Nahume 3 - Bhibhiliya Nya Guage

Gighoho gya Ninivha ni gumbembiswa gwaye

¹ Libango ga lidhoropa nya novba! Ilo li tadego khu malipha ni wuvafa! Li si hambanigo ni wuvafa.

² Gupwala ligwaha nya dzimboma, ni gundrendremela nya dzirodha, sikingo nya dzikavalu ni gundragandraga nya dzikareta!

³ Vakhileli nya dzikavalu, va gu khusedza matshari ni sighalala nya gukhedzige, va sasela gidzemo, gu mbambamela sirumbi nya singi; sirumbi nyamba valedwa; vathu va gu tshunganiswa khu sirumbi,

⁴ satshavbo sesi, sa gu girwa khu kotani ya Ninivha khu sighoho saye nya singi; liphuphulu leli nya wumburi, nya gugengele khu wuloyi, uye a rengisago mayigo khu wubhayi waye, ni mahundzu nya vathu, khu wuloyi waye.

⁵ Wona nya gukhuwe nyi na gu wugela, a ngu ganela Pfhumu Nungungulu, nya Tshivba Yatshavbo, nyi na funungula dzitshalu dzago nyi fenengedza khovbe yago, nyi yeyedza wumbwiri wago va nya mayigo, ni ga mifumo, dzitshoni dzago.

⁶ Nyi na gu pategela khu ndzilo, nyi gu thela dzitshoni, nyi gu gira u khala gihegiso.

⁷ Avbo vatshavbo va na gu wonago, va na gu thava va ganela, khavo: Ninivha mbembisidwe! Khu mani a na mu pwelago gisiro? Nyi naya dzega hayi vathu nya gute gu tangadzisa?

⁸ Ina uwe u ngu vbindra No-Amomi, oyu a vbahidwego vbakari nya tsongo wa Nilo, a randredwego khu mati? A bhiyidwego khu linene, mati ma khala laba laye, gani?

⁹ A di gu seketedwa khu Etiyopiya ni Egipito, khu tshivba nyamba vbela; a ta phasedzedwa khu Puti ni Libhiya.

¹⁰ Ambari khu guralo, uye vbagedwe a yiswa wugumbitunu; sanana saye si pfareledwa mahandzakanyani nya dzindzila. Vathu vawe nya guthavisege, va di va lolela dzisolo, vathangeli vawe, va di modwa va hungwa khu makhetshe.

¹¹ Uwe nuwe, Ninivha, u na leva uya sihala; u na vbweta wulanga nya gusihale, u thava valala vago.

Ninivha a ngu mbembisedwa muphelo

¹² Makhokhola yago yatshavbo, ma na khala nga mikandzu nya gutale khu makandzu nya guvidzwe; me ni gu kutsungwa, ma gu thegela kanani ga wule a vbwetago gu ma hodza.

¹³ Wona nya gukhuwe masotshwa yago ma na khala kha nga vanyamayi! Malimba ya tigoni gwago, yatshavbo ma na tuledwa valala vago, sikwinyaro sago si na vbiswa khu nilo.

¹⁴ Dzi regele mati u dzi dongisela, kholu li ngu vboha litshigu nya gudhumedwe! Tiyisa makhokhola yago! Bela bumbani, u vhuva libumba, u lulamisa lidhingiso u vbisa sitini.

¹⁵ Avbovbo u naya dagarela khu nilo, u mbembiswa khu matshari; wu na gu mbembisa nga mbasa, dzi andrise nga dzimbera, velegela nga khaba.

¹⁶ U andriside ngudzu va nya wugwewo vago, va tala ngudzu nga dzinyeledzi dza Ndzadzini; mbasa yi na sasela litigo lago yi ghwimba mambapi yi vbuvba yiya hwindzo.

¹⁷ Dzindruna dzago dza gu fanana ni mbasa, vathangeli vago va gu fanana ni mwamba nya dzimbera, dzi mbakago mu dzindzarini matshiguni nya girame; avbo li khugago lidambo dzi vbuvba, dzi si tidwi umo dzi yidego.

Ndzimo nya gudzingwe gwa Ninivha

¹⁸ Uwe mufumeli wa Asiriya, vahavisi vago va lade, vathu vago nya guthavisege va lade, vathu vago va mbambamede sigomoni, gu si manegi ni muthu nya gu va wungedzele.

¹⁹ Gilondra gyago kha gi na vbola, gilondra nya gufe khigyo; vatshavbo va na pwago ndruma yago, va na khwakhwathela mandza khu gu thega gwago, kholu khu mani a nga kiyelago gutshaniswa khu wuvivbi wago?