Muhevbudzi 3 - Bhibhiliya Nya Guage

Silo satshavbo si na ni gikhati gyaye

¹ Satshavbo si dongisedwe gikhati gyaye, gyomo gikhati nya satshavbo si guromo mafuni:

² Gyomo gikhati nya guvelegwe, ni gikhati nya gufe; gikhati nya guyale, ni gikhati nya guvbwere esi si yadwego;

³ gikhati nya gusonge, ni gikhati nya guvbanyise; gikhati nya gupfhungumule, ni gikhati nya guvbahe;

⁴ gikhati nya gulile, ni gikhati nya guhege; gikhati nya wuvi, ni gikhati nya gughiye khu gutsaka;

⁵ gikhati nya gurinye siwindri, ni gikhati nya gu si wungedzele; gikhati nya gupharane mandza, ni gikhati nya guhambane;

⁶ gikhati nya gu si mane, ni gikhati nya guhamuge; gikhati nya guvege, ni gikhati nya gudzudzuge;

⁷ gikhati nya gupferule, ni gikhati nya gusonedzele; gikhati nya gudegule, ni gikhati nya guganele;

⁸ gikhati nya guhaladze, ni gikhati nya guvenge; gikhati nya nyimbi, ni gikhati nya gurule.

Muthu kha giti gikhati gyaye a vegedwego

⁹ Giphaso muni a gi manago muthu khu gu dzi garadza gwaye?

¹⁰ Nyi wonide mithumo eyi Nungungulu a ningidego vathu gu va yi thuma.

¹¹ Silo satshavbo Nungungulu a si vegede gikhati gyaye; na vegide gambe myonyoni gwawe gu alakanya dzinango nyamba vbela; ambari kharato, mwalo muthu a wutigo thumo wu giridwego khu Nungungulu gukhugela guphela kala mahegiso.

¹² Nyi hegiside khu gu wona gukheni, gi mwalo gi gu gyadi guvbindra gu muthu a dzi tsakela ni gu vbweta makhalelo nya yadi guvbanyani gwaye.

¹³ Muthu watshavbo a hodzago ni gu sela a gu hakha handro nya thumo waye, a na pime gukhuye giningwa gya Nungungulu.

¹⁴ Nyi ngu dziti gukheni, satshavbo a girago Nungungulu, si na simama kala gupindruga nyamba engedzedwa ambari gu vbungudwa gilo. Nungungulu giride esi gasi vathu va mu ninge githawo.

¹⁵ Sile si nga bani si romo khu gale niso si guromo olu, niso si na giregago, si manegide khu gale; Nungungulu a gu wuyisa nyaluphye iso si nga bani si vbindride.

Guhamugega githawo

¹⁶ Hwane nya isoso, nyi wonide gambe esi mafuni momu; guvivba gu di fuma wulangani nya wulamuli, ni gighoho gi fuma wulangani nya gululame.

¹⁷ Khu guralo, nyi di pimisa nyabune, kheni: “Nungungulu a na lamula muthu nya gululame gumogo ni gighohi, kholu vegide gikhati gimwegyo nya gilo ni gilo, ni gikhati nya thumo watshavbo.”

¹⁸ Nyi di engedza nyi ganela gambe, kheni: “Nungungulu a na va linga gasi va dziti gukhavo avo va ngu fanana ni sirengo.

¹⁹ Kholu mahegiso nya tshatshazelo nya vathu wu ngu fanana ni mahegiso nya tshatshazelo nya sirengo, kholu vatshavbo va ngufa gambe vatshavbo va na ni liphuvbo nya guvbanye, muthu kha pali girengo, khu guralo, satshavbo gu dzi pfhadza basi.

²⁰ Vatshavbo va na hegisa khu guya dangamwedo. Va giridwe khu kudzudzwane nya mafu, khu guralo, vatshavbo va na bwelela mafuni.

²¹ Khu mani a dzitigo nya gukhuye hefemulo nya muthu wu na gwela vbatshani ndzadzini, gasi hefemulo nya sirengo wu na relela vbavbatshi mafuni, na?

²² Khu guralo, nyi wonide gukheni gu mwalo gunengela nya gukhongolo ga muthu guvbindra gu uye a dzi tsakela khu mithumo yaye, owu khuwo tshatshazelo waye. Kholu khu mani a na gu mu wuyisago gasi guta wona iso si na gu dugelelago khu hwane?”