Nehemiya 5 - Bhibhiliya Nya Guage

Sisiwana si ngu vega gikhalo ga sitetema

¹ Gu manegide gikhalo nya gikhongolo khu ga vama ni vanyamayi, khu kotani ya vandriyawe nya Vajudha.

² Kholu gu diromo vambe va nga, khavo: “Ethu ni sanana sathu nya madzaha nesi nya sagadzyana, hi vathu hi tadego ngudzu, hi ningeni mavbila hi hodza, hi kodza gu vbanya.”

³ Vambe va di ganela, khavo: “Ethu hi ngu gurumedzega gu pharisa marembwe yathu nya sivbila, ni ayo nya vhinya, ni dzindranga dzathu, gasi hi mane mavbila nya guhodze.”

⁴ Vambe va di khavo: “Hi di pharisa ni marembwe yathu nya sivbila, ni ayo nya vhinya, gasi hi mane dzitsapawu nya gulivbe khupo ga mufumeli.”

⁵ Gasi khu kharato, ethu ni vandriyathu hi nyama mweyo, ni sanana sathu, si ngu fanana ni sanana sawe; aholu hi ngu gurumedzega gu dzega madzaha yathu ni dzimbiri dzathu dziya khala dzikhumbi, ni olu vambe vanyamahegyane vathu vomo wugumbini. Gimwalo hi yelago gu gi kodza gu gira kholu, marembwe yathu nya sivbila naya nya vhinya kha ma nga gu hi lumba gambe, momo mandzani nya vambe vathu.

⁶ Nyi di vbisega ngudzu gikhati nyi ngapwa gudilela gwawe ni malito va nga bani va gu ganela.

⁷ Na nyi pimiside gwadi, nyi di gorogela vathangeli ni dzindruna, nyi va embela, kheni: “Gasi muthu ni muthu a gu hengisa ndriyaye, gani?” Khu kharato, nyi di va girela tshangano nya wukhongolo.

⁸ Nyi va embela, kheni: “Ethu hi tshudziside khu tshivba yathu yatshavbo vandriyathu nya Vajudha va nga bani va rengisidwe ga va nya mayigo; gasi enu mu ngu rengisa vandriyanu gasi va rengwe khethu, gani?”

⁹ Khu guralo va di havo kape! A hamugega ni moyo nya gu nyi hakhe. Nyi ganela gambe, kheni: “Khandri sadi iso mu girago, mu fanede gu ninga githawo ga Nungungulu wathu, gasi va nya mayigo, a gu valala vathu, va si hi giri givalo.

¹⁰ Eni neni, gumogo ni vandriyangu, ni sithumi sangu, hi va fuyariside dzitsapawu ni tirigu. Nyi ngu mi khongotelani hi si giri libhindzu leli.

¹¹ Nyi gireleni wuhindzi, muhuno kamwe mu va bweledzela marembwe yawe, nya vhinya, miolivha yawe, dzinyumba dzawe, ni gipandre gyawe nya lizana nya dzitsapawu, ni mavbila yawe, ni vbinyu yawe, ni mafura ni esi mu bhindzudego gwawe.”

¹² Khu guralo, avo va di ganela, khavo: “Ina, hi na va bweledzela silo sawe, gimwalo hi na gu va dzegela. Hi na gira iso u ganedego.” Eni nyi di ranisa vaphasi nya mhamba nyita va sambanyisa gasi va gire iso va tumbisidego.

¹³ Nyi di ghubhuta kudzudzwane nya libhadzi langu, nyi ganela, kheni: “Nungungulu a na dzudze kharalo a mu dusa vbavbandze nya nyumba yaye, hwindzo ni silo saye, muthu watshavbo a na gumba tadzisa gifungo gegi. Tshangano watshavbo wu di ganela khuwo Amen. Va di rungudza Pfhumu Nungungulu, va gira kha nga idzo va nga sambanyago khidzo.

¹⁴ Gukhugela litshigu nyi wumbedwego gu khala muthangeli nya litigo la Judha, gukhugela mwaga nya magumavili kala mwaga nya magumararu na mivili nya gufume ga mufumeli Aritaserisi, myaga yeyi nya likhumi na mivili, eni ni vandriyangu kha ha hodza guhodza gu lumbago muthangeli.

¹⁵ Aholu vafumeli va fumidego khu hwane gwangu, va di gurumedza vathu khu gu va hengisa gikhaba, va va dzegela guhodza ni wadwa, ambari gambe va nga bani va va hengisa magumana mipimo nya parata, ni sithumi sawe, si di va tshanisa niso. Aholu eni kha nya thuma isoso, kholu nyi gu ni githawo ni Nungungulu.

¹⁶ Eni gambe nyi di dzi ningela gu wusedza libhiyo, nyi diri mwalo lithembwe, aholu sithumi sangu niso si di thuma khu gupwanana.

¹⁷ Bwelo khavbo, nyi di gu hodzisa lizana ni livbandre magumi (150) vama nya Vajudha ni manganagana ni vambe nya gute khu mayigo nya vaakelane vathu, a diri vapfhumba vathu.

¹⁸ Guhodza nya litshigu ni litshigu a diri mombe ni livbandre na mweyo dzinvuta nya gunone, ni dzikhugu nya dzingi, khu likhumi likhumi matshigu, gu diri ni wadwa nya wungi. Ambari khu kharato, kha nya nga khathala khu gu hengula dzifanelo dzi nyi lumbago kha nga mufumeli; kholu gu di hadza gu khala gilemedzo ga vathu.

¹⁹ Nungungulu wangu, nyi alakanye u nyi kategisa, khu wuwadi watshavbo wowu nyi giredego vathu vava.”