Nehemiya 2 - Bhibhiliya Nya Guage

Nehemiya a ngu rumedwa Jerusalema

¹ Khu ngima nya Nisani, mwaga nya magumavili nya gufume ga mufumeli Aritaserisi, nyi tede vbinyu yi nga bani yiri mbeli ga mufumeli, nyi mu ninga a sela; mufumeli gima kha tshukha a nyi wona na nyi swihade mbeli gwaye.

² Mufumeli a di nyi wudzisa, khuye: “Gasi ginani u gi pwago olu u thuvigago khovbe yago nu si dwali? Guswihala gogo gu yela basi, nari guvbisega nya monyo!” Khu guralo eni nyi di tala khu hwanga,

³ nyi mu phindrula, kheni: “Mufumeli, vbanya kala gupindruga! Nyi na kala nyi si swihali khu ginani, na nyi gu wona lidhoropa va ladego umo vavelegi vangu na li khungumudwe, malimba yakone na ma dagarede khu nilo.”

⁴ Mufumeli a di khuye: “Wa guvbweta gukhuwe olu nyi gu girela ginani?” Khavbo avbo, nyi di lombelela ga Nungungulu wa ndzadzini,

⁵ nyi embela mufumeli, kheni: Nari pwani mufumeli a gu nyi dzumela, nari pwani u ngu salalegiswa khu eni githumi gyago, nyi ngu gu lomba u nyi rumela tigoni ga Judha, dhoropani ma guromo umo marowo ya vavelegi vangu, gasi nyi fela guya li vbahedza.”

⁶ Mufumeli na khade gumogo ni pfhumugadzi yaye, a di nyi wudzisa, khuye: “A gu bani nari lipfhumba nya matshigu mangani? Lini u na wuyago?” Avbo mufumeli a nga nyi dzumedzisa nyi hongola, nyi di mu embela gikhati nya guwuye.

⁷ Khavbo avbo, nyi di embela gambe mufumeli, kheni: Wa gu dzumela uwe mufumeli, nyi di gu gu lomba u nyi ninga malangalila nya guye yeyedza vafumeli va tshatugo nya tsongo wa Ewufrate, gasi va kodze gu nyi diga nyi vbindra nyi thonona guya tigoni ga Judha,

⁸ gumogo ni gu lovela gambe Asafe, musayisi nya magabi ya mufumeli, gasi a nyi ninga misimbo nya guye gira khiyo madingo nya guvbahe myanya nya Nyumba ya Nungungulu ni likhokhola nya lidhoropa, ni nyumba nyi na ya khalago umo. Mufumeli a di nyi ninga satshavbo nyi nga mu lombago, kholu nyi di gu phasedzedwa khu tshivba ya Nungungulu.

⁹ Khavbo avbo, nyi di tshatuga kala khisikheyi nya tsongo wa Ewufrate, nyi ya ningela malangalila ga vafumeli nya sipandrengulu sile. Mufumeli a di nyi ninga masotshwa ni va vakhileli nya dzikavalu gasi va nyi bangaladza.

¹⁰ Avbo Sambalati, nya Muhoroni, ni Tobhiya githumi, nya Muamoni, na va pwide esi, va di vbisega ngudzu, khu gupwani womo muthu nya gukari a dzudego guta girela silo nya gukari va na Israyeli.

¹¹ Khavbo avbo, nyi di vboha Jerusalema, nyi ya manega iyoyo matshigu mararu.

¹² Nyi di wuga ni vbakari nya wutshigu gumogo ni vama nya vadugwana, nyi nga bani na nyiri navo, aholu gima kha nya nga embela muthu iso Nungungulu wangu a nga bani a si thede monyoni gwangu gasi nyi ya si gira Jerusalema; nyi diri mwalo ni gifuyo vbavbandze nya egi nyi nga bani nyi gi khilede.

¹³ Nyi di duga ni wutshigu khu mwanya wa kovatunu, wu thononago ni nambo wa Dragoni, khu phuvbo ga mwanyatunu nya litala, nyi khedza makhokhola ya Jerusalema ma nga bani ma khungumudwe, ni malimba ma nga bani na ma vbisidwe khu nilo.

¹⁴ Khavbo avbo, nyi di vbindra nyangwa nya Gifefe kala lidhamuni ga mufumeli; gu diri mwalo wulanga nya gu vbindre ni girengo nyi nga bani na nyi khilede.

¹⁵ Khu guralo, nyi di gwela ni wutshigu wowo nyiya gitsongwanani nyiya khedza libhiyo; nyi di bwelela nyi wuya nyita bela khu Mwanya wa phuvbo ga Kovatunu.

¹⁶ Manganagana kha ma nga guti umo nyi nga bani nyi hongode, niso nyi nga bani nyi gu thuma; kholu, kala gikhati gyogyo ambari Vajudha, vaphasi nya mhamba, ni manganagana, ni avo va nga bani na va gu gira mithumo, nyi di si gu ganeli gilo gwawe.

¹⁷ Khavbo avbo, nyi di va embela, kheni: Mu ngu wu wona gwadi wusiwana hi gu navo; Jerusalema gu khungumudwe, malimba yaye ma dagarede khu nilo! Khu guralo, deluni hi ta wusa likhokhola la Jerusalema gasi hi si khali gambe gihegiso.

¹⁸ Nyi di va embela gambe khu idzo gyandza nya wuhindzi gya Nungungulu gi nga nyi girela wuwadi, gumogo gambe ni magana ya mufumeli a nga bani a nyi embede. Khavbo avbo, avo va di khavo: “Hongoleni hiya vbaha. Khu guralo avo va di tiya longo gu gira thumo nya wadi.”

¹⁹ Avbo Sambalati, Muhoroni, Tobhiya, githumi nya Muamoni ni Gesemi, Muarabhi, va nga dzipwago, va di hi hega ni gu hi hembulula, va ganela, khavo: “Gasi ginani gyogyo mu girago? Mwa gu vbwetani gu wugela mufumeli, gani?”

²⁰ Khu guralo nyi di va hakha nyi va embela, kheni: “Nungungulu wa ndzadzini khuye a na gu hi phasedzelago thumoni gwathu; ethu sithumi sago hi na vbaha; gasi enu kha mu lumbwi khu gilo ambari malungelo mwendro gialakanyiso dhoropani ga Jerusalema.”