Muhevbudzi 11 - Bhibhiliya Nya Guage

Hi na gire silo nya sadi khu gikhati gi vbwetegago

¹ Rinya guhodza gwago vbatshani nya mati; kholu khu hwane nya matshigu nya gutale u na bwelo khavbo u gu mana nyaluphye.

² Kabana iso u gu naso ni livbandre na vavili mwendro livbandre na vararu vathu, kholu khu liti libango muni li na gu dugelelago mafuni momu.

³ Damboni ga gu phuma khu mapfhi, ya guwa ndzadzi mafuni, ni simbo wa gu thegela Marandzi mwendro Wuronga, wu na khala kamwe avbovbo wu thegedego avbo.

⁴ Uye a khedziselago dziphuvbo, gima kha yali, ni wule a khedziselago mapfhi, gima kha na vbwera.

⁵ Kha nga olu u gumba yiti ndzila nya phuvbo, ni idzo gu wumbwago khidzo marambo girumbuni ga nyamayi a gu ni mimba, khu kharato gambe mithumo ya Nungungulu, a girago satshavbo, khu yeli gu yiti.

⁶ Yala mbewu yago gu ngari dzimindru, aholu vbasilambotunu u nga khali khu mawogo, kholu khu yiti iyo yi na bugago yi ninga mihandro; kheyi mwendro khu yile, mwendro dzatshavbo dzi na ni lisima.

Guvbanya

⁷ Guwonegela gu ngu rudzisa monyo, maho nayo ma gu tsaka khu gu wona lidambo.

⁸ Muthu a gu vbanya myaga nya gutale, gumogo ni gutsaka gwadi, a na alakanye matshigu nya gidema a gu mangi ngudzu guvbindra nya gutsake. Satshavbo gu dzi pfhadza kha si phasi gilo.

Milayo ga madzaha

⁹ Lidzaha, dzi tsakise khu wudzaha wago, u tsakisa monyo wago matshigu nya wudzaha wago; gimbila khu ndzila yi godwago khu monyo wago, ni gu gola nya maho yago; aholu dziti nya gukhuwe Nungungulu a na gu lamula khu satshavbo soso.

¹⁰ Khu guralo, dusa gugaradzega gwa monyoni gwago, u hambana niso si na gu tshanisago mili wago, kholu wanana ni wudzaha gu dzi pfhadza, kha si phasi gilo.