Mithumo 5 - Bhibhiliya Nya Guage

Gulipha ga Ananiya ni Safira

¹ Mwama moyo nya gupwani khu Ananiya ni mwangadzi waye Safira, a di rengisa gipeto;

² aholu, na pwanane ni mwangadzi waye a di siha gipandre nya tengo nya dzitsapawu a nga rengisa khidzo, a gu dzega edzi dzi nga tshala a guya dzi vega migondroni ya vapostoli.

³ Khavbo avbo, Pedro a di mu wudzisa, khuye: “Ananiya, khu ginani u nga dzumela Sathane a tadza monyo wago, u gu liphela Liphuvbo nya Guage, u gu siha dzimbe dzitsapawu u nga rengisago khidzo gipeto?

⁴ U si gu rengisi, ina gi di si gu lumbi, gani? Ahati olu u gi rengisidego khu gudzina gwago, khu ginani u nga diga gu khala ni dzitsapawu dzakone, u dzi thumisa guhaladza gwago? Khu ginani u hungidego makungo yoyo monyoni gwago? Khwa liphela vathu, u di liphela Nungungulu.”

⁵ Na pwide magana yaya Ananiya a di thega vbavbatshi a sala afa. Khavbo avbo, vatshavbo va nga mapwago mahungu yaya, va di khala hwanga.

⁶ Ma di khuga madzaha ma fenengedza girumbi gyaye, ma duga nagyo ma ya dzinga.

⁷ Na gu vbindride gipimo nya dziora dzitharu, a di bela ngadza Ananiya, nyamba siti esi si nga dugelelago.

⁸ Khavbo avbo, Pedro a di mu wudzisa, khuye: “Nga nyi embela, khuye oyu tengo mu nga rengisa khuye gipeto gyanu, gani?” Uye a di hakha, khuye: “Ina, khuye.”

⁹ Pedro a di engedza a ganela, khuye: “Khu ginani mu nga pwananago mufela gu pfhadza Liphuvbo la Pfhumu? Yingisa, mwanyatunu, sikingo sa vale va wuyago khiyo va ngaya dzinga mwama wago. Va na gu rwala nuwe.”

¹⁰ Gikhati gyogyo nyamayi a di thega vbavbatshi migondroni ya Pedro afa. Na ma bede madzaha, ma di mu dzega ma ya mu dzinga vbafuvbi ni mwama waye.

¹¹ Vathu vatshavbo nya vakhodwa ni vatshavbo vathu va ngapwa mahungu nya silo sesi va di tala khu hwanga ni guthuruga.

Vapostoli va ngu gira siliwugiso nya singi

¹² Siwonegiso ni siliwugiso nya singi si di girwa vbakari nya vathu khu mandza nya vapostoli. Va di gu olovela gutshangana vatshavbo khu monyo moyo vbanyangwatunu ya Solomoni.

¹³ Aholu vambe vathu va di si tiyeli gu patana navo; ambari ulo, vathu va di gu va rungudza ngudzu.

¹⁴ Tsawa nya vakhodwa wu di gu engedzelana gu dandra, vama ni vanyamayi va di gu bela tsawani ga Pfhumu.

¹⁵ Va di dzega vadwali va gu va rwala khu mathatho mu dzindzilani, gasi gikhati Pedro a vbindrago va kuhwe khu mwedzi waye.

¹⁶ Vathu nya vangi va di guta khu madhoropani ya vbafuvbi ni Jerusalema va resa vadwali ni vathu nya gusaniswe khu maphuvbo nya guvivbe. Vatshavbo va di hawulugiswa.

¹⁷ Khavbo avbo, khongolo nya vaphasi nya mhamba ni vatshavbo vale a hengelago navo, va lumbago tsawa nya vasadhusi, va di tala khu lidiwo,

¹⁸ va mola vapostoli va gu va thela pasoni.

¹⁹ Aholu ngilozi ya Nungungulu yi dita ni wutshigu yita tula malimba nya lipaso, yi gu duga navo vbavbandze, yi va embela, khiyo:

²⁰ “Indrani Nyumbani ga Nungungulu mu ya tshumayela vathu khu mavbanyelo yaya nya maphya.”

²¹ Na va pwide silo sesi, va di bela Nyumbani ga Nungungulu ni marandragugya va phela gu hevbudza. Na vbohide Muphasi nya khongolo ni ava a nga bani ari navo, va di ramba madhota ni manganagana yatshavbo ya na Israyeli, va gu rumela guya dzega Vapostoli pasoni, gasi guta va lamula.

²² Aholu, dzindruna na dzi hongode, dzi di ya va hamuga pasoni, dzi wuya dzi ta bika khidzo:

²³ “Hi di ya mana malimba na ma khothidwe gwadi, masotshwa mari malangani yawe, aholu, na hi tude, kha ha mana muthu.”

²⁴ Na va pwide magana yaya, muthangeli nya Nyumba ya Nungungulu gumogo ni vakhongolo nya vaphasi nya mhamba, va di liwuga ngudzu va gu dzi wudzisa avo vamune, khavo: “Gu na bani ari ginani silo sesi.”

²⁵ Khavbo avbo, gu di vboha muthu a nga resago mwango nya gukhuye, vama mu nga va thelani pasoni, vomo Nyumbani ga Nungungulu va hevbudza vathu.

²⁶ A di hongola muthangeli nya Nyumba ya Nungungulu ni dzindruna dzaye vaya va dzega nyamba va gurumedza khu tshivba, kholu va di gu thava gu pfarwa khu siwindri khu vathu.

²⁷ Na va residwe va ta vegwa vbakari nya madhota, muphasi nya khongolo a di va wudzisa, khuye:

²⁸ “Ethu hi mi himbedzedeni khu tshivba guhevbudza khu lina lolo, aholu enu mu tadzile Jerusalema khu sihevbudzo sanu, gambe mwa guvbweta gu hi ninga nandru khu gufa nya muthu yoyu.”

²⁹ Aholu, Pedro ni vapostoli va di hakha, khavo: “Hi fanede gu yingela Nungungulu guvbindra gu yingela vathu.

³⁰ Nungungulu wa vababe vathu wuside Jesu khu ga vafudego, oyu enu mu nga mu songa mu mu khokhothela vbagihambanotunu.

³¹ Nungungulu rungudzile Jesu a mu gira Pfhumu ni Muvbanyisi, afela gu ninga gu vbindrugedza mavbanyelo ni gutsetseledwa sighoho sanana sa na Israyeli.

³² Ethu hi guromo avba hi dzifakazi nya silo sesi gumogo ni Liphuvbo nya Guage, eli Nungungulu a ningago vatshavbo vale va mu yingelago.”

Wusingalagadzi wa Gamaliyeli

³³ Na va pwide esi, va di dzi hodzedzela khu wuvi, va gu hunga makungo nya gu va songe.

³⁴ Khavbo avbo, moyo nya mufarisi, nya gupwani khu Gamaliyeli a diri muhevbudzi nya Nayo, a nga bani a gu ningwa githawo khu vathu vatshavbo, a di khuga a ema a ruma gu duswa vapostoli vbavbandze gipimwana.

³⁵ A di ganela ga madhota, khuye: “Va na Israyeli, dzi woneleni khu esi mu vbwetago gu gira ga vathu vava!

³⁶ Khu matshigu ya hwane manegide mwama nya gupwani Teyodasi a nga bani a gu dzi randra khongolo, khu magirelo yoyo, a di gu landredwa khu gipimo nya magumana mazana vama, hwane nya gu na songidwe, vapizane vaye vatshavbo va di phalalega; satshavbo si guvbela furi avbovbo.

³⁷ Khu hwane a dita Judha, mugalilewu, khu matshigu nya gilovela. Uye nuye a di landredwa khu vathu nya vangi, aholu a di songwa. Vale va nga bani va gu mu landrela va di phalalega.

³⁸ Khu yangu mawonelo nyari kheni, hongoleni hi va dige vathu vava nyamba va gira gilo. Va tshuleni va hongole, kholu thumo wowu, wa gu bani wuri wa gukhugela mapimoni nya vathu wu na hegisa khu gufuva.

³⁹ Aholu wa gu bani wuri thumo wa Nungungulu, gima, kha mu na wu kodza gu wu fuvisa; gambe mu na manega na mu gu dwana ni Nungungulu.” Va di dzumela mawonelo ya Gamaliyeli.

⁴⁰ Na va ranide vapostoli va di va kwamula va gu va laya gumba ganela gambe khu lina la Jesu. Khavbo avbo, va di va tshula.

⁴¹ Vapostoli va di duga khu phathani na va tade khu gunengela, kholu Nungungulu a di va ningide wuhigo nya gusaniswe khu kotani nya lina la Jesu.

⁴² Va di si garali khu gu hevbudza matshigu yatshavbo Nyumbani ya Nungungulu ni dzidrangani, ni gu huwelela mahungu yadi nya gupwani Jesu khuye Kristo.