Mithumo 23 - Bhibhiliya Nya Guage

Magana ya Pawulo phathani

¹ Pawulo, na khuside maho a khedzisa madhota nya phatha, a di ganela, khuye: “Vandruye, nyi vbanyide khu gu tshulega mahingigedzoni gwangu gwatshavbo mbeli gwa Nungungulu kala litshigu la muhuno.”

² Aholu khongolo nya vaphasi nya mhamba, Ananiya, a di ruma ava a nga bani ari navo vbafuvbi gu mu veta.

³ Khavbo avbo, Pawulo a di khuye: “Nungungulu a na gu veta nuwe, ndzariwe nya guagiswe khu phembe! Uwe u khade avbovbo gasi gu nyi lamula khu Nayo, ni olu u wugelago Nayo, u ruma gu nyi veta!”

⁴ Avo va nga bani vari naye, va di mu embela, khavo: “Wa gu vala khongolo nya vaphasi nya mhamba ya Nungungulu?”

⁵ Pawulo a di hakha, khuye: “Kha nya nga muti, vandriyangu, kheni khuye khongolo nya vaphasi nya mhamba, kholu gu lovidwe pwani: ‘U nga ganeli guvivba khu mufumeli nya litigo lanu.’ ”

⁶ Pawulo a di gu dziti gukhuye yomo mitsawa mivili phathani, oyu nya vasadhusi ni oyu nya vafarisi. A di khuye: “Vandriyangu, eni nyi mufarisi gyanana nya vafarisi. Khu kotani nya gutumbe guwuga ga vale va fudego, khayo mahungu nyi thethiswago khayo.”

⁷ Na ganede aya magana, gu di manega gu hambana vbakari nya vafarisi ni vasadhusi, gidzemo gi gu kabanega.

⁸ Kholu vasadhusi vari khavo gu mwalo guwuga ga vale va fudego, gu mwalo ngilozi ambari maphuvbo. Aholu, vafarisi va ngu khodwa ga satshavbo soso.

⁹ Khavbo avbo, li di wuga ligwaha nya likhongolo. Vambe vahevbudzi nya tsawa nya vafarisi va di khuga va gu ganedza khu tshivba, khavo: “Kha hi mani gighoho ga muthu yoyu! Ahati nari liphuvbo, mwendro ngilozi gya Nungungulu gi nga ganelago naye?”

¹⁰ Guganedzisana gu di engedzelana khu tshivba. Ndruna, khu gu thava gu khiyo Pawulo a nga vbadzuledwa khavo, yi di ruma vanyakasane gu tshiga vaya dusa Pawulo vbakari gwawe, va mu bedza libhiyoni.

¹¹ Ni wutshigu wakone, Pfhumu a di dzi wonegisa gwaye a mu embela, khuye: “Tiya! Edzi u nga ninga khidzo wukustumunyu khu lina langu Jerusalema, khidzo u na ya girago gambe Roma.”

Gikungo nya Vajudha nya guvbwete gu songa Pawulo

¹² Na gugide, Vajudha va di tshangana va hunga gikungo, va sambanya khavo kha va na hodza, kha va na sela na va si gu songi Pawulo.

¹³ Va diri gipimo nya guvbindre magumana vathu avo va nga gira tshangano yoyo.

¹⁴ Va di hongola ga vakhongolo nya vaphasi nya mhamba ni madhota vaya ganela, khavo: “Hi sambanyide gumba hodza gilo na hi si gu songi Pawulo.

¹⁵ Aholu enu tshanganani gumogo ni phatha mu ya lomba khenu hi resele Pawulo, gasi hi ta pwisisa gwadi mahungu yaye. Ethu hi na donga gu mu songa na si gu vbohi iyo gwanu.”

¹⁶ Gyanana gya ndriyaye Pawulo, na gi pwide mahungu yaya, gi di ya bela libhiyoni giya embela Pawulo esi satshavbo gi nga si pwago.

¹⁷ Pawulo a di rana moyo nya muthangeli nya nyimbi a mu embela, khuye: “Dzega gikhwathana gegi, indra nagyo ga ndruna, momo mahungu gi vbwetago guya mu embela.”

¹⁸ Uye a di mu dzega a hongola naye, aya khuye ga ndruna: “Pawulo a di nyi lomba gukhuye nyi rese avbo gwago gikhwathana gegi, ginani mahungu gu gu embela.”

¹⁹ Ndruna yi di dzega gikhwathana yi gu hongola nagyo khu phuvbo yi ya gi wudzisa, khiyo: “Ginani u vbwetago gu nyi embela?”

²⁰ Igyo gi di hakha, khigyo: “Vajudha va hungide gikungo nya guvbwete guta gu lomba avo mindru gukhavo u va resele Pawulo phathani, nga khwatshi va guvbweta guta pwisisa gwadi mahungu yaye.

²¹ U nga dzumeli, kholu vomo gipimo nya guvbindre magumana nya avo va khadego va riya, va sambanyide gufa ni guvbanya, gumba hodza ni gumba sela gilo na va si gu songi Pawulo. Olu va gu lirela uwe gu dzumela.”

²² Ndruna yi di diga gikhwathana gi hongola, yi gi embela, khiyo: “U nga embeli muthu gukhuwe u dzude u ta nyi tivisa mahungu yaya.”

Pawulo a ngu yiswa Sezareya

²³ Na ranide vathangeli vavili nya nyimbi a di va embela, khuye: “Dongiselani vbakari nya wutshigu, mazana mavili masotshwa, livbandre na mavili magumi va nya dzikavalu ni mazana mavili va nya matshari, mu hongola Sezareya.

²⁴ Dongiselani gambe sirengo, mu khiledza Pawulo, mu ya mu vbohisa gwadi ga mwamangulu Felisi.”

²⁵ A di lova lidangalila nya magana yaya:

²⁶ “Eni Klawudiyo Lisiya, gwago uwe mwamangulu Felisi, nyi ngu gu losa, sewe!

²⁷ Mwama yoyu a di modwe khu Vajudha a vbweta gu songwa, nyi gu hongola eni ni masotshwa nyi ya mu vbanyisa khu gu muti kheni Muroma.

²⁸ Na nyi vbwetide guti gwadi mahungu a nga modwago khayo, nyi di mu yisa phathani gwawe.

²⁹ Nyi di ya wona gukheni nandru va mu ningago wa gukhugela vbasihevbudzotunu nya gukari nya nayo wawe, si ganedzwago khu vambe. Aholu kha nya wona gwaye nandru nya guyele gu songwa mwendro gu khothedwa.

³⁰ Na nyi tivisidwe gupwani gi hungidwe gikungo nya gu mu songe, nyi di vbiredzela gu mu rumela iyo gwago, nyi tivisa gambe ava va mu ningago nandru vate gwago, vata ganela egi va gu nagyo ni uye.”

³¹ Masotshwa, na ma lulamisede iso ma nga rumwa, ma di dzega Pawulo ni vbakari nya wutshigu ma gu hongola naye Antipatrida.

³² Na gugide, ma di bwelela libhiyoni, ma diga va nya dzikavalu va gu hongola naye.

³³ Na va vbohide Sezareya, va di ya ningela lidangalila ga mwamangulu, va gu mu yisela Pawulo.

³⁴ Na hevbude lidangalila, mwamangulu a di wudzisa litigo a dugelago umo. Na dzitide gukhuye a gu dugela Silisiya, a di khuye:

³⁵ “Nyi na ta gupwa gikhati va na vbohago ava va gu ni mahungu ni uwe.” A di ruma khuye va mu khothele nyumbani nya mahungu ya Herodhi.