Muhevbudzi 10 - Bhibhiliya Nya Guage

Gupimisa ni wugengeli

¹ Phuga nya gufe yi ngu kodza gu ghoha mafura nya gunungele, kharato nugo wupumbu wudugwana wu ngu kodza gu ghoha wugengeli ni wuzundzo nya muthu nya guti.

² Monyo wa muthu nya guti womo nyamudye gwaye, aholu monyo nya gipumbu womo nyambade gwaye.

³ Gipumbu gya gu gimbila khu ndzila, gya gu gimbila nyambana mapimo, gya gu yeyedza vatshavbo khigyo muthu nya gudhadhavale.

⁴ Wa gu ronogedwa khu mufumeli u nga khugi wulanga wago, kholu uye a dzi nogisago a ngu vbuluga mhangoni.

⁵ Mafuni momu nyi wonide silo nya gunyenyeze, a gu gihoso gi girwago khu mufumeli.

⁶ Sipumbu sa gu vegwa malangani ma khusegidego! Aholu va nya gufuma va vegwa malangani ya vbavbatshi.

⁷ Nyi di wona dzikhumbi dzi gimbila khu dzikavalu, aholu, vafumeli va gimbila khu migondro nga dzikhumbi.

⁸ Uye a kembago liphala a na thegela umomo; ni uwe u khungumulago ndzari u na hodzwa khu nyoga.

⁹ Uye a pandrelago siwindri si na mu thegela, ni wule a kokelago dzikhuni a na dzi tshongisa.

¹⁰ Gibhewula gya gu bani gya sa lodzwa gi na gu girela thumo; gu vbweta gu engedzela tshivba; aholu wugengeli wu ngu ninga tshatshazelo muthu.

¹¹ Wa gu hodzwa khu nyoga nu si gu thumwi khu nyanga, kha gu phasi gilo gu rana nyanga.

¹² Magana ya muthu nya guti ma ngu tsakisa, aholu magana ya gipumbu ma gu gi tshipisa.

¹³ Guphela nya magana yaye khya wupumbu, ni ayo nya guhegise khya gu handruga.

¹⁴ Gipumbu gya gu laphisa magana; gambe muthu a ngu hangwa khiso si tago khu mbeli; gasi khu mani a na gu mu embela iso si na gu mu dugelelago hwane gwaye?

¹⁵ Gipumbu gya gu garadzwa khu thumo waye, kholu kha gi yiti ndzila nya guye dhoropani.

¹⁶ Libango lago uwe litigo u fumwago khu mufumeli nya gyanana, dzindruna dzakone dzi buzago gukhugela dzimindrudzile.

¹⁷ Li kategide litigo lile li fumedwago khu mwamana a dugelago nyumbani nya wufumu, eli dzindruna dzakone dzi hodzago khu gupima, gasi gu mana tshivba nasiri gu leva.

¹⁸ Muthu nya wugara a gu thegedwa khu dzimhango, a rutedwa khu nyumba na khumbanaride mawogo.

¹⁹ Guhodza gu ngu tshamba, ni wadwa wa gu tsakisa monyo, gambe satshavbo sa gu manwa khu dzitsapawu.

²⁰ U nga lembi mufumeli, ambari khu mahingigedzoni, gambe u nga lembi gitetema, ambari na wu lade makhuvini gwago; kholu sinyoni si nga rwala mahungu yago, si ma phalalegisa kala ma vboha dzindzeveni gwawe.