Muhevbudzi 2 - Bhibhiliya Nya Guage

Gu dzi pfhadza khu gu dzi tsakisa

¹ Nyi di ganela khu monyoni gwangu, kheni: “Delu! Nya gu vbweta gu gu pwisa gutsaka; dzi buze khu gunengela.” Aholu nyi di si wona gambe nari gu dzi pfhadza.

² Nyi di, kheni: Mahego guhandruga; ni gutsaka kha gu phasi gilo.

³ Nyi di pimisa khu monyoni gwangu gu dzi tsakisa khu gu sela wadwa nya vbinyu, mapimo yangu na ma nga gu thumisa guti, eni nyi di dzi gira gipumbu na nyi zama gu dzi pengisa kala nyi wona sanana sa vathu esi si va tshambelago gu si gira omu mafuni khu matshigu madugwana nya guvbanye gwawe.

⁴ Nyi dzi girede silo sikhongolo, nyi dzi vbahela dzinyumba, nyi dzi limela marembwe nya vhinya.

⁵ Nyi limide marembwe, nyi yala misimbo nya mihandro nya mafumbu yatshavbo.

⁶ Nyi pode milambo nya mati gasi gu theledzela khayo misimbo yangu yi kodza gu dandra khu tshivba.

⁷ Nyi rengide dzikhumbi nya vama ni vanyamayi; simbe sithumi si velegedwe ndrangani gwangu, nyi na ni mitshambi nya yingi, nya dzimombe ni dzinvuta, nya guvbindre vatshavbo va vbanyidego Jerusalema na nyi si gu velegwi.

⁸ Nyi hengeledzede gambe ndralama ni parata, ni thomba ya vafumeli nya sipandrengulu; nyi dzi hathede vaembeleli nya vama ni vanyamayi, ni iso si tsakisago vathu, a gu vagadzi nya vangi.

⁹ Nyi khusegide guvbindra vatshavbo va fumidego Jerusalema nyi si gu velegwi, kholu nyi nga simamago ni wugengeli.

¹⁰ Satshavbo si nga bani si godwa khu maho yangu kha nya si bomba, ni satshavbo si nga bani si godwa khu monyo wangu, gi mwalo nyi nga wu himbedzela, kholu nyi di gu tsaka khu thumo wangu watshavbo. Egi khigyo giavelo nya satshavbo soso.

¹¹ Nyi di khedzisa gwadi mithumo yangu yatshavbo nyi giridego khu mandza yangu, ni idzo nyi dzi garadzidego khidzo; nyi di wona gukheni gu diri gu dzi pfhadza ni gu tutuma hwane nya phuvbo vbindrago, gi mwalo nyi phasegidego khigyo mafuni momu.

¹² Khu guralo, nyi di wuya nyi khedzisa gambe gwadi guti, lihure ni wupumbu; kholu muthu a landrelago mufumeli a nga gira ginani, guvbindra esi si giridwego khu gale.

¹³ Nyi khodwe gukheni guti gu ngu vbindra wupumbu; kha nga wenengedzo wu palago gidema.

Muthu nya guti ni gipumbu

¹⁴ Muthu nya guti a ngu wona umo a hongolago, aholu gipumbu gya gu gimbila mugidemani. Ambari ulo nyi ngu pima gukheni vatshavbo mahegiso yawe mamowo.

¹⁵ Nyi di dzi wudzisa nyabune, gukheni: “Kha nga olu mahegiso yangu ma fananago ni ya gipumbu, gasi wugengeli wangu wa gu phasa ginani?” Khu guralo, nyi wonide gukheni ogu gambe gu dzi pfhadza.

¹⁶ Kholu khu matshigu matago muthu nya guti ni gipumbu, vatshavbo va nafa; mwalo a na gu alakanywago kala lini, vatshavbo va na divadwa.

¹⁷ Khu guralo, nyi di venga guvbanya, khu gu wona gukheni satshavbo si girwago mafuni kha si phasi gilo gututuma hwane nya phuvbo yi vbindrago basi.

Gu dzi pfhadza khu guthuma

¹⁸ Nyi di venga thumo wangu watshavbo, nyi dzi garadzidego khu gu thuma mafuni momu; kholu bhindzu yakone yi nata manwa khu vale va na tago khu hwane gwangu.

¹⁹ Khu mani a dzitigo gukhuye muthu yoyu a na bani ari gigengeli mwendro gipumbu? Khuye a na fumelago thumo wangu watshavbo owu nyi dzi garadzidego khuwo, nyi yeyedza guti gwangu mafuni momu. Isoso niso gu dzi pfhadza.

²⁰ Khu guralo, monyo wangu wu di vbela tshivba, khu thumo watshavbo nyi dzi garadzidego khu gu wu gira mafuni momu.

²¹ Kholu muthu a dzi garadzago khu gu thuma khu wugengeli ni guti, a guta wona handro nya thumo waye na wu tshiyedwa uye a ngamba dzi garadza khu gu thuma; satshavbo sesi gu dzi pfhadza, kha si phasi gilo.

²² Olu lithonga latshavbo nya muthu ni gu dzi garadza gwaye mithumoni ya mafuni, ina yi phaside ginani?

²³ Matshigu yaye yatshavbo khya gu garadzega, ni gu dzi garadza gwaye khwa wuvi, ni vbawutshigutunu kha mani guhefemula nya gwadi. Satshavbo sesi kha si phasi gilo, gu dzi pfhadza basi.

Magana nya guhegise

²⁴ Gimwalo gi gu gyadi ga muthu guvbindra guhodza, gusela, gutsaka ni gukhalega khu handro nya thumo waye. Aholu esi niso nyi si wone gukheni sa guta khu mandzani ga Nungungulu.

²⁵ Khu mani a hodzago ni gu sela nyamba ningwa khu tshivba Yaye?

²⁶ Wule a Mu golago, Nungungulu a ngu mu ninga wugengeli, guti ni gunengela; aholu, gighohi, a gu gi rwega thumo nya guwungedzele silo, gasi khu hwane a si tshiya ni wule Nungungulu a na golago gu mu ninga. Esi gambe nyi si wone gukheni gu dzi pfhadza, ni gututuma hwane nya phuvbo yi vbindrago.