Nehemiya 6 - Bhibhiliya Nya Guage

Nala a ngu luga gikungo nya guvbwete gu songa Nehemiya

¹ Avbo Sambalati, Tobhiya, Gesemi, Muarabhi ni vambe valala vathu, va nga wona gukhavo nyi vbedzide guvbahedza libhiyo, ni gukhavo, gu mwalo gambe wulanga wutshadego nyamba vbahedzwa ambari olu gu nga bani gu si gu vegedzedwi malimba omu nya myanya.

² Sambalati ni Gesemi, va di rumela guta nyi embela, khavo: “Delu hi ta tshangana nago gidhoropanani gya Ono.” Kholu va diri ni makungo nya gu nyi songe.

³ Nyi di va rumela mwango nya gu va embele, kheni: “Nyi ngari ni thumo nya guvbahe, khu kharato kha nyi na dzi kodza gu relela nyita iyoyo; kholu thumo wangu wu nga ema khu guta iyoyo.”

⁴ Nyondro dzina na va gu nyi resela gilombo gya gimwegyo; aholu nyi di va ninga phindrulo ya mweyo.

⁵ Khavbo avbo, Sambalati a di rumela gambe mwango nya livbandre, ni lidangalila li nga bani liri mandzani ga githumi gyaye, la sa segwa gilo,

⁶ na li gu ganela esi: “Gu tivisidwe vbakari nya vathu, Gesemi nuye a ngu tiyisa khuye, uwe ni vambe Vajudha va na gyanu, mwa guvbweta gu wugela mufumeli, pima kholu mu vbahedzago libhiyo, na gu ganedwa gambe gupwani khuwe u na gu khalago mufumeli wawe,

⁷ u dzi vegede ni vaprofeti va na tivisago vathu Jerusalema, khavo: Oyu khu mufumeli wa Judha. Khu lisine mahungu yaya ma na vboha dzindzeveni ga mufumeli nya litigo. Khu kharato relela gasi hi ta pimisana khayo.”

⁸ Khu kharato, nyi di rumela mwango nyi mu embela, kheni: Silo soso u ganelago si mwalo, aholu sa gudugela hungoni gwago basi.

⁹ Kholu vatshavbo va di zama gu hi thusedzela khu gu ganela, khavo: “Va na diga guvbaha gasi thumo wu ema.” Nyi di lombelela ga Nungungulu kheni nyi ninge tshivba.

¹⁰ Khu hwane nyi di hongola ga Semaya, mwamana wa Dhelaya, wa Meyetabheli a nga bani a dzi segede nyumbani. A di khuye: “Hongole hatshavbo Nyumbani gwa Nungungulu, hi ya khala khu vbakari ni vbakari hi sega malimba yaye, kholu va nata gu songa, olu kamwe wutshigu wowu va nata gu songa.”

¹¹ Nyi di mu embela, kheni: “Ina muthu nya nga eni, a na kodza gututuma, gani? Gambe, khu mani nya nga eni, a kodzago gu bela wulanga nya guage a duga na guvbanya? Eni gima kha nyi na gira silo nya nga isoso!”

¹² Khu kharato, nyi di tugula gukheni uye kha rumedwa khu Nungungulu guta gira wuprofeti wowu. A di ta nyi embela esi kholu uye a di rengidwe khu Tobhiya ni Sambalati.

¹³ Va di girela ginani esi, va di mu renga gasi a nyi thusedzela nyi fela gughoha khu gu landra sileletelo saye; khu magirelo yaya, nyi di hadza gupoyilega nyi thega dzitshoni.

¹⁴ Khu guralo, nyi di lombelela, kheni: Nungungulu wangu, alakanya esi Tobhiya ni Sambalati, va girago avbo gwangu, u nga divali gu va bweledzela mayelano khu mithumo yawe, ni muprofeti nya nyamayi Nowadhiya gumogo ni vatshavbo vaprofeti avo va nga zama gu nyi thusedzela.

Guvbela nya guvbahedze libhiyo

¹⁵ Thumo nya guvbahedzwe libhiyo wu phede khu litshigu nya magumavili na livbandre nya ngima nya Eluli wu vbedzide livbandre magumi ni matshigu mavili (52).

¹⁶ Gikhati va pwidego esi, valala vathu vatshavbo, gumogo ni va nya mayigo vatshavbo nya vaakelane vathu vatshavbo, va di samala va bwelo khavbo va vbela tshivba, kholu, va di gu wona gukhavo khandri tshivba yathu basi, aholu khu Nungungulu wathu, a hi phasedzedego thumoni momu.

¹⁷ Khu matshigu yoyo, gu rumedwe gambe ga Tobhiya, malangalila nya mangi khu vathangeli va Judha, Tobhiya nuye, a va rumela.

¹⁸ Uye a di gu pwanana ni Vajudha nya vangi khu gisambanyo, kholu a diri mwane wa Sekaniya, mwamana wa Ara. Bwelo khavbo, mwamana waye Jowanani a di dzegide nyamahegyane wa Mesulami, mwamana wa Bherekiya.

¹⁹ Va di ganela magana nya gu mu zundze mbeli gwangu, khavo, a ngu gira silo nya sadi, va bwelo khavbo vaya mu embela iso eni nyi ganedego. Tobhiya a di gu nyi lovela malangalila nya gu nyi thusedzele.