Muhevbudzi 4 - Bhibhiliya Nya Guage

Guvivba gu tshanisago guvbanya nya vathu

¹ Nyi di engedza nyi wona idzo va tshanisanago khidzo vathu omu mafuni; ni marongo ya vale va tshaniswago, na guri mwalo ni moyo nya gu va tangadzise. Vatshanisi vawe va di va wugela, aholu avo va diri mwalo muvhikeli.

² Eni nyi di, kheni: Va kategide avo va fudego gale guvbindra avo va vbanyago olu.

³ Avo va kategidego ngudzu khu vale va ngamba velegwa, va ngamba wona mithumo yeyi nya guvivbe yi girwago mafuni momu.

⁴ Nyi wonide gambe esi: Vatshavbo vale va dzi garadzago khu gu vbweta gudugelela mithumoni, va gu girwa khu lidiwo ni liphuvbo nya mapalisana vbakari nya vathu vakwawe, esi niso nya gu si wona na si si phasi gilo, gu dzi pfhadza ni gu tutuma hwane nya phuvbo yi vbindrago.

⁵ Gipumbu gya gukhumbarana mawogo, gya gu dzi hodza gyabune.

⁶ Gyandza gimwegyo basi nya muthu nya gurule, guvbindra mandza mavili nya muthu nya wughimaghima khu gu dzi garadza ngudzu; ugogo nugo gututuma hwane nya phuvbo yi vbindrago.

⁷ Nyi di engedza nyi wona gambe gu dzi pfhadza ga mafuni momu:

⁸ Womo muthu a vbanyago enga, nyambana waye, nyambana sanana ni vandruye. Ambari khu kharato kha garali khu gu thuma, maho yaye kha ma kodwi khu gu wona talo nya thomba a gu nayo. Ne kha wudzisi gukhuye: “Gasi nya gu thumela mani, ni gu, nya gu dzi hiyela ginani esi nya gutshambe?” Isoso niso kha si phasi gilo, gu dzi pfhadza mahala.

Guvbanya wenga ni guvbanya khu wuhengeli

⁹ I tshukwana gu vbanya na muri vavili, guvbindra guvbanya nuri moyo, kholu mu na phasega ngudzu thumoni gwanu.

¹⁰ A gu thega moyo a na wuswa khu mumbe. Aholu libango ga muthu a vbanyago enga kholu; a gu thega, mwalo a na mu wusago.

¹¹ Avo gambe, va gu lala na vari vavili va na furumedzana; aholu a gu bani nari moyo, a na kodza kharini gu dzi furumedza?

¹² Muthu a gu bani ari uye enga a ngu padwa khu gighevenga, aholu va gu bani vari vavili va ngu gi tutumisa; lidzoke li vboridwego li bhanywa khu dzingodzi dzitharu kha li kavigi khu guvbiredza.

Wufumu nya mafu wu ngu vbela

¹³ Lidzaha nya gugengele ambari nari gisiwana, li ngu vbindra mufumeli a gumbidego, nari gipumbu, a si dzumeligo gu kawukwa.

¹⁴ Ilo li ngu kodza gu duga khu pasoni li ta fuma, ambari na li velegedwe tigoni ga mufumeli wule nari gisiwana.

¹⁵ Nyi di wona vathu vatshavbo va vbanyago mafuni na va gu landrela lidzaha li na tshikedzago mufumeli.

¹⁶ Vathu a nga bani a va thangela va diri vangi guvbindra tengo. Aholu avo vatago khu hwane gwaye kha va na nga mu tsakela. Satshavbo sesi gu dzi pfhadza ni gututuma hwane nya phuvbo yi vbindrago.