Muhevbudzi 7 - Bhibhiliya Nya Guage

Wugengeli nya wukhongolo

¹ Gwadi ngudzu gu mana lina nya guzundege vbakari nya vathu, guvbindra mafura nya gunungele ma rengwago khu tengo nya wungi, ni litshigu nya gufe, guvbindra litshigu nya gu velegwe muthu.

² I tshukwana gu tutumela nyumbani nya gililo, guvbindra nyumbani nya buzo. Kholu avbovbo khavbo a gu mahegiso nya muthu; ni vale va vbanyago va fanede gu pimisa.

³ I tshukwana guvbisega, guvbindra mahego; kholu marongo ma gu swihadza khovbeni aholu ma ngu tangadzisa monyo.

⁴ Myonyo ya vathu nya guti yomo nyumbani nya gililo, aholu ya avo nya sipumbu yomo nyumbani nya buzo.

⁵ I tshukwana gu kawukwa khu muthu nya guti, guvbindra gu yingisa litembo nya gipumbu.

⁶ Kholu mahego nya gipumbu ma gu fanana ni miba yi dzurago vbavbatshi nya khali, isoso niso gu dzi pfhadza, kha si phasi gilo.

⁷ Dzitshanisa dza gu khunguvanyisa ni vagengeli, ni mifidho ya gu ghoha myonyo nya vathu.

⁸ Mahegiso nya gilo i tshukwana guvbindra maphelelo yaye. I tshukwana gu timisela, guvbindra dzihanyi.

⁹ U nga vbiredzeli gu goroga, kholu, likhulo lomo myonyoni nya sipumbu.

¹⁰ U nga ganeli, khuwe: “Khu ginani dzinango dza gale dzi nga bani dziri dzadi guvbindra dza muhuno?” Kholu mapimo yoyo, khandri mapimo nya guti.

¹¹ Guti gu na ni lisima gu fanana ni thomba, gu ngu phasa vatshavbo va vbanyago mafuni.

¹² Kholu guti gu ngu vhikela muthu, kha nga dzitsapawu nidzo dzi ngu vhikela, aholu, guti gu ngu phasa ngudzu kholu gu ngu ninga guvbanya vale va gu nago.

¹³ Nga khedza thumo Nungungulu a giridego; khu mani a kodzago gu lulamedza iso a si wegedzidego?

¹⁴ Tsaka khu matshigu nya makategwa; aholu khu matshigu nya gutshaniseke alakanya Nungungulu a giridego eli litshigu ni lile, gasi muthu a si tuguli iso si natago khu hwane gwaye.

¹⁵ Ga matshigu nyamba nyawula nya guvbanye gwangu, nyi di wona esi: Muthu nya gululame a di vbiredzela gufa ni gululama gwaye, aholu muthu nya guvivbedwe khu monyo, a di vbanya matshigu nya gutale ni monyo waye nya guvivbe.

¹⁶ U nga dzi giri muthu nya wadi, ambari nya gugengele ngudzu, gasi wa gu vbweta gu dzi mbembisela ginani wabune?

¹⁷ U nga khali gitandravalayi mwendro gipumbu khu ginani u na dzi songago na gi si gu vbohi gikhati gyago?

Gutugula nya wugengeli

¹⁸ Gwadi gu dzi vegisa ga gilo gegi, aholu u si hambani gambe ni gimbe; kholu uye a thavago Nungungulu, a ngu dugelela ga satshavbo.

¹⁹ Wugengeli wu ngu ninga muthu nya guti tshivba nya yingi nya guvbindre likhumi vathangeli nya sikwata nya nyimbi va dhoropani.

²⁰ Mafuni momu, mwalo muthu nya gululame, a thumago basi iso nya sadi nyamba ghoha.

²¹ U nga yingiseli satshavbo si ganedwago khu vathu, kholu u nga tshukha u yingisa nu gu lembwa khu githumi gyago.

²² Kholu uwe nuwe u ngu lemba vakwanu, livhalo li ngu gu embela isoso.

²³ Satshavbo sesi nyi di si vbweta khu wugengeli, nyi ganela, kheni: Mwendro nyi na khala muthu nya guti. Aholu guti gu di manega hwindzo ni eni.

²⁴ Iso si nga bani si romo; somo hwindzo ni ethu, si etide! Khu mani a na kodzago gu si pima?

²⁵ Nyi di dzi ningela khu monyo wangu watshavbo gu vbweta wugengeli ni tshamuselo yaye, nyi di khedza ni gu linga gupwisisa, nyi wonide gukheni gu gira mithumo nya guvivbe, lihure ni wupumbu, kha si phasi gilo.

²⁶ Khu guhegisa nyi di wona gukheni: Egi gi pwisago ngudzu wuvi guvbindra lufu khu gu mana nyamayi nya vbiyaku. Kholu a gu sihalela vama nga musoti: Monyo waye i naphwi, mwama a gu hungwa khu dzingomondro nya mawogo yaye. Aholu avo va thavago Nungungulu va gu mu ndreyela, gasi sighohi sa gu modwa khuye.

²⁷ Gasi eni, Muhevbudzi, nyi tugude esi khu vbadugwana vbadugwana avbo nyi nga khedza gilo ni gilo gasi gu mana tshamuselo yaye.

²⁸ Gyomo gilo nyi gi vbwetago, aholu nyi si gi mani, khegi: vbakari nya likhumi mazana (1.000) vama nyi manide moyo basi, aholu vbakari ga vanyamayi vatshavbo kha nya mana ni moyo basi.

²⁹ Iso nyi si manidego basi khesi: Nungungulu a di gira muthu nya gululame, aholu uye a di dzi vbwetela dzimbe dzindzila nya guwegele.