Muhevbudzi 12 - Bhibhiliya Nya Guage

Wukhosane

¹ Alakanya Muvangi wago na wu ngari lidzaha, kholu ma na vboha matshigu nyambasi yadi, a gu myaga u na ganelago gukhuwe: “Guvbanya kha gu nga gu tshamba gambe;”

² na gu si gu pfhupheli lidambo, ngima ni dzinyeledzi, ma wuya mapfhi hwane nya gu bani yi wide ndzadzi;

³ litshigu dzighadhi nya ndranga yago dzi na gu phela gu ndrendremela, dzindrena dzi pilega hwambo, ni vatshindri va ema kholu a gu vadugwana, ni avo va kheviselago khu sihogo va si woni;

⁴ avbo gu na gu segwago malimba dzindzilani, khu gu vbunguga nya gudzume nya gitshindro, gu khugega malito nya sinyoni ni gu vbunguga malito yatshavbo nya dzindzimo;

⁵ ni litshigu gambe va na thavago gu gwela sigomo, gu manega gu thusedzedwa mudzindzilani, mikandzu yi thela nyenvu, dzimbera dzi na hodza dzi nona, dzi kodwa khu guhodza. Kholu muthu a na hongola gaya gwaye nya mahegiso, va malile na va gu dzundrulugela dzindzila;

⁶ Ngodzi nya parata na yi si gu pilegi, na gu si gu pandregi mbiya nya ndralama, gu si gu pandregi khali namboni, na gu si gu pandregi ngongola, vbafuvbi ni nambo.

⁷ Khu kharato kudzudzwane wu na bwelele mafuni wu dugedego umo, ni hefemulo wu bwelela ga Nungungulu a wu giridego.

⁸ Gu dzi pfhadza, nya gu dzi pfhadze, a di ganela kharato Muhevbudzi, khuye: Satshavbo gu dzi pfhadza.

Magana nya guhegise

⁹ Muhevbudzi vbatshani nya gu bani ari muthu nya guti, a di hevbudza vathu wugengeli. A di hevbula gwadi, a tugula ni gu sasamedza mavingu nya mangi.

¹⁰ Muhevbudzi a di vbwetedzela magana nya yadi, a lova khu gululama mahungu nya lisine.

¹¹ Magana nya vathu va gengedego ma gu fanana ni dzitshingano, kha nga dzikhogo dzi khokhotedwego dzi tiya: Magana yaya na ma gu tshamusedwa khu muhavisi moyo basi.

¹² Nya gikhongolo mwanangu, khegi: Gu mwalo mahegiso nya gugire mabhuku, gu hevbula ngudzu gwa gu hagadza givili.

¹³ Litshina nya guete nya satshavbo u si pwidego kheli: Thava Nungungulu u sayisa milayo yaye, kholu eyi khiyo fanelo nya muthu watshavbo.

¹⁴ Nungungulu a na lamula mithumo yatshavbo, ni satshavbo si sihadego, iso nya sadi niso nyamba sadi.