Nehemiya 13 - Bhibhiliya Nya Guage

Va nya mayigo va ngu hambaniswa ni va na Israyeli

¹ Khu litshigu lolo, gu di hevbuledwa vathu Libhuku nya Nayo wa Mosi; libhukuni momo gu di manega na gu lovidwe gupwani va na Amoni ni va na Mowabhi, va si beli gambe tshanganoni wa Nungungulu,

² kholu kha va khinga va na Israyeli va va yisela guhodza ni mati; aholu va di renga Bhalahama gasi a va tshanisa; gambe Nungungulu wathu a di vbindrugedza tshanisa yi khala litsako.

³ Vathu na va pwide Nayo yoyu, va nya mayigo vatshavbo va di hambaniswa ni va na Israyeli.

Tobhiya a ngu tutumiswa Nyumbani ga Nungungulu

⁴ Na gu si gu dugeleli esi, muphasi nya mhamba Eliyasibhi, muthangeli wa nyumbani ga Nungungulu nya guvegedzele thomba, uye a di thanganide wupari ni Tobhiya;

⁵ a di mu dongisela gisangala nya gikhongolo, umo matshigu hwane gu nga bani guri wulanga nya guvegedzedwe wuguvbi nya miphaso, libani, sombo ni mihengo nya nayo nya likhumi nya dzimbewu, nya vbinyu ni mafura; si nga bani si lumba va na Levhi, vaembeleli ni vawoneleli nya myanya gumogo ni mihengo nya gulumbe vaphasi nya mhamba.

⁶ Aholu gudugelela nya silo sesi, eni nyi diri mwalo Jerusalema, kholu khu mwaga nya magumararu na mivili nya gufume ga Aritaserisi, mufumeli wa Bhabhiloni, eni nyi di hongode iyo gwaye; aholu khu hwane nya matshigu nya gukari nyi di lomba gu bwelela Jerusalema, a nyi dzumedzisa.

⁷ Khavbo nyi dzudego nyi tati wuvivbi wu giridwego khu Eliyasibhi nya gudzege Tobhiya a mu ninga nyumba nya makhuvi ya Nyumbani gwa Nungungulu.

⁸ Isoso si nyi goroside ngudzu, avbo nyi nga duselago sombo satshavbo sa nyumbani ga Tobhiya nyi si dzudzugela vbavbandze.

⁹ Khavbo avbo, nyi rumede gukheni yi agiswe nyumba yile, nyi bwelo khavbo nyi wuyisa gambe sombo sa Nyumbani gwa Nungungulu gumogo ni miningelo nya wuguvbi ni libani.

Miningelo yi lumbago va na Levhi

¹⁰ Nyi tivisidwe gambe gupwani va na Levhi ni vaembeleli va nga bani vari thumoni nya wukhozeli va digide gu ningwa miningelo yi nga bani yi va lumba, khu guralo, va khugide Jerusalema muthu ni muthu a bwelela ndrangani gwaye gu gu ni marembwe yawe, kholu va di si si mani iso nya guyele guvbanya khiso.

¹¹ Nyi kawukide vathangeli nyi va embela, kheni: “Khu ginani mu pfhurarelago Nyumba ya Nungungulu?” Khu guralo, nyi di tombanisa gambe nyaluphye, Valevhi ni vaembeleli, muthu ni muthu nyi mu wuyisa thumoni gwaye.

¹² Khavbo avbo, vatshavbo va na Judha va di gira mihengo nya nayo nya likhumi, khu dzimbewu nya mavbila, vbinyu ni mafura si ta vegwa nyumbani nya gisangala.

¹³ Nyi hathide vathu vava gasi gu khala vasayisi nya gisangala gya nyumbani ya Nungungulu: Muphasi nya mhamba Selemiya, mulovi Sadhoki, ni vbakari ga va na Levhi, nyi vega Pedhaya, muphasedzeli waye a diri, Hanani, mwamana wa Sakuri, mwamana wa Mataniya, kholu va di tumbegide thumoni gwawe, va diri va gu kabanisela silo vandriyawe.

¹⁴ Khu guralo, Nungungulu Wangu, U nga nyi divali, dundruga silo nya sadi nyi gu giredego nyumbani Gwago gumogo ni thumo wago.

Gualakanya Sabhadho

¹⁵ Khu matshigu yoyo, nyi wonide gukheni tigoni ga Judha vomo nya gukari va nga bani va gu gamela wadwa nya dziuvha musighowoloni khu litshigu nya Sabhadho, vambe va wungedzela dzinyandra nya mavbila va dzi khiledza vbadziburutunu, va rwala gumogo ni vbinyu nya dzikhure, dzindzawa gumogo ni mimbe mirwalo nya hambanelane, na va gu si yisa Jerusalema khu litshigu nya Sabhadho; eni nyi di va kawuka gu va si rengisi gilo khu litshigu leli.

¹⁶ Va diromo navo vathu nya gudugele tigoni ga Tiro va nga bani va khala Jerusalema, avo navo va diri ni dzindzandzi ni yimbe mirwalo nya sombo, va ta rengisela va na Judha ni va Jerusalema khu litshigu nya Sabhadho.

¹⁷ Khu isoso nyi di kawuka vathangeli va na Judha nyi va embela, kheni: “Khu ginani mu girago wuvivbi wowu nya wukhongolo, mu nyenyezisa litshigu nya Sabhadho?

¹⁸ Khandriso esi si nga girwago khu vababe vanu, gukala Nungungulu wathu a hi rumela libango nya likhongolo li nga ta mbembisa gumogo ni lidhoropa leli, gani? Aholu enu mu nga gu engedzela likhulo la Nungungulu ga va na Israyeli, khu gu nyenyezisani litshigu nya Sabhadho.”

¹⁹ Khu kotani nya isoso, nyi di leletisa gukheni, na yi si gu pheli Sabhadho, gikhati li pfolago lidambo, myanya yatshavbo nya lidhoropa la Jerusalema yi fanede gu segwa gu khala kharato kala guvbindra Sabhadho. Nyi na vega vathu vangu va ghadha myanya gasi ni wevbini rwalo wu si dzumedziswi gubela dhoropani ga Jerusalema khu litshigu nya Sabhadho.

²⁰ Khu guralo, vatshavbo varengisi ni varengi nya wugwewo nya guhambanelane, va di ta gedwa vbavbandze nya lidhoropa la Jerusalema, litshigu mwendro matshigu mavili.

²¹ Nyi di va vbenyela, kheni: Khu ginani mu lalago ndzarini? Mwa gu engedza gambe nyi na ta mi veta. Gukhugela vbale kha va nga engedza gambe guta khu Sabhadho.

²² Nyi leletede gambe va na Levhi gukheni va dzi agise, vata ghadha malimba, gasi va agisa litshigu nya Sabhadho. Khu esi gambe, Pfhumu Nungungulu wangu, nyi alakanye; U nyi tsetselela khu kotani nya wuhindzi wago nyamba vbela.

Tsayiso nya gudzegane ni mambe mayigo

²³ Khu matshigu yoyo gambe, nyi wonide gukheni vomo Vajudha va dzeganidego ni va nya mayigo nya va Asidhodhi, ni va Amoni, ni va Mowabhi.

²⁴ Gimbe gipandre nya sanana sawe, va di si kodzi gu ganela lidimi nya Gijudha, va di ganela lidimi nya Giasidhodhi ni lidimi nya mambe mayigo.

²⁵ Nyi di va vbenyela, nyi va vala, vambe nyi va veta ni gu va kulela ndzudzu nyi bwelo khavbo nyi va gurumedza gu sambanya khu lina la Nungungulu gukheni: “Mu nga lowodzisi sanana sanu nya sagadzyana ga madzaha yawe, ambari gu lowodzisa madzaha yanu dzimbiri dzawe, ambari gudzeganani navo enu.

²⁶ Khandriso esi si nga ghohisa Solomoni mufumeli wa na Israyeli, gani? Vbakari nya mayigo yatshavbo yi mwalo pfhumu yi nga bani yi fanana naye. A di godwa ngudzu khu Nungungulu waye, a mu wumbela gu khala mufumeli wa Israyeli watshavbo. Khu guralo uye a di ghohiswa khu vanyamayi nya mambe mafumbo.

²⁷ Ina hi fanede gu mu dzumedzisa kharini gu girani guvivba gwatshavbo gogu nya gughohele Nungungulu wathu, khu gu dzeganani ni vanyamayi va mambe mayigo, gani?”

²⁸ Moyo nya gyanana gya Joyadha, mwamana wa Eliyasibhi, muphasi nya khongolo nya mhamba, a diri mwane wa Sambalati, Muhoroni. Nyi di mu tutumisa nyi si vbweti gu mu wona.

²⁹ Pfhumu Nungungulu wangu, U nga va divaleli, kholu va nyenyeziside thumo wa vaphasi nya mhamba, gumogo ni gidzumeledzwano nya wuphasi wa na Levhi.

³⁰ Khu ndzila yeyi, nyi agiside vathu vatshavbo, nyi va digisa sihena satshavbo sa va nya mayigo, nyi wusedza thumo nya wuphasi ni wa na Levhi, muthu ni muthu thumoni gwaye;

³¹ gasi va sayisa miningelo nya dzikhuni nya guvbise khidzo miphaso ni dzimbewu nya guphele guvbwerwa mahangeni khu dzinango dzi vegisidwego. Nyi alakanye, Nungungulu wangu, ni gu nyi girela wuwadi.