Mithumo 7 - Bhibhiliya Nya Guage

Magana ya Sitefane

¹ Khongolo nya vaphasi nya Mhamba a di ganela, khuye: “Ina khidzo kamwe, gani?”

² Sitefane a di mu hakha, khuye: “Vandriyangu ni vababe vangu, yingisani! Nungungulu nya wudhumo a dzi wonegiside ga babe wathu Abrahama na ngo gu vbanya Mesopotamiya, na si gu ruri aya khala Harani,

³ a mu embela, khuye: ‘Khuga tigoni gwago u diga valongo vago u hongola tigoni nyi na gu nonedzago.’

⁴ Khavbo avbo, a di rura tigoni nya Vakalidhiya aya vbaha Arani. Hwane nya gu na fedwe khu babe waye, Nungungulu a di mu resa tigoni momu mu vbanyelago umo enu muhuno.

⁵ Nungungulu kha mu ninga ambari gipandre gidugwana nya mafu ya tigoni momu. Aholu a mu tumbiside gu mu ninga latshavbo litigo leli, uye ni sanana saye, ambari ulo a nga bani ari mwalo gyanana.

⁶ Nungungulu a di mu embela, khuye: ‘Sanana sago si na khoza tigoni ga vane, si na girwa dzikhumbi si gu saniswa, gipimo nya mazana mana myaga.

⁷ Aholu, litigo li na gu va sanisago nyi na li lamula.’ Nungungulu a di engedza gambe gu ganela, khuye: ‘Hwane nya isoso va na duga khu tigoni mule va ta nyi khozela wulangani wowu!’

⁸ Nungungulu a di hunga pwanano ni Abrahama a gu vega gifungo nya wugwera. Khavbo avbo, Abrahama a di velega Isaki a mu hanisa wugwera, khu litshigu a nga tshanganisago livbandre na mararu matshigu nya guvelegwe gwaye. Isaki nuye a di hanisa wugwera Jakobe, a nuye Jakobe a gu hanisa sanana saye nya likhumi na sivili, a gu avo likhumi na vavili va nyapandre vathu.”

⁹ Sitefane a di engedza, khuye: “Vakokwe vathu avo, va di girela lidiwo ndriyawe Josefe, va mu rengisa a vbagedwa a yiswa Egipito. Aholu Nungungulu a diri ni uye;

¹⁰ a di mu vbulugisa mu sigaradzoni satshavbo; a di mu ninga mapimo a mu gira gambe gigodwa gya Faro, mufumeli wa Egipito. Faro a di mu vega kha nga gyandza gyaye a thangela litigo la Egipito ni ndranga yaye yatshavbo nya wufumu.

¹¹ Yi di manega ndzala tigoni gwatshavbo ga Egipito ni Khanani. Gusaniseka gudiri gu khongolo. Vababe vathu va di hamuga ni gilo nya guhodze.

¹² Aholu, Jakobe, na dzitide khuye Egipito yomo tirigu a di rumela iyo vababe vathu, gikhati nya guhegule.

¹³ Khu gikhati nya wuvili va nga hongolago Josefe a di dzi tugudzisa ga vandriyaye. Khu Kharato, valongo va Josefe va di tidwa khu Faro.

¹⁴ Khavbo avbo, Josefe a di rumela guya ranisa Jakobe, babe waye, gumogo ni ngamu yaye yatshavbo. Va diri gipimo nya livbandre na mavili magumi vathu.

¹⁵ Jakobe a di relela Egipito aya khala, a fa iyoyo, uye ni vababe vathu.

¹⁶ Khu hwane nya matshigu va di resa sirumbi sawe Sikemi, va ta si kembela thowoni li nga rengwa khu Abrahama ga sanana sa Hemori.

¹⁷ Na giri vbafuvbi ni gu vboha gikhati Nungungulu a nga gi vegisago gasi gu tadzisega gitumbiso a nga girago ga Abrahama, vathu va di velegelana va gu tala tigoni ga Egipito.

¹⁸ Khu guhegisa, a di phara ndronga nya wufumu wa Egipito, mufumeli moyo a ngamba muti Josefe.

¹⁹ Mufumeli yoyu a di pfhadza vababe vathu khu mano, a va wugela, a va sanisa ngudzu; a di ruma gu dzudzuga sanana sawe gasi sifa.

²⁰ Khu gikhati gyogyo a di velegwa Mosi, gyanana gi nga tsakisa Nungungulu. Vavelegi vaye va di mu dandrisa gipimo nya migima miraru ndrangani gwawe.

²¹ Gikhati va nga mu dzudzugago, khu nyamahegyane wa mufumeli wa Egipito a nga mu dandrisa a mu sayisa kha nga gyanana gyaye.

²² Khu guralo, Mosi a di hevbudzwa guti gwatshavbo wa Vagipiti, a diri ni tshivba khu magana ni mithumo.

²³ Aholu, gikhati a nga tshanganisa magumana myaga a di tedwa khu mapimo nya guya holela vandriyaye, sanana sa Israyeli.

²⁴ Na wonide moyo na gu saniswa khu Mugipiti, a di mu phodzela, a gu songa Mugipiti.

²⁵ Mosi a di hingigedza khuye vandriyaye va na tugula khavo Nungungulu a ngu vbweta gu va vbanyisa khu mandza yaye; aholu, avo kha va tugula.

²⁶ Khu mindru gakone a di hidzimela a wona vavili nya sanana sa na Israyeli na va gu dwana, a di zama gu va avbula, khuye: ‘Vathunu, enu mu va na ndruye ni ndruye! Khu ginani mu sanisanago khu gyanu?’

²⁷ Aholu, uye a nga bani a gu sanisa kwawe a di reda Mosi, a mu embela, khuye: ‘Khu mani a nga gu vega vbakari gwathu kha nga mufumeli ni mulamuli.

²⁸ O mwendro wa guvbweta gu nyi songa neni kha nga vbanova u nga songago Mugipiti?’

²⁹ Na pwide magana yaya, Mosi a di thava a pengela tigoni ga Madhiyani, iyo a ngaya velega sanana sivili.

³⁰ “Na gu vbindride magumana myaga, Mosi a di gu manega giwulani gya Sinayi, a di tumbulugedwa khu ngilozi ya Nungungulu, yi nga wonega vbamalavbelavbetunu nya nilo na wu gu dzura vbagipopwanatunu.

³¹ Mosi a di liwuga, khu esi a nga si wona. A di hidzimela afela gu wona gwadi, a dipwa lito la Pfhumu, khilo:

³² ‘Eni kheni Nungungulu wa vababe vago, Nungungulu wa Abrahama, Nungungulu wa Isaki, Nungungulu wa Jakobe!’ Mosi a di ndrendremela khu hwanga, a si tiyi ni gu khedza.

³³ Khavbo avbo, Pfhumu a di khuye: ‘Tshula silato migondroni gwago, kholu, wulanga u emidego avbo, litigo nya gukatege.

³⁴ Khu lisine, nyi wonide gusaniseka ga vathu vangu Egipito; nyi pwide huwa yawe; nyi dongide guta va vbanyisa; Khu kharato, delu, nyi guruma Egipito.’

³⁵ “Khuye Mosi va nga mu nyenyago khavo, khu mani a nga gu gira mufumeli ni mulamuli wathu. Khuye a nga rumedwa khu Nungungulu kha nga muthangeli ni mutshuli, khu lito la ngilozi ya Nungungulu yi nga dzi wonegisa gwaye vbagipopwanatunu.

³⁶ Khuye Mosi a nga va tshula a gu gira siliwugiso ni siwoniso tigoni ga Egipito ni linene nya gufuvile, ni giwulani, gipimo nya magumana myaga.

³⁷ Khuye Mosi a nga ganela ga va na Israyeli, khuye: ‘Nungungulu a na wusa vbakari ga vandriyanu muprofeti nya nga eni.’

³⁸ Khuye oyu Mosi a nga bani a romo tshanganoni nya libandla la Israyeli; khuye a nga hakha Magana nya guvbanye ma nga ganedwa khu ngilozi ya Nungungulu gigomoni ga Sinayi, a ma tshamusela ga vababe vathu.

³⁹ Aholu, vababe vathu va di bomba gu mu yingisa, va mu tsukula myonyoni gwawe, va gola gu bwelela Egipito.

⁴⁰ Va di embela Aroni, khavo: ‘Hi girele vanungungulu va na gu thangago mbeli gwathu; kholu kha hi siti esi si dugeledego Mosi, a nga hi dusa tigoni ga Egipito.’

⁴¹ Khu matshigu yoyo va di wumba githombe nya mombe va gu phasela dzimhamba gifananiso, va nengela khu mithumo ya mandza yawe.

⁴² Aholu, Nungungulu a di va pfhurarela a va diga va khozela sivangwa sa ndrengelengeni, kha nga gu nga lowago libhukuni la vaprofeti pwani: ‘Sanana sa na Israyeli, gipimo nya magumana myaga giwulani kha mwa dzi kodza gu nyi songela sirengo mu nyi phasela dzimhamba,

⁴³ Mu di rwala tabherinakeli ya Moloki, ni gifananiso nya nyeledzi ya nungungulu Rafani, a gu sifananiso nya gugirwe khu mandza yanu mu fela gu si khozela. Khu nandru yoyo, nyi na mi vbagedzisa mu yiswa hwindzo guvbindra Bhabhiloni.’

⁴⁴ “Vakokwe vathu, giwulani, vadiri ni tshatsha nya wukustumunyu, a gu tabherinakeli va nga bani va gu vega umo siwindri nya Nayo. Tabherinakeli yi di vbahidwe kha nga idzo a nga rumisago khidzo Wule a nga ganela ga Mosi a mu ruma gu yi gira kha nga gifananiso gile a nga gi wonago.

⁴⁵ Khiyo tabherinakeli yi nga hakhwa khu vababe vathu na va gu thangedwa khu Josuwa va gu bela nayo tigoni va nga wandrelago mahundzu ma nga tutumiswa khu Nungungulu, va gu yi vegisa kala matshiguni ya Dhavhidhe.

⁴⁶ Mufumeli Dhavhidhe, na kategile mbeli ga Nungungulu, a di lomba guvbahela nyumba Nungungulu wa Jakobe.

⁴⁷ Aholu, khu Solomoni a nga vbaha Nyumba ya Nungungulu.

⁴⁸ Ambari ulo, uye a guromo vbatshani ngudzu kha khali dzinyumbani nya guvbahwe khu mandza nya vathu, kha nga a ganedego muprofeti, khuye:

⁴⁹ ‘Ndzadzini gikhalo gyangu nya wufumu ni litigo gigandredzelo nya migondro yangu, ina nyumba muni mu na gu nyi vbahelago? Khu Pfhumu a ganelago; khu wevbini wulanga wu yelago eni guhefemula avbo?

⁵⁰ Gasi khandri eni nyi nga gira silo satshavbo, gani?’

⁵¹ Vathu va nya gu banga mihungo, nya myonyo nyamba khodwa ni dzindzeve nyamba pwa. Mu ngu bomba Liphuvbo nya Guage gikhati gyatshavbo, nga edzi va nga bani va gu gira vababe vanu.

⁵² Khu wevbini muprofeti wa gale v ngamba mu tutumisa vababe vanu? Va songide vale va nga hegula gutivisa lipfhumba nya gute ga muthu nya ululamenga mu danga enu mu gu mu songa.

⁵³ Enu mu nga hakhago Nayo khu mandzani nya sirumwa sa Nungungulu mu si wu landrisi.”

⁵⁴ Na va pwide magana yaya va di khunguvanyega myonyoni gwawe, va gu khukhurusela magwaha Sitefane khu likhulo.

Sitefane a ngu pfarwa khu siwindri

⁵⁵ Na tade khu Liphuvbo nya Guage, Sitefane a di khedzisa vbatshani a gu wona wudhumo wa Nungungulu, Jesu na emide nyamudye ga Nungungulu,

⁵⁶ Sitefane a ganela, khuye: “Nyi ngu wona ndzadzi na yi tulegide ni Mwamana wa Muthu na emide nyamudye ga Nungungulu.”

⁵⁷ Aholu, vathu, na va pwide, va di womba dzihuwa, va gu tshika dzindzeve, va mu kuwugela vatshavbo,

⁵⁸ va mu ndrindrela vbavbandze nya lidhoropa, va mu pfara khu siwindri. Dzifakazi dzi di vegide myendra yawe migondroni ya moyo nya lidzaha nya gupwani khu Sawule.

⁵⁹ Na gu pfarwa khu siwindri Sitefane a di lombelela, khuye: “Pfhumu Jesu hakha hefemulo wangu!”

⁶⁰ Khavbo avbo, na khidzimide a di khusedza ngudzu lito a lomba, khuye: “Pfhumu, U nga va rwegi nandru nya gighoho gegi.” Na ganede magana yaya a di lala.