufumeli wa Bhasani.

²³ U di andrisa livelego lawe li tala kha nga dzinyeledzi dza ndzadzini, U va vbohiside ga litigo U tumbisidego gu ninga vababe vawe.

²⁴ Khu guralo, sanana sawe si bede si ya fumela litigo lolo, U va ningide tshivba nya gupale vamune tigo, a gu Vakhanani, U va ningela mandzani gwawe, gumogo gambe ni vafumeli vawe ni vathu va tigoni momo, gasi va gire guhaladza gwawe khu avo.

²⁵ Va di phanga madhoropa ma bhiyidwego, ni wulime nya gunone; ni gu wandra dzinyumba dzi tadego khu sombo nya lisima, ni milambo nya gukembwe nya mati, ni marembwe nya vhinya ni miolivha, ni misimbo nya yingi nya mihandro; va di hodza kala va khura, va nona, va tsaka khu kotani nya wuwadi wago nya wukhongolo.

²⁶ Ambari khu guralo, va di bomba, va gu wugela va si gu yingisi, va gu pfhurarela va si landrisi Nayo wago. Va di songa vaprofeti vago, avo va nga bani va va embela gasi va vbindrugedza mavbanyelo va bwelela avbo gwago, va bwelo khavbo va gira gunyenyeza nya gukhongolo.

²⁷ Khu guralo, U di va ningela mandzani ga valala vawe, va gu va tshanisa, aholu gikhati va nga bani va tshaniseka, va di lila avbo gwago, Uwe U va yingisa nuri khu vbatshani yoyo ndzadzini. Khu kotani nya wuhindzi wago nya wukhongolo, U va rumede vatshudzisi va ta va vbulugisa mandzani ga valala vawe.

²⁸ Aholu, hwane nya gu bani va pwide wutshukwana, va di wuya gambe va gu ghohela, Uwe U di va pfhurarela U va ningela mandzani ga valala vawe, gasi va khoziswa khavo. Aholu gikhati va nga vbindrugedza mavbanyelo va gu rana, Uwe khu vbatshani yoyo U guromo ndzadzini, U va yingiside. Khu kotani nya wuhindzi wago nya wukhongolo, U va tshudziside dzinyondro nya dzingi.

²⁹ U va dundrugiside va bwelela nayoni gwago, aholu avo khu kotani nya gu dzi dandrise gwawe, kha va yingisa milayo yago, va di hambana ni sileletelo sago, si vbanyisago muthu wule a si landrisago; aholu va di gu pfhurarela va sega dzindzeve dzawe va si gu yingisi.

³⁰ Aholu gu di vbindra myaga nya yingi nu gu va timisela; U va khongotela khu liphuvbo lago, khu magana ya vaprofeti vago, aholu kha va nga gu yingisa. Khavbo avbo, U di va ningela mandzani ga vathu nya mayigo ya vbavbandze.

³¹ Ambari khu kharato, khu kotani nya wuhindzi wago nya wungi, kha wa va diga va mbembisa muphelo, ambari gu va pfhurarela, kholu Uwe, U Nungungulu U gu ni wuhindzi ni gu pwela wusiwana.

³² Gasi olu, Uwe Nungungulu wathu, U Nungungulu nya khongolo U gu ni tshivba yi thavisegidego, U vegedzago gidzumeledzwano ni lihaladzo nya gutumbege; wona nari likhongolo libango leli li thegedego avbo gwathu gukhugela gikhatini ga vafumeli va Asiriya kala na muhuno, ga ethu ni vafumeli vathu, ga vafumeli vathu, ga vaphasi vathu nya mhamba, ga manganagana yathu, ga vaprofeti vathu, ga vababe vathu, ni ga vathu vatshavbo.

³³ Ga satshavbo si hi dugelelago, Uwe U thumide khu gululama, ethu hi gira guvivba.

³⁴ Vafumeli vathu, vathangeli vathu, vaphasi vathu nya mhamba ni vavelegi vathu, kha va landrisa nayo wago ni sileletelo U va ningidego, esi Uwe u nga va khongotela gu si gira.

³⁵ Kholu vbagufumatunu gwawe, kha va gu thumela, ambari na va wonide talo nya dzithomba u va ningidego khu wuhigo wago, tigoni nya gukhongolo nya gunone u va ningidego. Aholu avo va di simama ni mithumo yawe nya guwegele.

³⁶ Nga wona olu muhuno hi gu dzikhumbi; hi dzikhumbi ni tigoni momu u ningidego vababe vathu gasi va hodze mihandro yaye ni gu khadzisega gwadi.

³⁷ Mihandro nya litigo leli ya gu velegelana ngudzu, gasi yi hodzwa khu vafumeli va mambe mayigo, u va vegidego gu hi fumela khu kotani nya sighoho sathu; va gu khozisa sivili sathu khu gugola gwawe gumogo ni mitshambi yathu; khu guralo, hi womo gutshanisekani nya gukhongolo.