Mithumo 3 - Bhibhiliya Nya Guage

Gu hawulugiswa ga mwama nya gigoha

¹ Pedro ni Johane va di gu gwela Nyumbani ga Nungungulu vaya gira nombelo nya silambo.

² Va dita vathu na va rwade mwama a nga bani ari gigoha gukhugela guvelegwani gwaye. Matshigu yatshavbo va dita mu vega vbamwanyatunu nya Nyumba ya Nungungulu gu ranwago pwani “Wumburi,” afela gu lomba zomola ga vathu va belago.

³ Na wonide Pedro ni Johane na va gu bela Nyumbani ga Nungungulu a di va lomba zomola.

⁴ Pedro ni Johane va di thendregedza va mu khedzisa. Pedro a di mu embela, khuye: “Nga hi khedzisa.”

⁵ Uye a di khusedza maho a va khedza, na gu virela gu hakha gilogyo khu mandzani gwawe.

⁶ Pedro a di khuye: “Nyi mwalo parata ambari ndralama; aholu, iso nyi gu naso, khiso nyi gu ningago: Khu lina la Jesu Kristo wa Nazareta, khuga u gimbila.”

⁷ A di mu phara khu mandza ya nyamudye a gu mu khusa. Khu gikhati gyogyo, migondro ni sitshinandro saye, si di tiyela;

⁸ mwama a di ndraga a ema khu mawundru yaye, a phela gu gimbila. A di bela navo Nyumbani ga Nungungulu, na gu gimbila, na gu ndragandraga ni gu rungudza Nungungulu.

⁹ Vathu vatshavbo va di mu wona na gu gimbila ni gu rungudza Nungungulu,

¹⁰ va di gu muti pwani khuye kamwe a nga bani a gu khala vbamwanyatunu nya wumburi nya Nyumba ya Nungungulu a lomba zomola. Va di tala khu guliwuga ni gusamala khu kotani nya iso si nga girega gwaye.

Tshumayelo ya Pedro vbakari nya vathu

¹¹ Mwama wule a di namarela Pedro ni Johane, vatshavbo va di liwuga va ta va randrela avba va nga bani va romo, nyangwatunu yi ranwago pwani khya Solomoni.

¹² Na wonide esi, Pedro a di ganela ga vathu, khuye: “Vathu va Israyeli, khu ginani mu liwuga khu gu wona silo sesi; khu ginani mu hi khedzisago nga khwatshi mwendro khu tshivba yathu, mwendro gukhodwa gwathu gu nga hawulugisa mwama yoyu a kodza gu gimbila?

¹³ Nungungulu wa Abrahama, wa Isaki ni wa Jakobe, Nungungulu wa vababe vathu, rungudzide githumi gyaye Jesu, mu nga Mu ningelani enu, ni gu mu dangani mbeli ga Pilato; narigu uye a di guvbweta gu mi tshula, enu mu bomba.

¹⁴ Mu dangide muthu nya guage ni muthu nya gululame, mu gu lomba gu tshuledwa gighevenga.

¹⁵ Mu songiside guralo Pfhumu yi ningago guvbanya. Aholu, Nungungulu a mu wuside khu ga vafudego; ethu avba hi dzifakazi nya sigiro soso.

¹⁶ Khu gukhodwa linani ga Jesu, ilo lina lolo khilo kamwe li nga ningago tshivba mwama yoyu mu mu wonago, gambe mu mu tigo: Khidzo kamwe, gukhodwa linani ga Jesu gu ningide womi mwama yoyo mu mu wonago mwatshavbo.

¹⁷ Ambari ulo vandruye, nyi ngu dziti nya gukheni mu giride esi khu wuhangi, enu ni vafumeli vanu.

¹⁸ Aholu, Nungungulu tadziside khu magirelo yaya satshavbo iso a nga si tivisago khu magana ya vaprofeti vatshavbo, nya gukhuye: Kristo Waye a di gu fanela gusaniseka.

¹⁹ Khu kharato, dzi layeni mu vbindrugedza mavbanyelo, gasi mufela gu tsetseledwa sighoho sanu;

²⁰ mwendro khu magirelo yoyo gi na rumedwa gikhati nya gu rudziswe khu Pfhumu. Uye a na rumela Wule a nga tumbisedwa enu, a gu uye Jesu.

²¹ Uye a fanelago gu hakhwa Ndzadzini kala gu vboha matshigu nya guwusedzwe silo satshavbo a nga tivisago Nungungulu gukhugela gale khu magana ya vaprofeti nya gukatege.

²² Khu lisine, ganede Mosi, khuye: ‘Pfhumu Nungungulu a na tumbulugisa vbakari nya vandriyanu muprofeti nya gufanane ni eni. Mu na mu yingisani ga satshavbo a na gu mi embelago.

²³ Uye a na gumba yingisa muprofeti yoyu a na fuviswa vbakari nya vathu va Nungungulu.’

²⁴ Vatshavbo vaprofeti va nga ganela, gukhugela Samuweli ni vale vatshavbo va nga mu landrela khu hwane, va tiviside matshigu yaya.

²⁵ Enu khenu sanana sa vaprofeti, mu velegidwe ndrani nya pwanano wu nga girwago khu Nungungulu ni vababe vanu, gikhati a nga ganela ga Abrahama, khuye: Khu melego wago ma na kategiswa mahundzu yatshavbo ya mafuni.

²⁶ Nungungulu na wuside githumi gyaye khu ga vafudego, a gi rumede gwanu guhegula, gasi guta mi kategisa, gufela gu muthu ni muthu a mane gu vbindrugedza a diga mithumo yaye nya guvivbe.”