Mitengo 8 - Bhibhiliya Nya Guage

Livbandre na dzimbili dzikandriya dza Wulangani nya Guage

¹ Pfhumu Nungungulu a di embela Mosi, khuye:

² “Ganela ga Aroni, u mu embela, khuwe: Gikhati u vegedzelago dzikandriya dzatshavbo nya livbandre na dzimbili, dzi tshomegedzele khu magirelo nya gu dzatshavbo dzi wenengedza mbeli nya gidzigaredzo nya dzikandriya.”

³ Aroni a di gira kharato, a vegedzela dzikandriya khu magirelo nya gu dzi wenengedza mbeli nya gidzigaredzo, kha nga idzo Pfhumu Nungungulu a nga leletelago khidzo Mosi.

⁴ Gidzigaredzo nya dzikandriya gi di girwa khu ndralama nya gupfhudwe, gi diri rumba nyamba yingwa gukhugela tshinani kala matamoni gakone. Gi giridwe gukhedza khu giwonelo a nga nonedzwago Mosi khu Pfhumu Nungungulu.

Guagiswa ga va na Levhi

⁵ Pfhumu Nungungulu a di engedza a ganela ni Mosi, a mu embela, khuye:

⁶ “Dzega va na Levhi vbakari ga va na Israyeli u va agisa.

⁷ Gasi gu va agisa, u na gira, kharati: U na va mitegedzela khu mati nya guditshedze sighoho; va ya dzi vbalula ndzudzu ni mafefeleti nya givili gyawe gyatshavbo, va handza guambala gwawe, va hamba, va dzi agisa kharato.

⁸ Khavbo avbo, va na resa gimombyana gumogo ni ningelo nya guhodze nya wuguvbi nya wadi, nya gusugwe khu mafura; u na dzega gimbe gimombyana gasi gu gira phaso nya guditshedzwe sighoho.

⁹ U na ruma va na Levhi va hidzimela vbafuvbi ni Tshatsha nya Tshangano, u tombanisa tshangano watshavbo nya vathu va na Israyeli.

¹⁰ Avbo u na bani u hidzimiside va na Levhi mbeli ga Pfhumu Nungungulu, va na Israyeli va na handzega mandza vbatshani gwawe.

¹¹ Aroni a na bikela va na Levhi kha nga ningelo nya gundziwitedwe mbeli ga Pfhumu Nungungulu, owu wu dugago khu ga va na Israyeli; khu guralo, va na thuma thumo nya wukhozeli mbeli ga Pfhumu Nungungulu.

¹² Va na Levhi va na handzega mandza yawe vbatshani nya simombyana. Uwe u na paya gimwegyo gasi gu gira phaso nya gutsetseledwe sighoho; gasi egi gimbe gi na girwa phaso nya guvbiswe ga Pfhumu Nungungulu, gasi va na Levhi va ditshedzwa sighoho.

¹³ U na emisa va na Levhi mbeli ga Aroni ni sanana saye, u va ningela kha nga ningelo nya gundziwitedwe mbeli ga Pfhumu Nungungulu.

¹⁴ Khu magirelo yoyo, u na dusa va na Levhi vbakari ga va na Israyeli; va na Levhi va na lumba Eni.

¹⁵ Khu hwane, va na Levhi va na bela vaya gira thumo wawe Tshatshani nya Tshangano, hwane nya gu uwe nu va agiside, u va ningela kha nga ningelo nya gundziwitedwe.

¹⁶ Kholu avo, vbakari ga sanana sa na Israyeli, va ningedwe gwangu; Eni neni nyi va hathide wulangani nya matiwula yatshavbo nya sanana sa na Israyeli, gasi va khale Vangu.

¹⁷ Kholu matiwula yatshavbo nya sanana sa Israyeli ma gu lumba Eni; gukhugela matiwula nya vathu kala matiwula nya sifuyo; gukhugela litshigu lile nyi nga songago matiwula ya Vagipiti, nyi hathide matiwula yatshavbo nya sanana sa va na Israyeli nyi ma agisela Eni.

¹⁸ Nyi hathide va na Levhi wulangani nya matiwula yatshavbo vbakari ga sanana sa na Israyeli.

¹⁹ Aholu va na Levhi va ningedwego Aroni ni sanana saye, vbakari ga va na Israyeli, nyi va ningede gasi va thumela va na Israyeli umo nya Tshatsha nya Tshangano, ni gu gira phaso nya ditshedzo khu avo, gasi gu si manegi tsayiso vbakari ga va na Israyeli, va gu hidzimela Vbawulangatunu nya Guage.”

²⁰ Khu guralo, Mosi, Aroni ni tshangano watshavbo wa va na Israyeli, va di gira ga va na Levhi satshavbo esi Pfhumu Nungungulu a nga leletelago Mosi, mayelano khu va na Levhi.

²¹ Khu guralo, va na Levhi va di dzi agisa, va handza guambala gwawe; khavbo avbo, Aroni a di va ningela kha nga ningelo nya gundziwitedwe mbeli ga Pfhumu Nungungulu, a gu gira phaso nya ditshedzo khu avo, gasi gu va agisa.

²² Khu hwane nya isoso, va na Levhi va dita gasi gu ta thumela Tshatshani nya Tshangano, mbeli ga Aroni ni sanana saye; kha nga edzi Pfhumu Nungungulu a leletedego khidzo Mosi, mayelano khu va na Levhi, a di va girela kharato.

²³ Pfhumu Nungungulu a di engedza a ganela ga Mosi, khuye:

²⁴ Yimbe milayo mayelano khu va na Levhi kheyi: Uye a gu ni tanga nya magumavili na livbandre myaga guya mbeli, fanede gu bela thumoni nya guthumele Tshatshani nya Tshangano;

²⁵ aholu hwane nya gu bani a enedzide livbandre magumi myaga, a na diga guthuma, gima kha na thuma gambe.

²⁶ Khu guralo, a na phasedzela vandriyaye umo nya Tshatsha nya Tshangano, a gira muwoneleli wawe, nyamba thuma gilo nya wukhozeli. U na gira kharati ga va na Levhi ga mithumo yawe.”